Swahili Bible2

39

1Iwe waamanya imbuka isi tsiimbusi tsye mwiirome tsisaalilamo?

Namwe iwe waamanya waabonakho ikhisi nga isaala?

2Iwe waamanya imbuka isi bimala nga byeelukhile nio byasaala?

Namwe iwe waamanya imbuka isi bisaalilamo tsiinyana tsyabyo?

3Iwe waamanya imbuka isi tsiinamilamo aasi khu liloba,

nga tsitsya khuusala tsiinyana tsyatsyo?

4Nga tsili mwiirome umwo,

tsiinyana tsyatsyo tsitsowa tsyaaba ni kamaani,

tsyaatsya tsyaamenya khubwatsyo,

tsyaalekha khuukobolayo isi maawaabwe ta.

5Naanu uwalekha tsisikilya tsye mwiirome ari tsikeende busa nga tsindekhuule?

Naanu utsikaangulula nio waakila tsyamoola busa buli aandu?

6Ise natsiwa nitsyo kumubiimbi khuuba muungo mwatsyo,

ise naatsilekha khuumenya mu liloba liliili busuumbu busa.

7Tsimenya aleeyi nashiryo setsiwulila liyoombo lye mu shiriimba ta;

mbaawo unyala waatsibaya waakila waatsikhola khuuraamba buraambi ta.

8Kamaayilo kaatsyo kali mu bikoongo,

iyo niyo isi tsyaayila khu bunyaasi ni bisaala bibiiliyo.

9Imoongo iwuunwa inyala yaakhuraambira iwe buuraambi?

Iwe unyala waakibowa yaakona mu litaala iwoowo?

10Iwe unyala waakibowa ni kimikosi waanyalisa khukilimisa,

namwe waakirakho shikyeenga yaakhweesa nga ikhabala kumukuunda?

11Iwe unyala waakiyikina bari khulwekhuuba niyo ili ni kamaani kamakali,

uri kane niyo ikhukholele iwe kimilimo kyoowo kimisiro?

12Iwe wambaasa uri niyo inyala yaakhukhweesela iwe bye likesa yaakhureerera ingo,

naluundi uri kane ikhusutile bye likesa khukhwaama isi ubiwuulila?

13Tsindaaha tsye kunyoofwe tsikhupaka ni likono liikali busa,

ne mbaawo inyoofwe inyala yaapamburukha nga likhuuyi ta.

14Khulwekhuuba inyoofwe ilekha kamaki kaayo khwiiloba,

liiloba lyaaba nilyo lilikareerera buukhafu.

15Niye s’iimanya iri inyala yaabayo shishiinyala shakakhaandakilila aasi mu bikele,

namwe bari isolo iye mwiirome inyala yaakaaraka ta.

16Inyoofwe yaantsukha busa kamaki kaayo,

kaafwaana busa kakaakhali kakaayo ta;

yafwaana busa nga ikhenaanayo khu byeesi iluyiilekho ta.

17Shili shiryo khulwekhuuba Wele s’aakiwa niyo kamakhula ta,

niye aakikhola khuuba isilu.

18Ne nga yenyukhile khukhwiiyiinga mu byeesi ikhola,

ikhaasisa iŋwaaŋwa ni nooyo uukitimilakho.

19Yobu, iwe niye ukila ne tsiŋwaaŋwa tsyaaba ni kamaani ke angaaki karyo?

Namwe iwe niye uwatsiwa kamayeeye kakaali mu makosi kaatsyo?

20Iwe niye ukila tsyatima nga tsisuna busa nga tsiisike,

waakila khulwe khufuura ni kamaani tsyariisaka babaandu?

21Tsilima bibutusi byatso mu liloba aasi tsyokesanisa nga ni tsili ni kamaani;

tsitsya mu busoolo ni kamaani kaatsyo koosi.

22Nitsyo setsilikho ni khuurya khwoositsana ta,

naluundi mbaawo shishinyala shaatsiriisariisa ta;

ikhaba luurima seluriisariisa iŋwaaŋwa ta.

23Bye busoolo byeesi babaatsiikhalakho basuta,

kali kamafumo kakaamulikhamulikha mu buwaanga bwe nyaanga.

24Khulwe bunyindaalifu ni kamaani,

nitsyo tsitima busa nga tsitsya muumoni,

ikhaba baakhafuura ifulumbeti,

nitsyo setsiima ta.

25Buli lweesi bafuurira ifulumbeti,

nitsyo tsiheela nga tsifuura ni kamaani,

tsyanyalisa khuuwunyila busoolo nga tsishiili ni khukhwoola aambi ta,

naluundi tsyawulila nga baraangirisi be kamahe ni bakhookhela basilikhale baabwe.

26Kamakhula ke khuupamburukha nga ikhosi n’ibayuula tsiindaha,

yaapamburukha yeekha kwe imwaalo, yaakaamisa khuusi iwe?

27Ikhosi iliinda iwe waanyoowa waakilakila,

nio waakila yaatsya yoombakha shiiswi shayo mu ngiingi?

28Kunywiinywi waasu kwoombakha shiiswi mu mabaale mu ngaaki,

nio waakila kamabaale kakeyiinga ako kekyela luumako lwakwo.

29Yiimikha ibweene iyo nio yaabona buulayi she khuulya;

nio waakila imoni yayo yaabona nga she khuulya shili aleeyi.

3039.30: Mat 24.28; Luka 17.37Tsiikhosi tsibuusanila isi shishiindu shifwiliile,

nio waakila kamaana kaatsyo kanuunamo kamalasile.