Swahili Bible2

38

Umukasya akanikha isi Yobu

1Lwanyuma Umukasya weetsila mu mbewo

iye kamaani waakanikha isi Yobu nga aloma ari,

2Iwe niye naanu nio wikanakane kamakhula keesi ise ndi ni nako,

nga uraambisa tsiilomo tsitsikhalimo ni kumukaso ta?

3Ari iwe yiimikha khu ngaaki ube umunyindaalifu nga umusaani;

wiilemo bireebo byeesi ise intsya khukhureeba.

4Ise nga ni nabuumba shiibala, iwe wabayo?

Nga iwe waamanya bibiindu biikali, imboolele khubone.

5Naanu uwakhalawo buubalaayi bwe shiibala?

Naanu niye uwahaamba kumukosi kukwashipima?

Iwe wiyila nga uwamanya, imboolele khubone!

6Kumusiingi kwe shiibala kwayima khu shiina?

Namwe naanu niye uweemisa kuuyeko kwe musoonda?

7Iwe wabawo nga tsinieniesi ni tsyeemba kimyeenya,

naluundi nga babaamenya mwikulu boosi ni beemba khulwe kumwiikhoyo?

838.8: Yer 5.22Naanu niye uwarawo litikiiyi lilikhaliilisa inyaantsa,

nga ni yasaalikha khukhwaama mu liloba?

9Naanu niye uwakhola kamafuumbi keekela niko kakaabiimba khu nyaantsa,

naluundi waakhola kamafuumbi kamamali kameene khuukibotookhelela?

10Naanu niye uwakiwa lulwaakha lweesi ili ni khuubirira,

naluundi waakyokesa isi ili ni khukhwakama?

11Naanu uwakilomela ari, uli ni khukhwaakama awo,

ni khukhwilyebula khwe kameetsi khwoowo khuli ni khukhwakama awo?

12Khukhwaama nga usaalikha, iwe waalakilatsakakho shifukhu khuurakikha,

namwe waalakila uri antsye bushe?

13Iwe waalakilatsakakho uri kumutishinyi kwibotokhelele shiibala shoosi,

nio akile baboonaki batitukhe khukhwaama isi beebisile?

14Buwaanga bwe kumuusi bukila kamatila ni tsingiingi tsyerurukhilila busa,

nga umuundu n’aabona khu ndulo khwe shikwaaro,

yaaba busa nga umuundu n’aakhola khaabonelo mu liloba lye tsinyuungu.

15Uri busha kumuusi, sheesi umwoonaki alaanga ari buwaanga bweewe,

buba bwaarusibwilewo,

ishino shaabakhaangabisa nibo khuukhola biikholwa bye bisayuumba.

16Iwe waabonakho imoni yeesi inyaantsa itubukhamo?

Namwe iwe watsyakho wakeenda mu lwaalo lwe inyaantsa?

17Iwe waabonakho shiilibwa shishiitsya imakoombe,

namwe waabonakho shiilibwa shishiitsya isi shishiilima namukoto shili?

18Iwe waamanya buubalaayi bwe shibala nga ni buli?

Iwe noola waamanya bibiindu bino byoosi,

iwe imboolele.

19Iwe waamanya isi buwaanga bumenya,

namwe isi shishiilima shaama?

20Unyala wabyookesa buli shibira lulwaakha lwabyo,

namwe wabyookesa buli shitweela intsila itsya iwasho?

21Ilala, iwe uli ni khuuba waamanya,

khulwekhuuba byatsya khubawo abe iwe wasaalikha,

naluundi iwe uli ni kimiiko kye buukhulu kimikali naabi.

22Iwe waayiingilakho mu shirara shishibiikha buunyifu bwe kamaani,

namwe waayiingilakho mu shirara she kamararara,

23byeesi ise nabiikha naluundi naabireera mu mbuka iye bihangafu,

mu bifukhu byeesi babaandu basoolanila mu busoolo.

24Iwe waamanya intsila itsya isi luuheni lwaama,

namwe intsila itsya isi imbewo iwuutsa

khukhwaama ibwaamanyaanga yaama?

25Naanu uwayaba kumukhoosi kweesi ifula iye kamaani yiitsilakho,

naluundi kweesi ifula iye ikhuungu ingali yiitsilakho?

26Naamu ureera ifula khuukhupa mu bifwo mweesi babaandu bakhamenya ta,

ni mu mubiimbi mu mukhali babaandu ta?

27Naanu usiindikha ifula mu liloba lilyoomu naluundi liliili lyonyene busa,

nio shaakila bunyaasi bwaarura nga aasi anyiriire?

28Ifula ili ni paapawe ukisaala,

namwe naanu niye usaala liime?

29Naanu niye uwasaala kamararara kakekela khaale kubaale,

naluundi naanu niye uwasaala kamararara kakaalakala khukhwaama mu ngaaki?

30Naanu ukila kameetsi kaakhuna kekela nga libaale,

namwe inyaantsa yaakhuna khu ngaaki nga libaale?

3138.31: Yob 9.9; Amos 5.8Iwe unyala waabusaasa tsinieniesi musaafu tseesi balaanga bari Puladesi,

waatsibowa atweela ni kumukosi,

namwe unyala waakaangulula kimikosi kikyabowa atweela

tsinieniesi tsitaru tseesi balaanga bari Oryoni?

32Iwe unyala waaraangilila tsinieniesi waabona uri

tsili ni khuubonekha mu mbuka isi tsyakhiile khuubonekha,

namwe waaraangirira kuusolo shiibulukhu ni tsiinyana tsyakwo?

33Iwe waamanya kamakaambila kakaawula bibiindu bibiili mu ngaaki?

Iwe unyala waakhola kamakaambila ako kaawula bibiili khu shibala?

34Iwe unyala waraambisa liikono lyoowo khulakila kamafuumbi,

nio waakila ifula yaakhupa kameetsi koola khusalasala kaakhumila iwe?

35Iwe unyala khuulakila luuheni lwaamulikha,

nio akile lwiitse isi iwe uli lulome luri, “Ise niy’ooyu”?

36Naanu uwara kamakhula mu mafuumbi

namwe ulakila ni namufweeli waaba ni khuumanya?

37Naanu uli ni kamakhula kakaamunyalisa khuubala kamafuumbi?

Namwe naanu unyala waakakhola kaakila ifula yaakhupa?

38Naanu ukila lifukhuulu lyekelamo liiloba liliili atweela,

namwe naanu ukila liiloba lye khu shibala lyarama nga lyawambaana atweela?

39Iwe niye uweentsela tsitalanyi biilyo nio tsyaalya,

namwe iwe niye uliisa tsitalanyi tsiinyana,

40nga ni tsiba tsyebisile mu mafuluma kaatsyo,

namwe nga tsebuliile isaanyi isi tsitsya khuwaamba?

41Naanu niye uwa biinywiinywi biilyo,

nga bilikho biyiiya ni ntsala,

nga kamaana kaabyo kalikho kaandilila ise khulwe ntsala?