Swahili Bible2

37

1Khulwe ifula iye ikhuungu iyo,

kumwooyo kwase kunikina kwayeŋaana busa.

2Inywe mweesi ni murekeerese liikono lya Wele nga ni likuulila angaaki,

nga ni likuula khukhwaama mukhanwa mweewe.

3Wele aasiindikha luuheni lwamalatana mu ngaaki mwoosi,

lwaamulikha shibala shoosi khukhwaama khu ndulo khukhwoolisa khuundulo.

4Lwanyuma lwayo khuukuula khwe liikono lyeewe khuwulilikhana,

khuukuula khwe liikono lye shiriifwa,

ni mu mbuka iyo yoosi luuheni luba lulikho lumulikha.

5Khuubirira mu likono lyeewe, Wele akuula ni kamaani naabi;

naluundi niye akhola bibiindu bye kamaani

byeesi ifwe khukhanyala khwaamanya ta.

6Khulwekhuuba niye alakila kamararara kaakwa aasi;

ikhaba khaafula khakhamunyakala,

n’iikufula kwe kamaani, byoosi niye ubilakila.

7Niye akila buraambi bwe babaandu bwaakama,

khulwe ifula ni kamararara;

nio waakila wakhwookesanisa ifwe byeesi niye anyala khuukhola.

8Nisho shikila ni tsisolo tsye mwirome tsyengila mu malowo

mweesi tsikona, tsyarama ibweene iyo.

9Ikhuungu iye kamaani yaama isi imenya,

n’iimbewo ireera bunyifu nayo yaama isi ikona.

10Nga Wele waahelele kumuukha kweewe, kameetsi keekyela kamararara;

karyo waakila keekyelamo kubaale kwe kamararara.

11Kamafuumbi Wele aketsusamo luuheni,

waakila waalusiindikha khuumulikha buli aandu.

12Kamafuumbi kano katsya nga keebotokhelela

nga umweene n’akaraangirira khuutsya khukhola khu shibala shoosi

buraambi bweesi umweene aba waakanile.

13Wele aasiindikha bibiindu bino khu shibala,

luukana nga akana khuuwa shiibala shiitaambiso,

namwe nga akana khukhwookesanisa khuukana khweewe.

14Yobu, iwe reka khukhuru uwulile bibiindu bino;

iwe silamo khakyeekhe wambaase khu biindu bye kamaani,

byeesi Wele akhola.

15Iwe waamanya isaambo isi awa bibiindu byeewe kamakaambila,

nio waakila luuheni lwaamulikha khukhwaama mu mafuumbi?

16Iwe waamanya isaambo isi kamafuumbi kakelakelamo mu ngaaki,

nga buno ni buli buraambi bwa Wele bwe kamaani?

17Iwe siwaamanya ta:

iwe uwulila busa buukhafu bwe imbewo imbile khukhwaama imwaalo we shiibala,

nga bulikho bukhwookhelela mu shikwaaro shoowo.

18Iwe unyala khuuyeeta Wele khuubasa liikulu waalibambulula,

lyafwaana busa nga shiibya sheesi bamiliisile ni kamafura?

19Ari iwe khuleekele ifwe byeesi khunyala khuuboolela Wele;

ifwe sikhunyala khwakhaandisana ta,

khulwekhuuba mbaawo sheesi khwamanya ta.

20Ise singane niikoombe khuukanikha ni Wele ta;

khulwekhuuba awo imba namuweele ikhabi iye khukhuuntsira ise.

21Ari buwaanga bwe mu ngaaki buli bwe kamaani naabi,

mbaawo unyala waabulolayo ta;

ikhuungu yawuutsile kamafuumbi koosi yaakamalilewo.

22Wele eetsa khukhwaama ingaaki we shibala nga ali mu shiriifwa she zaabu;

shiriifwa shishiili khu Wele shili she kamaani naabi.

23Shiriifwa sha Wele shili she angaaki naabi,

ifwe sekhunyala khwaashisyeenda aambi ta;

ali umukhosefu naluundi araambisa bwa ŋali mu byoosi byeesi niye akhola.

24Ni nashiryo babaandu bamuwa lukoosi lwe angaaki naabi;

khulwekhuuba niye s’enaanayo isi abo babeyila nga baakesi,

ikhaba nga sibali bakesi taawe.