Swahili Bible2

36

Inganikha iya Elihu imaliilisi

1Kila Elihu eloosela aloma ari:

2Yobu, intsikhaliilikhekho khafwiiti, ise imbewo ni byeesi ikhwookesanisa;

khulwekhuuba iliwo sheesi ise ingana khuukanikha mu lisina lya Wele.

3Kane ise ikhwookesanise iwe ndi indi ni kamakhula mu biindu biikali naabi,

ikhwookesanise iwe indi, byeesi umubuumbi wase akhola bili bya ŋali.

4Mu ŋali tsilomo tsyeesi ise inoma setsili tsye bubeeyi ta;

ise is’ubona ibweeni woowo indi umusaani uwe kamakhula ke angaaki.

5Bona, Wele ali uwe kamaani, naluundi s’aalekelesa umuundu yeesitsana ta;

ali uwe angaaki mu maani ni mu khumanya.

6Niye s’aafukiilisa baboonaki khuuramawo nga bali baalamu ta,

ne abo babaali bataambi niye ababirisa buulayi.

7Wele atseeta abo babaali baakhosefu;

abalekha nibo baawula nga bayiinga

naluundi waabafukiilisa khuuba ni shiriifwa biifukhu byoosi.

8Ne nga babaandu bali baabowe mu minyololo,

bataambisibwa khulwe biikholwa byaabwe,

9Wele abokesanisa biikholwa byaabwe byeesi baamala khaale khuukhola,

naluundi waaboolesanisa ari bibyoonako byaabwe byaatuumile buukali.

10Niye ekula kamaru kaabwe shaakila baarekeeresa byeesi niye aloma,

naluundi waalakila ari baakamise bye bubwoonaki.

11Ni baba bari baarekeeresire bya Wele naluundi baakhola byeesi niye aloma,

bamenya buulamu bwaabwe nga bali mu buyiindifu,

ni kimiiko kyaabwe kyoosi baba nga bali mu mwikhoyo.

12Ne nga sibaloondeleele byeesi niye aloma ta,

bafwiila mu busoolo,

baryo baafwa busa akhali kamakhula ta.

13Abo babaakhesaaya Wele ta, bamenya nga bali ni liirima mu myooyo kyaabwe;

nashiryo abe Wele akhabawa shitaambiso,

sibenaanayo khuumulilila bari abawe buyeeti ta.

14Bafwa nga bashiili bahele;

ni buulamu bwabwe babumenya bwoosi nga bali mu khuswaala.

15Wele awonesa abo babaali mu mutaambo khukhwaama mu mutaambo kwaabwe,

naluundi abaleekela nga eyetisa bihangafu bibikhali bitweela ta.

16Wele aakhuyeete iwe wakhurusa mu bihangafu byeesi wabamo,

naluundi niye waakila iwe waamenya mu lukoosi;

iwe wanyalisa khuulyatsaka bibiindu biinulu muungo mwoowo.

17Ne bona ari iwe ulikho ufuna shitaambiso shibuufu sheesi baboonaki bafuna;

Wele waakhukhaliile iwe kumusaango kwe khutaambisibwa,

naluundi uli ni khuukhola shitaambiso sheesi niye akhuwa.

18Iwe uli ni khukhwitsiiliilisa ubone uri buyiindifu sibukhukhoongelesa ta,

naluundi abo babaalya iwoongo bakhakhuyiyanisa iwe ta.

19Buyiindifu bwoowo mbaawo sheesi bunakhuyeeta ta;

ikhaba kamaani koowo ari sikalimo kumukaso ta.

20Iwe ukhekoomba uri khali shiilo shoolile ta,

mu mbuka isi kamanaambo kakhakoraanirewo busa mu khaangu.

21Yitsiiliilisa ubone uri siwihaambila mu byoonako ta;

khulwekhuuba khutaambisibwa khwakhwitsila iwe,

bari nio ulekhe khubiwaambilamo ta.

22Iwe uli ni khuushiimanya uri Wele ali ni buunyali buukali naabi;

mbaawo unyala waaba umuleekeli weewe ta.

23Mbaawo unyala khumuboolela sheesi ali ni khuukhola ta,

namwe waamulomela ari niye waakholile she bubwoonaki ta.

24Ni nashiryo, busheele shebulila khuruuya byeesi Wele akhola;

bibiikila babaandu babaandi baamuruuya.

25Buli mutweela waamala khuubona sheesi Wele akhola;

ne ifwe khunyala busa khubibonela khukhwaama aleeyi.

26Iwe uli ni khuushimanya uri Wele ali uwe angaaki naabi,

ifwe sikhunyala khwamumanyila ilala ta;

namwe sekhunyala khwaamanya kimiiko kye buukhulu bweewe ta.

27Khulwekhuuba Wele niye ubukula kameetsi khukhwaama khu shibala,

waakila keekelamo ifula.

28Niye ukila ifula yaakhupa khukhwaama mu mafuumbi,

waakila yakhupila babaandu be khu shibala boositsana.

29Mbaawo umuundu unyala khuumanya nga kamafuumbi ni kakeenda,

namwe nga ifula n’ikuulila mu ngaaki isi Wele amenya ta.

30Bona niye asalanisa luheni mu ngaaki mwoosi,

ne mu lwaalo mwe inyaantsa murama nga muli mu shiilima.

31Khulwekhuuba Wele akhalila babaandu kimisaango nga abirira mu byeene bino;

naluundi khubirira mu nibyo waabawa biilyo mu bukali.

32Niye waakukhuulila luuheni mu makhono keewe koombi,

naluundi niye ululakila shiifwo mweesi luli ni khukhwaatikhila.

33Khukuula khwe ifula khumanyisa khuri ifula iye khuungu ilikho yiitsa,

ikhaba tsiikhaafu natsyo tsyokesanisa tsili ifula iy’ekhuungu ilikho yiitsa.