Swahili Bible2

34

Inganikha iya Elihu ikhola khabili

1Kila Elihu eloosela nga aloma ari:

2Inywe muli basaani be kamakhula, ni murekeerese tsilomo tsyase;

ni mumbuliilise buulayi, inywe mumuuli ni khuumanya.

3Khulwekhuuba khukhuru khuliwo khulwe khurekeeresa tsiinganikha,

mu saambo niyo indweela, luulimi lwaamanya shishiindu nga shiilayi namwe ta.

4Khayo ifwe fwabeene khukhalewo shiina nisho sha ŋali;

khayo musiifwe fwabeene khukhalewo shiilayi nisho shili.

5Khulwekhuuba Yobu alikho aloma ari niye s’aalikho ni kumusaango ta;

aloma ari Wele siwamwokesanisile bwa ŋali taawe.

6Niye abona nga kumusaango kweesi bamukhaliile sikuli kwa ŋali taawe;

abona ari ikhaba nga s’aalikho ni shishoonako ta,

ne bamukhupile liikuma lye kamaani naabi.

7Mwaabonatsakho umuundu uwibirisa nga umusaani yuno Yobu?

Waawulusa khuulekelesa nga umuundu n’aanywa kameetsi.

8Abuya mu lituuli lye baboonaki,

naluundi akeenda ni naabo babaakhola bibiindu biibi.

9Khulwekhuuba niye aloma ari abe umuundu akhaloondelela

kamakaambila ka Wele,

mbaawo sheesi afuunamo ta.

10Ni nashiryo, inywe basaani be kamakhula, ni murekeerese byeesi ise inoma;

Wele s’aanyala wakhola bye bubwoonaki taawe.

Ilala Umunyali uwa byoosi s’aanyala waakhola shishiindu shiibi ta.

1134.11: Zab 62.12Khulwekhuuba niye aliiha buli muundu khuuloondekhana ni biikholwa byeewe,

aliiha buli mutweela khuuloondekhana ni saambo isi ebirisamo.

12Umunyali uwa byoosi s’aanyala waakhola bye bubwoonaki ta;

Wele s’aanyala wabirisa umuundu mu saambo imbi ta.

13Naanu uwa Wele buunyala bweesi ali ni nabwo;

naanu niye uwamuwa bunyala bweesi ali ni nabwo khu shibala?

14Siinga Wele arusa mu muundu kumwooyo kweewe,

naluundi waamurusamo kumuuya kweesi ahela,

15babaandu boosi banyala baafwa,

baryo shaakila beekela lifukhuulu luundi.

16Nga muli ni kamakhula, ni murekeerese bino;

ni murekeerese byeesi ise ndikho inoma.

17Wele alekha khuba ukana bwa ŋali ta,

khali ali umuwuli?

Ari iwe unyala uryeena wekiitsa uyo uuli umukhosefu,

naluundi uuli uwe kamaani ke angaaki?

18Wele niye uwikiitsa bayiinga babaakhola bibiindu biibi;

naluundi ni baraangirisi baboonaki niye ubekiitsa.

19Wele s’aalikho ni khuuloma uri akana baraangirisi khuuminyisa babaandu babaandi ta;

namwe bari akana bayiindifu khuuminyisa abo babaali bataambi ta,

khulwekhuuba niye uwababuumba nibo boosi.

20Babaandu baalala bafwa khaangu busa mu shilo;

mu shilo akari baalala bafuna bihangafu baryo baafwa,

ikhaba abo babaali be angaaki bafwa,

akhuba bari khulwe kamaani ke babaandu babaandi ta,

ne khulwe kamaani ka Wele.

21Khulwekhuuba niye abona buli sheesi umuundu akhola,

naluundi abona buli esi atsya.

22Mbaawo shishiilima namwe shiifwo shisheebisa,

isi baboonaki banyala khukhwibisa babeene ta.

23Khulwekhuuba niye siwaakhalilawo umuundu yeesi imbuka,

isi ali ni khuutsiilamo isi Wele ari nio amukhalile kumusaango ta.

24Seshimwikoombesa niye khuunyoowa khuwentselesa,

bari nio arusewo umuraangirisi mutweela arewo ukuundi ta.

25Ni nashiryo, khulwekhuuba niye nga waamala khaale khuumanya biikholwa byaabwe,

abarusa khu bunyala mu shilo, waabaminiaangula baawawo.

26Aabakhupila abulafu nga buli mutweela abona waabamalila aasi

khulwe bubwoonaki bwaabwe.

27Aakhola shino khulwekhuuba baamwantsukha niye,

naluundi sibaalondelela kamakaambila keewe ta.

28Babirisa bataambi buubi shaakila bakuukuula isi Wele,

bari abawe buyeeti;

ilala Wele waawulila kamalilo kaabwe.

29Siinga akhalawo waasila busa, naanu unyala khuumwikiitsa?

Namwe waakhalawo webisa khukhwaama khu baandu, naanu unyala khumubonakho?

Mbaawo unyala khuumubonakho, ikhaba umuundu namwe linaambo ta.

30Mbaawo aba sheesi kamanaambo kanyala khuukhola,

khukhwakamisa umuraangirisi yeesitsana khuubamiinikhilisa ta.

31Khulwekhuuba mbaawo uwaalomelakho Wele ari,

Wele iwe wambeele ise shitaambiso shishiimala,

siingane niileyo khuukhola bibyoonako luundi ta.

32Iwe waalomelakho Wele ari, iwe n’uuntsokese bibyoonako byeesi ise ikhola?

Naluundi waakhalawo uri singene wiileyo ukhole bye bubwoonaki luundi taawe?

33Khukhwaama nga iwe n’uukhaandisa byeesi Wele akhola,

iwe wambaasilisa uri niye anyala khuukhola byeesi iwe ukana?

Khulwekhuuba iwe niye uli ni khuukhalawo, akhuba ise ta;

iwe ari kanikha ukhuboolele ifwe byeesi wambaasa.

34Uyo yeesi uuli ni kamakesi kane anomele ise,

naluundi abo babaali be kamakhula babawulila byeesi ise inganikha kane balome bari:

35“Yobu alikho akanikhila mu khulekha khumanya ta,

ni tsiilomo tsyeesi aloma sitsilimo itsamu ta.”

36Ise nikoomba indi khali Yobu bamuwotsesele khukhwoolisa kumusaango ni kwaakamayo,

khali muboone muri akanikha nga umuundu uli umwoonaki.

37Khulwekhuuba khu bumiinyi bweesi niye ali ni nabwo,

alooselakho busa bibyoonako,

naluundi eloosela busa khuukhaandisana ni nafwe.

Afwotsola Wele naluundi s’akamisa khuukhaandisana ni naye ta.