Swahili Bible2

33

Elihu alomela Yobu khuureka kamaru arekeerese buulayi

1Ne ari, Yobu iwe reka kamaru, urekeerese byeesi ise inoma;

urekeerese byoosi byeesi ise intsya khuloma.

2Bona, ari ise ndi khuutsya khukanikha;

indi khuutsya khukhuboolela iwe tsilomo tsitsiili mukhanwa mwase.

3Kumwooyo kwase kwaamanyile buulayi kuli ise inganikha byeesi imanyile,

naluundi ise byeesi inganikha bili bya ŋali.

4Umwoyo uwa Wele niye uwamuumba ise,

naluundi umwoyo uyo uw’Omunyali uwa byoosi, niye uwuumba ise buulamu.

5Nga abe iwe waanyalile, n’untsilemo;

yiirekekha buulayi, ube umunyindaalifu wiwotsekho.

6Bona, iwe ni nase mu moni tsya Wele khuli shitweela busa;

ise nase nabuumbibwa khukhwaama mu liloba nga iwe.

7Ni nashiryo iwe s’uunyala waabakho ni khuurya isi ise ta;

ise siingane imbe ni kamaani kamakali khuukhuminyisa iwe taawe.

8Ilala, ise naawuliile ibyo byeesi iwe ukanikhile,

ise naawuliile tsilomo tsyeesi iwe ulomile.

9Iwe uloma uri, “Ise siindikho ni kumusaango ta;

mbaawo shiibi shoosi sheesi ise nakhola ta.

10Ne Wele aweentsa she khukhwihambilisakho bari nio antsibwakale ise,

ambirisa ise nga umusiku weewe.

1133.11: Yob 13.27Awaamba bikele byaase wabibowa ni kiminyololo,

naluundi emenielesa buli sheesi ise ikhola.”

12Ne khayo ise ikhuboolele: Yobu, mushino iwe s’uuli uwa ŋali ta;

Wele ali uwe angaaki khuuminyisakho umuundu yeesi.

13Khulwashiina kila iwe ukhaandisana ni Wele,

khulwekhuuba bari sewakhwiililemo byeesi iwe uloma ta?

14Khulwekhuuba Wele akanikha tsifuunda tsiingali busa,

ikhaba nga mbaawo umuundu yeesi uwinaanayo byeesi aloma ta.

1533.15: Yob 4.13Akanikhila mu marooro, mu bye khuubonekhelwa mu shilo,

waakanikhila mu baandu nga bali mu lilo lye kamaani,

naluundi waakanikha nga bali khu bulili bawungukhila.

16Musaambo itsyo akila babaandu baamanya sheesi aloma,

musaambo itsyo khuureewura khuno khwabareerera nibo khuurya.

17Wele aabakanikhayo ari nio baakamise bibyoonako byaabwe,

naluundi ari bakhekyela babaali ni khukhwiniinisa angaaki ta.

18Aryo, aba alikho awonesa umuundu khukhwaama imakoombe,

waakila umuundu uyo waalekha khuufwa ta.

19Luukana Wele aleekela babaandu nga abirira mu butsiina bweesi baba ni nabwo,

bubuukila kimibili kyaabwe kyaaba nga kitsiinikha.

20Shikila ni kumwooyo kwaaloba bye khuulya,

abe byaakhaba biilayi birye, kumwooyo kubiwayo.

21Kimibili kyaabwe kiwetsekhelela busa kyaawawo,

waakila kamakuumba kaabwe abe kaakhabonekha ta, keereka busa.

22Buulamu bw’omuundu lukanile buutsya bwoolela ilala imakoombe,

woolela ilala aambi ni khuufwa.

23Luukana inyala yaabayo malayika, nga ali mutweela khu baakaanisi ba Wele,

unyala waatimiilila umutsiina khuumuyeeta,

waamushebusa bibiindu ibyo byeesi ali ni khuukhola.

24Khulwe shiisa, malayika uyo anyala waaloma, umuundu uyo baamukaangulula.

Shino shiba shiwonesa umuundu uyo khuulekha khukhwiikha imakoombe ta.

Khulwekhuuba malayika waamusikuule khukhwaama mu byeesi alimo.

25Kumubili kw’omuundu uyo kwiilayo bushaakha kwaaba nga kw’omusoleeli,

weelayo wekela nga n’aaba nga ashiili umuhele.

26Nio lwanyuma uli umuundu uyo aloomba isi Wele,

Wele waakaanila khuuloomba khweewe.

Khulwekhuuba Wele eyakhila babaandu bibyoonako,

khulwe buwonesi bwaabwe.

27Shino shikila umuundu weekhoya nga ali mu lituuli lye babaandu, nga aloma ari:

“Ise naba umwoonaki, naakhola bibikhali biilayi taawe,

ne bona ari Wele waayintsiyakhila.

28Wele wambonesile ise khuutsya i makoombe,

ise naaramire nga ishiili umulamu.”

29Bona tsifuunda tsiingali,

Wele akholela babaandu bibiindu biikali naabi.

30Awonesa buulamu bw’omuundu khuulekha khutsya i makoombe ta,

aryo waamuwa kumwikhoyo kwe khuuramawo nga ashiili umulamu.

31Yobu, ari iwe rekeeresa byeesi ise ndikho inoma;

iwe sila busa, urekeerese byeesi ise inganikha.

32Noola uliyo ni she khuukanikha, n’untsilemo;

iwe kanikha, khulwekhuuba ise ingana imbone indi, iwe s’uulikho ni kumusaango ta.

33Ne nga ta, iwe rekeeresa byeesi ise inoma;

iwe sila busa urekeerese ise ikhuleekele iwe bibiindu bye kamakhula.