Swahili Bible2

32

Tsiinganikha tsya Elihu

(32.1—37.24)

1Ni nashiryo, basaani bataru bano baakamisilawo khuukhakakho khuwoyawoya Yobu, khulwekhuuba abe niye umweene weyokesanisile nga umuundu ukhalikho ni kumusaango ta. 2Lwanyuma umusaani umuhele abe uwaba nga weemikhile aambi, liirima lyaamuwaamba waalekha khunyalisa khukhwiloosela khukhwikhalilikha khuurekeeresa ta. Liirima lyaamuwaambila Yobu, khulwekhuuba niye aabona nga Yobu eyila nga ukhalikho ni kumusaango ta, naluundi nga abiiyisa Wele. Umuhele uyo abe bamulaanga bari Elihu, nga abe ali umwaana uwa Barakeli, khukhwaama i Buzi. Abe bali be shikuuka sha Ramu. 3Liirima lyamuwaambila ni basaale ba Yobu baataru abo, khulwekhuuba abe sibamuyeetile mu byeesi alimo ta, akhali indi abe balikho bamwikiitsa busa. 4Elihu aanyoowa waaliinda khukhwoolisa nga buli mutweela waakanikhile, khulwekhuubeela abe baaramire boosi bamuminya niye mu kimiiko kye buukhulu. 5Lwanyuma Elihu n’abona nga basaani bataru bano sibaayeetile Yobu mu buhangafu bweesi aaba nga alimo ta, liirima lyaamuwaamba.

6Nashiryo Elihu waakanikha nga aloma ari:

Ise ishiili umusoleeli,

inywe mweesi muuminyisa ise buukhulu;

nashiryo imbeelamo ni khukhwikhwekhweesa ni khuurya,

naalekha khubeelamo wangu sheesi ise nambaasa ta.

7Ise niyambaasile naaloma indi, khayo baakhulu banyoowe bakanikhe,

indi khayo abo babaali ni kimiiko kimikali banyoowe bakanikhe bye kamakhula.

8Ne ilala ali umwoyo uwa Wele,

niye uwiikha mu baandu waakila baafuna khuumanya.

9Akhuba bari be kimiiko kimikali nibo babaali bakesi ta,

namwe bari babafuura bukhulu nibo babaamanyile khuukhala kimisaango ta.

10Ni nashiryo, ari ingana inywe murekeerese bibyase;

murekeerese nga ise n’iinganikha byeesi ise nambaasa.

11Mwaboone, ise naarekeeresire buulayi naabi tsinganikha tsyeenywe,

ise imbeele nareekire khukhuru khwase nga inywe ni mubeele

muwayo bibyambaaso byeenywe.

12Ise imbeele narekeeresire buulayi bubweene,

ne ise nabona nga mbaawo namutweela khus’iinywe

unyalisile khukhaandisa Yobu mu byeesi alomile,

namwe umwiililemo buulayi taawe.

13Muli ni khukhwitsiiliilisa mulekhe khuloma muri muli ni kamakhula ta;

nga mwambaasa Wele niye uli ni khukhwiilamo Yobu,

bari khulwekhuuba babaandu bakhaasikhaane.

14Bibiindu byeesi Yobu abeele akanikha,

abeele abakanikhila inywe, akhuba ise ta;

ne ise sinyala namwiilamo isaambo isi inywe mumwiililemo ta.

15Yobu, baataru bano byeesi baloma byaabaweelekho,

ni aluno ari sibaamanyile ni sheesi banyala khukhwiilamo iwe ta.

16Ne ari ise kane niime ano iniinde khulwekhuuba byeesi baloma byaabaweelekho.

Khulwekhuuba nga beemikhile awo busa, nga sibali ni she khuuloma ta.

17Ari, khayo nase imbekho ni sheesi ikwiilamo;

khayo nase ikhuboolele iwe sheesi ise nambaasa.

18Khulwekhuuba ise ndi ni bibiindu biikali bye khuukanikha,

ise siinyala neelosela khuusila busa ni tsilomo tsino taawe.

19Bona, shifuba shase shetsuule tsilomo tsyeesi indi ni natsyo;

shiifuba shikana khukhwaatikha nga busela ni bubiimba bwaara inyuungu

khulwe tsilomo tsyeesi ise ndi ni natsyo.

20Ise ndi ni khuukanikha manya nio naafuna lukoosi;

ise ndi ni khukhwiilamo iwe nga inganikha tsilomo tsino.

21Mu khukanikha khwase siingane niikhupile luubeka lwoositsana ta,

namwe ise intsililile khuruuya umuundu yeesi mu biikhalimo ta.

22Ise sinaamanya khuruuya umuundu yeesi mu biikhalimo ta,

naluundi n’iikhola isho, Wele anyala waamba shitaambiso mu khaangu naabi.