Swahili Bible2

30

1Ne ari abo babaashiili basoleeli khukhuuminyisakho ise,

bantsekhelela ise busa nga baandekelesa.

Ba paapa baabwe baaba nga sibalimo ni kumukaso ta,

nga abe ise s’iinyala naabarawo khuuyeeta tsiimbwa tsyase mu khuliinda kamasheese ta.

2Abe bali bisaanisaani busa bibikhali ni kamaani ta,

nga sibinyala byaakhola ni kumulimo kwoositsana taawe.

3Abe bali bataambi naluundi abe bamenya muuntsala,

beyaangala busa, nga mbaawo khoosi kheesi bewaambakho taawe.

Ikhaba mu shilo abe intsala ibaliila ibulafu, mwiirome.

4Abe bakhuula bisaala bye mu mubiimbi baabilya,

abe baalya ikhaba tsiindi tsye kimisaala kikikhaŋaaha ta!

5Abe buli isi batsya babaandu babatimisa nga babawotselela,

baaba busa nga babaawotselela babiifwi.

6Abe kamatila mweesi kameetsi keekhila mwaayikela tsiingo tsyaabwe,

ni mu malowo ke mwiiloba ni mu mabaale.

7Abe basamila mwiirome nga tsiisolo,

nga bebuunga atweela mu bifwokonyo bari nio bafune buukhafu.

8Nga bali bisaanisaani busa bibiikhalimo itsamu ta,

nga baabitimisa khukhwaama isi babaandu bamenya.

9Ari babaana be babeene abo nibo babaantsekhelela ise,

baryo baantsikesa ise kumweenya;

mu moni tsyaabwe ise neekela sheesi batsekhelela busa.

10Baantsibebeeha ise, naluundi sibakana bantsitsa aambi ta;

nga bamboonekho baafuutsila ni kamare.

11Khulwekhuuba Wele waakholile ise khuulekha khuuba ni kamaani ta,

naluundi khuulekha khuba ni buyeeti bwoositsana ta,

bashuukhila ise nga bantsokesana liirima lye angaaki.

12Liipupu lye babaandu bano liintsibwakala ise ni kamaani;

lyaakila ise naatima ni kamaani;

baantsibwakala ise nga bakhakakho bari baantsire.

13Batsya bebuulila khu ntsila yase nga bakana bari bantsire ise,

yalekha khuubawo ikhaba na mutweela khuubakhaangabisa ta.

14Beetsa mu bukali nga babahaatuniile mu lumako;

baangwakho mu bukali baamaamiile ise.

15Shino shikila kamariiso kamaamba ise;

shiriifwa shase shakoorawo busa nga sheesi imbewo iwuutsile,

ni buyiindifu bwase nabwo bwaakoraanawo busa nga kamafuumbi.

16Ari ise buulamu bwambweelemo ingana khuufwa;

imbuka iye ingunyi yaantsibotokheleele.

17Mu shilo kamakuumba kaase koosi kataanyaka busa khulwe butsiina;

ni butsiina bubuuli mwibili mwase sibuumba ise luukoneele ta.

18Wele waangulukhile ise, waakumiile biikwaaro byase ni kamaani,

wamaamba wantsomiisa nga shikwaaro ni shikhwomiisa muumilo.

19Wele wamwaatile ise mu lutuumbi;

ise naweelemo kumukaso indi busa nga lifukhuulu ni likoshe.

20O Wele, ise ingukuula isi iwe, ne iwe s’uuntsilamo ta;

naluundi ise naakhaloomba, iwe s’untsinaanakho taawe.

21Iwe wantsikaangilekho ulikho umbirisa ise buubi;

iwe ulikho uraambisa kamaani koowo khukhuungubyeenga ise.

22Iwe usuta ise angaaki waakila ikhuungu yambuutsa yaambila;

naluundi iwe ukila ikhuungu yambuutsa ise,

nga ikhuupa iyi ni n’eyi.

23Ise naamanyile indi iwe ulikho umbile ise mu khufwa,

mu shifwo mweesi baalamu ni baafu babuusanila.

24Ne shiina kila iwe wibwaakala umuundu nga ise uweelemo kamaani,

ukhanyala wakhola shishiindu shoositsana ta,

akhali khuloomba ari umuwaambile shiisa?

25Ise yaba imaambila shiisa abo babataambisibwa,

naluundi abe imbaanayo buyeeti isi abo babaali bataambi.

26Ne ise ni nasuubila biilayi khukhwiitsa, naafuna bibiindu biibi;

ni naliinda khuufuna buwaanga, naafuna shishiilima.

27Kumwooyo kwase kuli mu butsiina ni khukhwiyembeelela khuukali;

biifukhu bye kumutaaambo kwase byaatsiile biilondekhana busa.

28Ise ingeendela mu shiilima namukoto, nga mbaawo buwaanga ta;

ise niima khu ngaaki mu lituuli lye babaandu nekoontselela,

nga inoomba buyeeti.

29Liikono lyase lili lye kumutaambo,

naluundi likuukuula lyonyene busa mwiirome,

nga lye ikhiipwe n’inyoofwe.

30Shiikhoba shase shashuukha shaamaliha busa,

naluundi shilikho shoobukha,

ni kamakuumba kaase koshelela busa ni buukhafu.

31Mu shiifwo she khuwulila kimyeenya kye kumwikhoyo nga abe amataayi,

ari imbulila kimyeenya kye kumutaambo ni kamasika kyoonyene.