Swahili Bible2

29

Yobu ekanikhakho ifuunda iseembayo

1Lwanyuma kila Yobu eloosela n’iinganikha yeewe, nga aloma ari:

2Ise nekoomba indi abe uri buulamu bwase bukheelayo bwaaba nga khaale;

bwaaba nga mu mbuka yeesi abe Wele ali niye umuliindi wase.

3Abe Wele ali niye buwaanga bubuumulikhila ise buli esi intsya;

abe niye amulikhila ise buwaanga nga imbira mu shiilima.

4Mu biseela ibyo abe ise ndi buulayi naabi,

abe buusaale bwa Wele nibwo bubutseeta muungo mwase.

5Mu mbuka iyo abe Umunyali uwa byoosi ali ni nase,

naluundi abe babaana baase baayintsibotokhelela.

6Mu mbuka yeesi abe ise ingendela busa mu mabeele kakaama mu byaayo byase,

ni kimisaala kyase kimizabibu abe kitsowa mu liloba liliili lye lulwaanda busa.

7Mu biseela ibyo abe nga ise naatsiile mu mbuusano tsye baasakhalu,

ne khala atweela ni nabo mu shiriimba,

8abe basoleeli nga bamboonekho baantsiberera aleeyi busa,

ni basaakhulu abe beenyukha khu ngaaki khukhuuntsisyamo ise shiriifwa.

9Abe nga baraangirisi balikho bakanikha,

abe banyoowa baasilamo nga ise noolile.

10Babaandu be mu shiriimba babaamanyikhaane abe bayuna busa,

baarama busa nga sibakanikha ta.

11Abe buli uwumbonakho namwe uwumbulilakho,

baanganikhakho biilayi byoonyene.

12Khulwekhuuba abe nga umutaambi welootsile, ise imutimiilila;

abe baafuubi babaakhali n’uubayeeta ta, ise abe imbayeeta.

13Abe ikhaba abo babaali mu mutaambo kwe angaaki kuryeena,

boosi baambuyila ise;

naluundi abe ise ndimiilila banamulekhwa khuumenya mu lukoosi.

14Ise abe imenya mu bukhosefu, naluundi bwayintsibotokhelela;

buulamu bwase bwoosi abe bukeendela mu bwaŋali bwoonyene.

15Abe ise niye uraangirira abo babaali baabofu,

naluundi abe indimiilila abo babaali baaleme.

16Abe bataambi beetsa isi ise busa nga babaana ni batsya isi paapa waabwe,

naluundi abe indimiilila naabi babeetswa nga bakwiile mu bihangafu.

17Abe ise isoolanisa abo babaali ni kamaaya isi bashaabwe,

nabakhanuulakho abe beesi bebwakaale.

18Kila ise nambaasa indi kane imenyewo imbuka indeeyi,

khukhwoolisa n’ifwiila mu makhono ke be muntsu mwase.

19Abe indi uwe kamaani nga kuusaala kukwayila tsiindi tsyakwo,

khukhwoolisa khu meetsi,

nga busheele liime lili khu masaafu kaakwo.

20Abe buli mutweela anganikhakho bibiindu biilayi byoonyene,

naluundi abe indi ni kamaani ke khuukhola kimilimo.

21Abe nga indi khuuwa kamakhula,

babaandu beekhala baliinda, nga barekeeresa

ni khukhwimenielesa khuukali.

22Abe nga ise naakanikhile mbaawo uwiilamo ta;

abe biilomo byase bibanoka buulayi nga ifula ni yiikha mu liloba.

23Abe babaandu baanindiilila ise nga babaaliindiilila ifula;

abe buli mutweela antsakaanila nga umulimi ni akaanila iifula.

24Abe ise nga naamuunamuuniile umuundu,

s’aafukiilisa ta, khulwekhuuba abe sibashisuubila ta.

25Ise abe imbakhalilawo sheesi bali ni khuukhola,

naluundi ise neekhala nga umuwuli waabwe.

Abe ise imbaraangirira nga umuyiinga n’aaraangirira liiye lyeewe,

naaba busa nga uyo uwoleelesa babaali mu masika.