Swahili Bible2

28

Kamakhula kali bye kamakaanga

1Ilala, iliwo liiruumbi ly’eesi baamisamo ifeetsa;

naluundi shiifwo mweesi bapyeelusila izaabu.

2Shiibya ayoni bashilima khukhwaama aasi mu liloba,

ni kopa bamuŋoonela mu mukuba kwe mwiruumbi.

3Babaandu beekha aasi mwiruumbi ni buwaanga,

baatsya bawuunyilisa buli aandu oosi mu liloba aasi,

baalima kuuloba kukuulimo bye kumukaso khukhwaama aleeyi busa.

4Buurwi bubwingila mu liloba babuyaba aleeyi khukhwaama isi babaandu bamenya;

babuyaba mu bifwo isi babaandu bakhatsyayo ta,

babuyaba aleeyi mu shifwo shishikhalimo babaandu ta,

nio beekha naluundi baniina nga baraambisa kimikosi.

5Biilyo bitsowa khu liloba khu ngaaki,

ne aasi we liiloba tsana ilyo,

bakaasuusya busa bibiindu byafwaana nga byeesi kumulilo kwoosha.

6Mu lwaanda luluuli aasi mu liloba,

babaandu banyoolamo kamabaale ke buukusi bwe angaaki;

naluundi liifukhuulu lye mwiloba umwo,

lilimo izaabu.

7Ikhaba ikhosi ipaamburukha mu ngaaki,

siyaamanya isi kumukhoosi ukwo kuli ta;

ikhaba khaanywiinywi khe moni indeeyi iryeena,

sikhakibonatsakho ta.

8Ikhaba tsiisolo tsiindafu tsitsikeenda nga tsiihaasa busa,

sitsyatsyatsakayo ta;

ikhaba italanyi siyatsyatsakayo ta.

9Babaandu beebwakala libaale liliminyisayo khuukhuna baalilima;

baakeyula isi tsiindi tsye tsingoongo tsyaama.

10Balima baakhola kimyaanda aasi mu lwaanda,

baryo baafumbula kamabaale ke buukusi bwa angaaki naabi.

11Bayaba khuunyoola tsiimoni tsye kameetsi,

nio waakila baarera abulafu mu buwaanga

bibiindu ibyo abe bibyeebisa aasi.

12Ne kane kamakhula kanyoolikhaane waahena?

Bye kamakhula kane khubiiyike khukhwaama waahena?

13Kamakhula sikanyoolikhana mu baandu ta;

naluundi mbaawo umanyile buukusi bweesi kakula ta.

14Inyaantsa ni buuleeyi bwe aasi mu nyaantsa biloma biri,

kamakhula sikanyoolikhana mu nibyo ta.

15Mbaawo unyala waakula kamakhula nga araambisa ikhaaba izaabu,

namwe abe akhaareera ifweeza iyoola buusiro buryeena ta.

16Abe waakhapima izaabu ifuurisa buulayi iyaama mu Ofiri,

namwe abe waakhapima kamabaale ke buukusi bwe angaaki kakoola karyeena,

sebinyala byoola buukusi bwe khuukula kamakhula ta.

17Ikhaba izaabu namwe i gilasi indaayi iryeena,

sibyoolela khu makhula ta;

niko kali ke kumukaso naabi khuubiminyisakho.

18Kamakhula kali ke kumukaso kwe angaaki naabi;

kafuurisa ni kamabaale kakaali ke buukusi bwe angaaki naabi.

19Ikhaaba libaale lye buukusi bwe angaaki bari topasi

khukhwaama mu Esiyopiya sikoola khu makhula ta;

namwe sikanyala kalekhaasibwa khu zaabu indaayi iryeena ta.

20Ne ari, aba kamakhula kaama waheena?

Naluundi kamakhula kamenya waheena?

21Mbaawo shibuumbe na shitweela shishinyala shaabona kamakhula ta;

naluundi kaayibisa khukhwaama khuumoni tsye binywiinywi.

22Ikhaba isho shishoonakisa bibiindu ni kamakoombe nabyo,

bifukiilisa biri byaawulilakho busa lukaambo luluwaamba khu makhula.

23Wele yeenyene niye umanyile isi kamakhula kali,

naluundi niye yenyene umanyile isi kamakhula kaama.

24Khulwekhuuba Wele niye abona khukhwaama khundulo khwe shiibala,

khukhwoolisa khuundulo khukhuundi;

naluundi niye abona shiindu shishiili aasi we likulu.

25Mu mbuka isi Wele aweelamo ikhuungu kamaani kaayo;

naluundi isi aakhalilawo buubalaayi bwe inyaantsa.

26Mu mbuka isi aakhalilawo mu bifwo byeesi ifula ili ni khukhuupa;

naluundi isi luuheni ni khukuula khwe ifula bili ni khuuba;

27ni nashiryo nga Wele n’aashibona waakhalawo;

waashiweentsa naluundi waashiirawo mu shifwo shasho.

2828.28: Zab 111.10; Nikh 1.7; 9.10Nio lwanyuma Wele waalomela umuundu ari,

“Bona, khuurya Umukasya, ako niko kamakhula;

n’umuundu uwaakamisa khuukhola bye bubwoonaki,

aba uyo niye uuli ni khuumanya.”