Swahili Bible2

27

Yobu eloosela

1Lwanyuma kila Yobu eloosela n’iinganikha yeewe, nga aloma ari:

2Ise niitsuba mu lisina lya Wele, uyo ulobile khukhuuntsokesanisa ise bwa ŋali,

uyo uuli Umunyali uwa byoosi, ukilile ise naaba ni liirima;

3indi khukhwaama nga ise n’ishiili ni buulamu,

nga ise ishiheela kumuukha kweesi niye umweene aamala khaale khukhuumba ise;

4ise siingane inganikhe ilomo yoosi imbi ta,

naluundi ise siingane inganikhe bye bubeeyi ta.

5Ise siinyala nalomakho nakhafwiiti khari indi byeesi inywe mukanikha bili bya ŋali ta;

ise kane iname nga inome indi s’iindikho kumusaango ta,

khukhwoolisa mu khufwa khwase.

6Kane ise iname nga noomisile buukhosefu bwase,

naluundi indekhe khubururakho ta;

mu mwoyo kwase ise naamanyile nga s’iindikho ni kumusaango kwoositsana ta.

7Khali uyo yeesi uuli umusiku wase naluundi uyo uwusoolanise ise,

afunile shiitaambiso nga sheesi bawa abo babaali

baboonaki ni n’aabo babaakhali bakhosefu ta.

8Khulwekhuuba uyo ukhesaaya Wele ta, naye aba ashisuubila shiina,

nga Wele waakhalilewo khukhwaakamisa buulamu bweewe?

9Nga bihangafu byamukwiilekho,

Wele anyala warekeeresa khukhwilootsa khweewe?

10Anyala wanyoola kumwikhoyo m’uyo uuli Umunyali uwa byoosi?

Anyala welootsela Wele imbuka yoosi?

11Khayo ise ikhuleekele iwe bibiwaamba khu bukali bwe kamaani ka Wele;

ise singane ikhubise iwe bibiwaamba khu Wele, Umunyali uwa byoosi ta.

12Ne bona, she ikhabi indayi inywe mweesi mwayibonelakho;

ne ari shiina kila mukanikha ibyo bibiikhalimo itsamu ta?

13Iyo niyo isaambo yeesi Wele awamo baboonaki shiitaambiso;

ukwo kuli nikwo kumusheemba kw’aabo babaali be biituluungu isi uyo Umunyali uwa byoosi.

14Abe akhasaala waaba ni babaana basooleli baakali,

ne boosi bafwiila mu busoolo;

naluundi babaana beewe sibabatsakakho ni biilyo bibibamala ta.

15Abo babawona busoolo bafwa khulwe tsiifu tsiimbi naabi,

ni banamulekhwa baabwe sibabalila na khubalila ta.

16Umwoonaki abe akhaba nga ali n’ifeetsa ingali,

ni bikwaaro bibimutuuma buukali;

17ne ikhaabewo umuundu umulayi niye ukhaakwaare bikwaaro ibyo,

ni n’ooyo ukhalikho kumusaango ta niye ukhaayile feetsa iyo.

18Intsu yeesi umwoonaki ombakha asakalasaka busa nga shiiswi she khanywiinywi;

ili busa nga liisari ly’ooyo uwaayisa bibyaayo.

19Atsya khuukona aasi nga ali umuyiinda,

ne iba ifuunda iyo yoonyene;

khulwekhuuba atsya khusiisimukha buyiindifu bweewe buba bwaawelewo.

20Kamariiso kamwibwakala kaaba busa nga kameetsi kakaasalasala;

uri mu shilo ikhuungu iye kamaani imuwuutsa yaamuyila.

21Ikhuungu iye kamaani khukhwaama ibwaamanyaanga imuwuutsa yaamuyila;

imuyila yaamurusa khukhwaama mu shifwo sheesi alimo.

22Ikhuungu iyo imuwuutsa ni kamaani akhali khuusaasila khwoositsana ta;

yaamuyila nga alikho akhakakho khuutitukha atsye.

23Nga alikho atima, ikhuungu iyo imuwuutsa ni kamaani,

yaamuriisariisa khuubirira mu maani keesi yoonakisilamo bibiindu.