Swahili Bible2

26

Inganikha iya Yobu

1Kila Yobu amwiilamo nga aloma ari:

2Ne ari ise ukhali ni bunyala, iwe wambaasa uri byeesi ulomile byanjeetile?

Ne ari ise ukhali ni kamaani, iwe wanjeetile musaambo shiina?

3Nga iwe waakhakilekho khukhuumba ise kamakesi koowo!

Nga iwe waakhakilekho khukhuumba ise umusilu kamakesi ke angaaki!

4Iwe wambaasa uri byeesi ulomile, ubilomeele naanu?

Namwe byeesi ukanikhile, ubikanikhile mu lisiina lya naanu?

5Kamaani ka Wele kakila abo babaafwa khaale baatsya imakoombe

baanikina khulwe khuurya khuukali;

kameetsi ni n’eebyo bibikamenyamo byoosi, binikina khulwe khuurya khuukali.

6Mu moni tsya Wele, shiibala she makoombe shili abulafu busa,

shili khwaasye busa;

mbaawo shishimukhingilila niye khuubona bibiilimo taawe.

7Wele niye uwabayuula likulu mu ngaaki,

naluundi wasuunga shibala mu libaanga busa.

8Wele umweene niye uwabusaasila ifula mu mafuumbi,

yalekha khubawo kamafuumbi kakaafwiilila khulwe buusiro ubwo ta.

9Wele umweene niye uraambisa kamafuumbi,

wabiimba khu mweesi kwalekha khubonekha ta.

10Umweene niye uwarawo lulwaakha khu meetsi khu ngaaki,

naluundi waarawo lulwaakha akari we buwaanga ni shishiilima.

11Nga niye wakhookheele kimisiindi kikiitikiya liikulu,

kiterema naluundi kyaanikina khulwe khuurya khuukali.

12Khulwe bunyala bweewe, alakila waakila inyaantsa yaayuna busa;

naluundi khulwe kamakhula keewe, anyalisa khukhwiira kuusolo Rahabu.

13Khulwe khuheela kumuuya kweewe waakila liikulu lyaayuna busa;

ni khuuraambisa kamaani keewe waakila niye weera kuusolo

abe kukwaba kutitukha ate nga kukukheerikha ta.

14Ne nga walekhaasile khu maani keesi niye ali ni nako,

bino bili bibiindu bifwiiti naabi;

bili busa bikyeekhe nga umuundu n’aali khuumoonya!

Ne naanu unyala wofwaasila ilala bunyala bwe kamaani ka Wele?