Swahili Bible2

24

1Shiina kila Umunyali uwa byoosi akharawo imbuka iya buraawa,

iye khuukhalilakho kimisaango?

Naluundi shiina kila abo babaali babaakanisi beewe,

bakhanyala baamanya byeesi niye ali khuutsya khuukhalawo ta?

2Babaandu bakhuula basyeenda kamasiintsi bari nio bafune liiswa liikali;

naluundi banuula kamasheese khukhwaama mu mataala ke bashaabwe,

baakayila mu mataala kakaabwe.

3Batsya banuula tsisikilya tsye baafuubi,

naluundi bawaambiliila iyeeyi iya namulekhwa khukhwoolisa nga waasasuule liikobi.

4Bamiinikhilisa bataambi;

waakila bataambi boolisa khuutima khuutsya khukhwiibisa.

5Ni nashiryo bataambi bamenya busa nga tsiisolo tsye mwiiswa;

khulwekhuuba batsya khukhwiheentsela bye khuulya khukhwaama

busa mu mubiimbi;

iyo niyo isi bawentselesela bye khuulya bari nio baliise babaana baabwe.

6Bawentselesa busa bye khuulya khukhwaama mu mikuunda kye babaandu babaandi;

naluundi baangalisa busa kimizabibu khukhwaama mu mikuunda kye baboonaki.

7Mu shilo umutaambi akona bukhuna nga mbaawo sheesi ebiimba taawe;

mbaawo sheesi bebiimba khuukhiisa imbewo ta.

8Ifula iyiipa khukhwaama mu bikiingi yoosi ibaweelakho,

naluundi khulwe khuutaamba tsiingo, beekama khu lwaanda.

9Baboonaki banuula baafuubi batsweenge nga bashinuuna;

baayila babaana be bataambi khuubawaambiilila khulwe liikobi.

10Bataambi bakyeenda bukhuna akhali shikwaaro ta;

ikhaba nga balikho bakyeesa iŋaano, ne nibo baaba nga bali n’iintsala.

11Baasuura kamafura khukhwaama mu misaala kimi oliva,

n’iindali khukhwaama mu mizabibu,

ne shitweela busa nibo babeene baarama nga bali intsala.

12Abo babaamenya mu shiriimba belootsa khulwe kumutaambo kumukali,

buulamu bw’aabo babaali khuufwa bwilootsa nga buweentsa buyeeti;

ne Wele s’enaanayo isi khuuloomba khwaabwe ukhwo taawe.

13Iliwo abo babaaminyaalila khuuloondelela buwaanga

nga sibenaanayo khuuloondelela byeesi Wele akana ta,

naluundi sibatsiila khu byeesi niye aloma ta.

14Abo babeera bashaabwe beenyukha baatsya kumuusi,

baatsya beera bataambi;

uri mu shilo baatsya beeba bya beene.

15Abo babaakhola bye buyeyani bawuuna mu mamilimili,

nga bambaasa bari mbaawo ukane ababone ta;

ni nashiryo bebiimbilila mu moni bari ilekhe khubayo unyala waabamanya ta.

16Mu shilo baba balikho bafuna tsiintsu tsyabeene bari nio beebe bibiilimo;

uri antsye busha baatsya beebisa,

baalekha khumanyakho bye kumuusi nga ni bifwaana ta.

17Khulwekhuuba khu nibo shishiilima shili busa nga kumutishinyi;

khulwekhuuba nibo sibarya ikhaba shishiilima namukoto ta.

18Kameetsi kaketsuule kasalasala keekhisa baboonaki;

ni Wele waamala khaale khuutsuba liiloba lyeesi bamenyamo;

sibasiitsya mu mikuunda kyaabwe khuulima mu mizabibu taawe.

19Musaambo yeesi buukhafu ni siimiyu bikila bunyifu bwaakorawo,

niyo isaambo nyene indweela

isi baboonaki bafwa baakorawo khukhwaama khu shibala.

20Ari ikhaba ni ba maayi baabwe babeene sibashibashebulila ta;

biiwukha byaabalya naluundi baayonakisibwa

bali busa nga kimisaala kikyabola kyaakwa aasi.

21Shino shikholikha khulwekhuuba babirisa buubi bakhasi bakuumba,

nga mbaawo shilayi shoosi sheesi bakholela namulekhwa ta.

22Nga Wele waakhalilewo khulwe kamaani keewe,

umwoonaki ali ni khuufwa.

23Wele abawa nibo khuumenya mu lukoosi, naluundi waabayeeta;

ne nga abemenielesa mu buli byeesi bakhola imbuka yoosi.

24Baboonaki baniinisibwakho angaaki baafuna shiriifwa mu mbuka ingeekhe iri;

ne khaangu akho baniaala busa nga kumusiru,

baniaala busa nga shiilimwa sheesi baremire khukhwaama khu shisina.

25Noola seshili shiryo ta, naanu unyala wakhaandisa byeesi ise inoma?

Naanu unyala waaloma ari byeesi ise inomile bili bye bubeeyi?