Swahili Bible2

22

Tsiinganikha tsye ifuunda ikhola khataru

(Tsisuula22.1—27.23)

122.1: Yob 35.6-8Kila lwanyuma Elifazi abe uwaama i Tema, elamo nga aloma ari:

2Umuundu anyala waaba uwe kumukaso isi Wele?

Ilala, uyo uuli umukesi aba uwe kumukaso isi niye umweene.

3Iwe n’uuba nga uli umukhosefu, Wele ashifunamo shiina?

Namwe iwe nga webirisire buulayi, Wele afunamwo shiina?

4Iwe wambaasa uri bari khulwekhuuba wisaaya Wele kila niye akhwikiitsa,

naluundi kila niye akhukhalila kumusaango?

5Seshili shiryo ta. Akhali ndi bubwoonaki bwoowo bukali nibwo bubukila;

khulwekhubeela bubwoonaki bwoowo bwiloosela busa akhali intsakamo ta.

6Khulwekhuuba iwe wamiinikhilisa balebe boowo baakhuliya abe byeesi ukhababaantsa ta,

naluundi iwe waabarusakho bikwaaro byaabwe waabalekha nga bali bukhuna busa.

7Abo babaali buulesa iwe siwayinaanayo khubawa kameetsi ta,

ni n’aabo babaali intsala iwe siwayinaanayo khubawa she khuulya ta.

8Iwe waayila liloba lyoosi bari khulwekhubeela uli uwe kamaani;

iwe ulimenyamo lyoosi khulwekhubeela uli uwe shiriifwa.

9Nga banamulekhwa bakhwiitsileyo isi uli iwe s’uukana waabayeeta ta;

naluundi iwe wanuula bibiindu bye baafuubi.

10Ni nashiryo ari iwe kimireko kyaakhwibotokheleele,

naluundi lubaluba, bona iwe kamariisyo kaakhuwaambile.

11Shishiilima shaakhubiimbiliile iwe ari s’uunyala ni khuubona ta;

ni kameetsi kakaasalasala kaakhubiimbiliile iwe.

12Wele amenya mwiikulu mu ngaaki;

ne ikhaba nga tsinieniesi tsili mu ngaaki,

ne niye atsiloleelela nga shishiindu shishiili aasi eewe.

13Ni nashiryo iwe wireeba uri, “Wele naye waamanya shiina?

Niye waayibisa angaaki e kimifuumbi kimimali, akhukhalila musaango shiina?”

14Mwambaasa muri kimifuumbi kimimali kimukhiisa waalekha khubona ta;

naluundi akeenda nga ebotokhelela busa mwikulu mu ngaaki.

15Iwe waakhaliilewo ilala uri kane uloondelele intsibirisa

yeesi babaandu baboonaki beebirisamo?

16Ikhaba nga abe imbuka yaabwe ishiili khukhwoola ta;

babeeya baabarusilawo ilala ni tsiindi tsyaabwe tsyoosi.

17Baalomela Wele bari, “Ifwe khulekhe khube,”

naluundi bari, “Shiina sheesi umunyali wa byoosi anyala khuukhukholakho?”

18Ne shitweela busa Wele niye uwabawa nibo bye buyiindifu;

ise s’iinyala naamanya intsambaasa iye baboonaki ta.

19Babaandu baalayi babona shino nga ni shili batsekha busa;

abo babaakhalikho kumusaango ta, batsekhelela baboonaki nga baweebwa shitaambiso.

20Nga baloma bari, “Ilala, baasiku beefwe ari boonakisibwile,

ni kumulilo kwoshele bibiindu byaabwe abe bibiraamiirekho.”

21Ni nashiryo ari Yobu,

iwe fukiilisana ni Wele nio umenye mu lukoosi,

nio lwanyuma iwe ufune tsiikhabi tsye khuuba ni bibiindu biilayi.

22Iwe fukiilisa indeekela iyaama mukhanwa mweewe;

ushebulilatsake biilomo byeewe mu mwooyo kwoowo.

23Iwe siinga wiisamo buusaale ni Wele umunyali uwa byoosi luundi,

naluundi iwe wewosa mu moni tseewe;

Iwe siinga waakamisa bye bubwoonaki bibiili mu be muntsu yoowo,

24siinga iwe uyila bye buyiindifu nga shishiindu shishikhalimo kumukaso ta,

utsye umwaate izaabu yoowo mu mukhuururo mweesi kameetsi kaabiratsakira amataayi,

25Umukasya, Umunyali uwa byoosi ekele niye she buyiindifu shoowo,

niye abe she ifeetsa yoowo isi iwe uli ni nayo;

26Nio kane iwe unyoole kumwikhoyo kwoowo mu Wele Umunyali uwa byoosi,

naluundi nawe kane ukholakane ni naye mu mwooyo kumulayi.

27Kane uri iwe umuloomba, akhuwe iwe sheesi uloombile;

naluundi kane iwe woolelese ibyo byeesi iwe wasubisa khuukhola.

28Buli sheesi iwe ukhola kane shikhutsiile buulayi,

naluundi ni buulamu bwoowo kane bube buulayi.

29Khulwekhuuba abo babeyiinga, Wele abakhweesa waabeesa aasi naabi;

ne niye awonesa abo babewombeekha.

30Wele ayeeta abo babaakhalikho kumusaango ta;

abayeeta khulwekhubeela bakhola bibiindu bibiili biilayi.