Swahili Bible2

21

Inganikha ya Yobu

1Nio lwaanyuma lwayo Yobu weelamo nga aloma ari:

2Rekeeresa buulayi bubweene tsilomo tsyeesi ise ndi khuutsya khukanikha,

khayo tsibe nitsyo tsitsibeesamo inywe kamaani.

3Intsikhaliilikhe ise inganikhe,

nio lwanyuma lwayo nga mwaakanile mufwotsole byeesi ise inomile.

4Inywe mwambaasa muri khukhwilootsa khweesi ise ndikho niilotsa,

indikho niilootsela umuundu busa uuli nga ise?

Ise ndi ni shitsiilililwa shishikila ise naalekha khuuba ni khukhwikhaliilikha ta.

5Nga mwandoleeleele ise, inywe seshibeyaangisa,

mwarama nga mwaasamiliile busa ta?

6Ise nga nambaasile khu biindu bibyaakholikhakho,

kamariiso kamaamba, neyembeelela naluundi naaterema busa.

7Shiina kila Wele alekha baboonaki khuubawo,

baamala kimiiko kimikali, naluundi baaba ni buyiindifu buukali?

8Baba ni lisaaye liikali,

litsowa lyaabalaaha nga baaboone.

9Tsiingo tsyaabwe tsimenya mu lukoosi,

akhali khuurya khwoositsana taawe,

nga sibeyembeelelakho shitaambiso khukhwaama isi Wele ta.

10Ate shitweela busa, bibyaayo bisaala byaabalaaha,

yaalekha khubawo ikhaafu yoosi ikamaya taawe.

11Babaana baabwe bakyeenda busa nga bibyaayo byeesi balekhuulile,

benyaha akhali bihangafu ta.

12Beemba kimyeenya kikitsiilakho kimilele ni bye khuusakayisa,

naluundi beekhoya nga bashina khulwe kamakono kakaama

khu bye kimyeenya byeesi bafuura busa.

13Babaana baabwe bamenya buulamu bwaabwe mu bye buyiindifu,

naluundi bafwa baatsya imakoombe nga imbakhutaambisibwakho ta.

14Baboonaki balomela Wele bari, “Ifwe khulekhe khube!

Ifwe sikhwikoomba khuumanya byeesi iwe uleekela ta.

15Umunyali uwa byoosi ali niye naanu, n’eefwe khube babaakaanisi beewe?

Namwe mafuurisa shiina keesi ifwe khufuna mu khumwisaaya niye?”

16Nibo beyiinga bari bye buyiindifu byeesi bali ni nabyo byaama mu maani kaabwe kameene;

ne ise s’iinyala naafukiilisa khuuloondelela kamakhula ke baboonaki ta.

17Tsifuunda tsiinga tsyeesi buwaanga bw’omwoonaki busima,

bwaalekha khumulikha ta?

Buhangafu bweesi bandyaakhiile khuufuna, buboolakho namwe ta?

Namwe Wele nga liirima lyaamuwaambile, abawakho nibo shitaambiso?

18Khayo beekele busa nga kamakhalaamba keesi imbewo iwuutsa,

babe busa nga likhuutsi lyeesi ikhuungu iwuutsa yaayila.

19Iwe uloma uri, “Wele waabiikhila babaana b’omwoonaki shiitaambiso,

shishaandibeele sha paapa waabwe”;

Taawe, khayo Wele awe umwoonaki umweene shitaambiso sheewe,

amwokesanise ari afuna shitaambiso khulwe bubwoonaki bweewe.

20Khayo umwoonaki umweene etwiikhe shitaambiso sheewe;

khayo umweene ekhaliliikhe liirima lya Wele, Umunyali uwa byoosi.

21Khulwekhuuba naanu uwinaanayo khu biikholikha khu baandu beesi alekhawo nga wafwiile,

nga biifukhu byeewe khu shibala byaaramire bikyeekhe biri?

22Wele niye ukhalila ikhaba babaali angaaki kimisaango;

manya iliwo umuundu unyala waleekela Wele bye kamakhula?

23Babaandu baalala bafwiila mu buyiindifu bwe kamaani,

nga bali buulayi, mbaawo shishibataambisa ta.

24Baba nga bali baakhomefu,

naluundi kimibili kyaabwe kyayitsula kamafura.

25Yabawo babaandi babafwiila mu mutaambo,

nga sibabatsakakho ni kumwikhoyo kwoositsana ta.

26Ne boosi bafwa baabasiikha mwiiloba;

tsinyeende tsyabalya baabola.

27Bona, ise naamanyile bibyambaaso byeenywe,

ni tsimbomelo tsyeesi inywe mulikho muukhalila ise.

28Khulwekhuuba inywe mureeba muri, “Shikuuka sh’omuundu uwe angaaki ari shili ali eena?

Intsu iyaabo babaakhola bubwoonaki ili ali eena?”

29Inywe simwareebirekho abo babaakyeenda tsiŋeendo ta?

Inywe simwaamanya kamakhuuwa keesi bareera khukhwaama ibweene iyo ta?

30Khulwekhuuba khu shifukhu khweesi Wele aweelakho babaandu shitaambiso,

umwoonaki niye busheele urama nga s’aalikho ni buwaangafu ta.

31Mbaawo umuundu utsuntsumilisa umwoonaki,

namwe waamwilihaasa ibyo byoosi byeesi aamala khaale khuukhola ta.

32Nga baamalile khuusiikha umwoonaki,

babaandu baarama nga bebuulila khu ŋani yeewe buulayi.

33Liiloba lye mu ŋani limukwakho niye mbola busa;

babaandu babuusana mu bukali khuutsya khuumusiikha,

batweela bamwinyoowa ibweeni babaandi baama inyuma.

34Ne ari inywe mwiitsa muryeena khukhuusaasila ise ni tsilomo tsitsikhalimo itsyo ta?

Byeesi mulikho mukanikha byoosi bili bye bubeeyi byoonyene.