Swahili Bible2

20

Inganikha ya Zofari

1Nio lwanyuma lwe biilomo ibyo, Zofari abe uwaama i Namasi weelamo nga aloma ari:

2Khulwekhubeela bibiindu byeesi iwe ukanikhile

byaantsiinisile naabi kumwooyo,

ise ingana khukhwiilamo.

3Byeesi iwe ulomile bili busa biilomo bibikhomyaasa,

ne ise naamanyile isaambo iye khukhwiilamo.

4Ilala, ilala, iwe washimanya buulayi bubweene uri,

khukhwaama nga umuundu n’abuumbibwa wareebwa khu shibala,

5umwoonaki aba ni kumwikhoyo mukyeekhe kuri,

naluundi khusangaala khw’omwoonaki sikhumala imbuka indeeyi ta.

6Abe umwoonaki akhaleeha woola mu ngaaki,

naluundi kumurwe kweewe kwaatsya kwoola mu mafuumbi,

7ne naye akhaakoraanewo busa nga lufuumbi,

abo abe babaamubona bakheyaange busa nga bereeba bari,

“Waatsya waahena?”

8Umwoonaki akoranawo busa nga kamarooro ke mu shilo,

waalekha khubonekhakho luundi ta;

bamutimisa waakoraanawo nga kamarooro ni kakoraanawo.

9Abo abe babaamubonatsakakho sibeelamo khuumubona luundi taawe;

namwe s’elakho waamenya mu shifwo sheesi abe amenyatsakamo ta.

10Babaana b’omwoonaaki balitimaka isi abo babaali bataambi bari nio bafune buyeeti;

naluundi balikhakakho balihe ibyo byeesi baanuula khukhwaama khu bataambi.

11Kimibili kye bataambi abe kyaayitsulamo kamaani,

ne aambi ari kili aambi khukhwikela lifukhuulu.

12Ikhaba nga niye shimuŋaayila khuukhola bye bubwoonaki,

weloosela khuubikhola nga umuundu uulya shishiindu shishimunuliile,

13ikhaba nga enonesa waalekha khukana ari shiwewo ta,

waarama nga waashikukhuliile mukhanwa mweewe,

14ne shitweela busa uri biilyo ibyo byoola muunda mweewe,

byeekela bibiiluluwile;

byaaluluwa byaaba busa nga indulwe inyene.

15Umwoonaki ali ni khuukhaasa bye buyiindifu byeesi amala khaale khunuula;

Wele abibukula ikhaba khukhwaama muunda tsyaabwe,

waabiisilayo babeene baabyo.

16Byeesi umwoonaki elolopa bili busa nga buutwa bubweene;

khulwekhuuba bimwiira khaangu busa nga butsiba bwe indemu.

17S’aamenyawo buulamu buuleeyi khukhwoolisa waabona biilayi bibyaama mu mikuunda,

namwe waabona liikesa liikali lyeesi bafuna ta.

18Ali ni khuulekhuulila babaandi bibiindu byeesi niye umweene

aamala khaale khuutitikhanila,

niye umweene alekhe khubilyakho ta;

naluundi niye mbaawo sheesi akhalyeekho khukhwaama

mu mafuurisa ke bibiindu byeesi akulaanamo ta.

19Shino shili khulwe khumwiikhilisa

naluundi khuulekha khukhwiinaanayo isi bataambi ta,

nga yaaba akulukhila busa tsiintsu tsyeesi babaandu babaandi boombashile,

waatsimenyamo.

20Umwoonaki singane anyalise khuuwonesawo

ikhaba shishiindu na shitweela mu byeesi ali ni nabyo ta,

khulwekhuuba ali ni kumukhabyo kwe kamaani.

21Nga umwoonaki waaliile shishiindu, mbaawo sheesi aramisakho ta;

ni nashiryo buyiindifu bweewe bwaakamayo.

22Nga woolile mu mbuka isi ambaasa ari ali na buli shitweela,

awo niwo isi kumutaambo kwiitsila;

bihangafu bya buli shikuuka bimwiibwakala byaamwibotookhelela.

23Lekha umwoonaki alye isho shoosi sheesi niye akana!

Ne khulwe liirima liikali, Wele akhaamuwe shitaambiso.

24Ni kane akhakekho ari atitukhe khukhwaama khu basilikhale

babaali ni bye busoolo nga kamafumo;

kane abo babaali ni buyiingo bamulase.

25Buuyiingo bwingila mu mubili kweewe;

bisiintsa bye buyiingo bibimelamela byaroonya busa ni kamafuki,

waakila kamariiso kaamuwaamba niye.

26Buli shishiindu sheesi niye ebiikhisila umweene shonakisibwa;

naluundi kumulilo kukuukhamanyikhaane isi kwaama ta,

kumwoosha niye umweene atweela ni be muungo mweewe.

27Liikulu lyokesana abulafu bubwoonaki bweewe

ni shiibala shiwaanayo bujulisi bubumutsuntsumilisa.

28Khu shifukhu khweesi Wele akhokesanilekho liirima lyeewe,

bakhaasute buyiindifu bwe muntsu yeewe batsye ni nabwo.

29Ukwo kuli nikwo kumukabo kw’omwoonaki khukhwaama isi Wele,

kuli kumukabo kweesi Wele aamala khaale khuumubiikhila niye.