Swahili Bible2

2

Sitaani akhakilisa Yobu luundi

1Ari, aabawo luundi shifukhu shitweela, khweesi babaakaanisi ba Wele baatsya khubonekhela mu moni tsy’Omukasya, ni Sitaani naye weetsilamo, khuubonekhakho mu moni tsyeewe. 2Kila Umukasya areeba Sitaani ari, “Iwe waama wahena?”

Sitaani waamwiilamo ari, “Abe indikho injeenda iyi ni n’eyi, nga indi khuyiya busa khu shibala.”

3Umukasya waareeba Sitaani luundi ari, “Iwe wambaasilekho luundi khu mwakaanisi wase Yobu? Mbaawo umuundu ukuundi khu shibala uuli umwiyikinwa nga niye, naluundi uwibirisa buulayi nga niye ta. Niye antsisaaya ise Wele, naluundi etsiliilisa naabi khuubona ari s’ewaambila mu bye bubwoonaki ta. Ikhaba nga iwe waakila ise naakhufukiilisa iwe khuutsya khumwibwakala akhali ilomo yoositsana ta, niye waarama nga ali umuundu umwiyikinwa naabi.”

4Kila Sitaani elamo Wele nga aloma ari, “Umuundu s’akhola shoosi shishinyalikha nga araambisa bibiindu byeesi ali ni nabyo byoosi, khuuwonesa buulamu bweewe. 5Ne ari iwe yinyusa kumukhono kwoowo, ubekho ni sheesi ukhola khu buulamu bwa Yobu bubweene, noola ubone nga singane akhwikaanile iwe abulafu busa, nga nawe wamweene ubona.”

6Kila Umukasya alomela Sitaani ari, “Mbaawo buubi ta. Ise naamureere mu makhono koowo, ne akhali indi ukhamwiira ta.”

7Nashiryo Sitaani waarura mu moni tsya Wele waatsya, waakhola kumubili kwa Yobu kwoosi kweetsulakho kamaboondo, khukhwaamila khu murwe khu ngaaki khukhwoolisa aasi mu shikhaandakilo. 8Kamakoontsyo kaakila Yobu waatsya weekhala aasi khu libuumbi lye kamaandu, waabukula shikholoontsyo she nyuungu, waarakikha khukhwaakala kamakoontsyo kaatsana. 9Kila umukhasi weewe amutsyayo waamulomela ari, “Ikhaba ari ushiili umuundu ushiyikina Wele? Khulwashiina kila ukhatyaabila Wele waafwa khufuurisa n’uba umulamu?”

10Yobu waamwiilamo ari, “Iwe ulikho ukanikha busa nga bakhasi baasilu ni bakanikha. Uli Wele akhusiindikhila ifwe bibiindu biilayi, khwaabikhoyela. Ne ari khunyala khuryeena khwaamwikiitsa nga bibiindu biibi byeetsile isi ifwe khuli?”

Basaale ba Yobu beetsa khuumubona

11Ari, nga basaale ba Yobu baawuliile khu biindu bino bibyamukholikhakho, buli mutweela waama ingo weewe, waatsya khuumubona. Basaale bano baaba nibo: Elifasi khukhwaama mu shiriimba she Temani, Bilidadi khukhwaama mu shisiintsa shishilaangibwa shiri Shuwa, ni Zofa khukhwaama i Nama. Boosi baafukiilisana bari baakanane batsye bamubonekho, bamusaasile naluundi bamwiisemo kamaani. 12Basaani bano ni baaba nga bashiilikho aleeyikho khukhwaama isi Yobu abe ali, baamubona, ne baalekha khumumanya nga niye ta. Ne ni baashimanya bari niye, khulwe kumutaambo kumukali, baarakikha khuulilila angaaki, bonuula bikwaaro byaabwe, naluundi basaalasaka lifukhuulu mu ngaaki ni khu mirwe kyaabwe. 13Baryo beekhala ni naye aasi khu liloba khuumala biifukhu musaafu ni biilo musaafu, nga mbaawo uloma ikhaba ilomo nandweela ta. Khulwekhuuba baabona nga abe ali mu butsiina bwe kamaani naabi.