Swahili Bible2

19

Inganikha ya Yobu

1Nio lwanyuma Yobu weelamo nga aloma ari:

2Inywe kane mwoolise liina nga mundeerera ise kumutaambo,

ni khukhuumboolela biilomo bibiimalamo ise kamaani?

3Buli imbuka ni muba mukanikha, mulikho mukhomyaasa ise,

naluundi inywe kamaŋaanyu sikabawaamba mu khukhomyaasa ise ta.

4Abe ikhaba bari shili shituufu shiri ise naakhola bye bubwoonaki,

ne bubwoonaki ubwo burama ni nase samweene.

5Abe mwakhaba nga mulikho muntsiyiingilakho,

naluundi mwaabona kumutaambo khuuba nga kwamiile mu bwoonaki bwase,

6inywe simubona muri Wele niye ukholele shino ta?

Niye waarekire kumureko khukhuumaambilisa ise.

7Bona abe ise naakhelootsa nga indila khulwe shisaayuumba

sheesi ise ndi khuubiramo, mbaawo urekeeresa ta;

ise naakhalila indi balikho baamiinikhilisa,

mbaawo urekeeresa ta.

8Niye wakhingiliile khu ntsila yase ibweeni, ise mbaawo isi inyala naabirira ta;

naluundi wawaambile kumukhoosi kwase waakubisile mu shiilima.

9Niye waandusilekho ise shiirifwa sheesi abe indi ni nasho;

woonakisile ni lisina lyase.

10Niye abeelelela nga akhuupa ise khukhwaamila khu buli luwaande;

naluundi wakhuula kumwiyikino kwase waakurusawo,

nga umuundu n’akhuula kuusaala.

11Wele wamaambiile ise liirima lye angaaki naabi,

naluundi niye ambila ise khuuba nga umusiku weewe.

12Liiye lyeewe liitsila atweela;

lyoombakha kumukhoosi nga lilola isi ise ndi,

lyebotokhelela shiifwo sheesi ise ingonamo.

13Wele waakila baalebe baase babeene bantsibebeya ise;

ni basaale baase babeene baambila ise nga umuundu isi bakhaamanya ta.

14Baalebe baase boosi baatsya khaale;

ni basaale baase baayintsibilila ise.

15Abo beesi ise imenyisa muuntsu yase baayintsibilila ise;

ikhaba baraambi be muntsu yase bambona ise nga isi bakhaamanya ta;

ari ise naayikela umwiitswa muumoni tsyaabwe.

16Abe nakhalaanga mutweela khu baraambi baase, sibaantsilamo ta;

abe nakhamwikoontselela indi eetse anjeete.

17Ikhaba n’umukelema wase s’aanyala weekhaliilikha ta,

khulwekhuuba ise imbunya mukhanwa;

ikhaba bayaaya baase babeene sibanyala bantsisyeenda aambi ta.

18Ikhaba babaana bakyeekhe bandekelesa ise;

nga nenyukhile khu ngaaki, baanganikho tsilomo tsiimbi.

19Basaale baase boosi batataya khukhuuntsitsayo;

ni naabo abe beesi ise ingana naabi ari sibangana ise ta.

20Ise ari nateenya naarama kamakuumba busa;

naluundi nawoneele akyeekhe naabi khuufwa.

21Basaale baase, inywe ni mumaambile ise shiisa, ni mumaambile shiisa;

khulwekhuuba kamaani ka Wele kaakhupile naakwiile aasi.

22Shiina kila nanywe mulikho muumba ise shitaambiso,

musaambo niyo indweela nga Wele n’aalikho akhola?

Inywe simwambeele ise shitaambiso shishiimala ta?

23Ise nekoomba indi abe yabawo umuundu unyala khurona biilomo byase;

khali ibeelewo uyo ubirona biba mu shitabo.

24Namwe ibawo ubibeetsela khu libaale;

babibeetsa ni shishiindu shishooki, nio akila bibawo biilo ni biilo.

25Khulwekhuuba ise naamanyile indi umuwonesi wase aliwo mwikulu, ali umulamu;

ikhumaliilisa akhenyukhe khu ngaaki abe umujulisi wase mu musaango.

26Ikhaba nga buulwaale buubi naabi bwaamalile khuulya shiikhoba she khu mubili kwase,

ne nga ishili umulamu, ise samweene ikhaabone Wele ni tsimoni tsase.

27Ise samweene, akhuba umuundu ukuundi ta, samweene niye ukhaamubone;

imubone ni tsiimoni tsyase.

Kamaani kaase kawetsekhelela, nga iwe waalomile uri:

28“Ifwe kane khumukubyeenge niye mu saambo shiina?

Khulwekhuuba kumusaango kuli khu niye.”

29Ne ari, uli ni khuuba ni khuurya khuukali khulwe luurima;

luurima lulureera liirima lya Wele isi baboonaki;

nio akile iwe umanye uri iliwo khuukhala kimisaango.