Swahili Bible2

18

Inganikha iya Bilidaadi

1Lwaanyuma Bilidaadi abe uwaama i Shuwa, weelamo Yobu, nga amulomela ari:

2Kane iwe ukanikhe bibiindu bino nga siwaakamisa ta,

khukhwoolisa liina?

Byambaasekho usile busa, nio nafwe khuukanikhe.

3Shiina kila iwe wambaasa uri ifwe khuli busa nga tsiisolo tsye mwiirome,

tsitsikhanyala tsyaakanikha ta?

Shiina kila iwe ukhuloleelela ifwe wambaasa uri khuli baasilu?

4Yobu, iwe liirima lyoowo lilyeene nilyo lilikhureerera iwe butsiina.

Iwe wambaasa uri babaandu kane batitukhe baantsukhe shiibala bari khulwekhuuba iwe wakhalaale?

Iwe wambaasa uri Wele kane asheende kamabaale khukhwaama mu bifwo byako,

bari akhusangaase iwe?

518.5: Yob 21.17Abe iwe waakhaloma tsiinga nga wiikholisa busa,

ne umuundu umwoonaki afwa mu saambo imbi naabi.

Buuwaanga bwe kumulilo kweewe sibwiilamo bwaakhosa luundi ta.

6Buwaanga bubuuli mu liweema lyeewe bwiikela shishiilima;

naluundi itaala imumulikhila niye isima, yaalekha khukhwaburukha luundi ta.

7Umwoonaki akeenda nga s’aali ni kamaani ta;

naluundi afuna biihangafu khulwe khukhwiyikaana kamakhula keewe umweene.

8Khulwekhuuba niye umweene akeenda weengila mu mureko;

aryo akeenda umweene waakwa mu lilowo.

9Kumureko kumuwaamba tsiikhukunyu tsyeewe,

kuwaamba kwoomisila ilala.

10Ikhaba aasi khu liloba iliyo kumureko kweesi baaba baamurekire,

kumureko kweesi baaba baarekire khuuntsila yeewe.

11Kamariiso kamwibotokhelela khu buli lubeka,

naluundi kamulondelela buli oosi isi niye atsya.

12Amataayi yaba ali ni buyiindifu, ne ari ali busa intsala;

buhangafu bwamuliindiliile khu buli lubeka khumura aasi.

13Bulwaale buubi naabi bwamalaatana lihaafu lye kumubili kweewe;

bwaakila kamakhono keewe ni biikele byeewe byarakikha khuubola.

14Baamukhweesa baamurusa muuntsu isi amataayi aamenyatsakamo mu lukoosi;

kamariiso kaamukhweesa kaamuyila khuutsya khumwoolisa isi khuufwa khumenya.

15Ari uyo unyoolile yeesi anyala khuumenya muuntsu y’omwoonaki;

khulwekhuuba muungo mweewe basalanisamo buunoro.

16Kimili kyeesi niye amala khaale khukhwikhisa mu liloba kyooma;

ni tsiisakya tsitsiili khu ngaaki tsyaniaala.

17Mbaawo umuundu na mutweela khu shibala ushebulila umwoonaki taawe;

khuumanyikhana khweewe khukoraanawo buli aandu oositsana.

18Bamwaamisa mu buwaanga baamukholowa mu shiilima;

baamutimisa khukhwaama mu shibala waatsya imakoombe.

19S’aalikho n’umwaana namwe lisaaye lyoositsana taawe;

namwe umuundu yeesi uwaramawo iyo yeesi amenyaatsaka taawe.

20Ibyo bibyamukwakho niye bikheyangise busa kimiboolo kikiili khukhwiitsa muumoni;

ni kamariiso kawaambe abo babaama ibukwanyaanga.

21Ilala iyo niyo intsakamo iy’omwoonaki;

iyo niyo intsakamo iy’abo babaakhenaanayo khu Wele ta.