Swahili Bible2

17

1Ise kamaani kaase kaatsiile, ise ndi aambi khuufwa;

iŋani yanindiliile ise.

2Khu buli luwaande iliyo babaandu babaantsekhelela ise;

ise imbarakho busa tsiimoni nga ni baantsibwakala.

3O Wele, iwe n’untsimiilile baandekhuule khukhwaama mwipuusu;

mbaawo umuundu ukuundi unyala weemikha khuungaki waambotsela ise ta.

4Khukhwaama iwe n’uboweelesile bubwoongo bwaabwe

baalekha khubakho ni sheesi bamanya ta,

iwe ukhabafukiilisa nibo baafuura ise mu musaango kuno ta.

5Umuundu ulyamo uwashe luwomelo bari abewo sheesi afunakho,

nyaanga babaana beewe bakhaataambisibwe.

6Ari ise nayikela busa shishiindu sheesi babaandu batsekhelela;

nga bamboonekho bafuutsa ni kamare khulwe khukhuumbiyiila ise.

7Khulwe kumutaambo ari ni tsiimoni tsyase sitsishiibona ta;

kamakhono kaase ni biikele byaboombile ari bili busa nga busaantsu.

8Babaandu baalayi nga baaboone khuutaambisibwa khweesi ise imbiriremo, beesindukha busa;

liirima libawaamba, baakhalila ise kumusaango nga baloma bari

ise sinisaaya Wele ta.

9Ne shitweela busa uyo uwiyikina Wele, kane elosele khuukhola busa aryo.

Naluundi abo babaali baakhosefu beloosela khuuba ni kamaani.

10Ne abe inywe mweesi mwaakheetsa mwaantsima ise ibweeni,

ise singane inyoolemo ikhaaba umuundu umukesi na mutweela ta.

11Biifukhu byeesi ise ndi ni nabyo khu shibala khuno, byaaweeleyo,

ni tsinengarengekha tsyase natsyo tsyaakamile;

ni kumwooyo kwase kwaaweelemo kumwikhoyo.

12Nga shiilo shoolile basaale baase bekholisa bari kuli kumuusi;

uri antsye buba nga bwiilabula, beekholisa bari bulikho busya.

13Ise nikoomba ndi khali ifwiile intsye imakoombe;

intsya naala bulili bwase ibweene iyo.

14Iŋani ikhekele niyo khuuba paapa uwase,

ni tsinyeende tsiikele nitsyo maayi wase ni bakooko baase.

15Ari, abe ise kumwiyikino kwase kuli waahena?

Naanu unyala waabona ari ise ndikho ni kumwiyikino kwoosi?

16Ari ise inatsya imakoombe ni kumwiyikino kwase?

Kane ise intsye mu shibala she baafu ni neebyo byoosi abe byeesi niyikina?