Swahili Bible2

16

Inganikha iya Yobu

1Lwanyuma Yobu weelamo nga aloma ari:

2Ise naamalile khuuwulila khu biindu bibifwaana nga ibyo;

mu shifwo she khukhuuntsisamo ise kamaani,

inywe mulikho mundeerera busa kumutaambo.

3Kane inywe mwoolise liina ni tsinganikha tsyeenywe tsitsikhalimo kumukaso itsyo?

Shiina shishibaakalisa inywe kila munganikhayo musaambo iyo?

4Muba nga inywe nibo babaali nga ise n’iindi ana ari,

khali nase inganikhile nga inywe ni mulikho mukanikha muryo,

khali nase inganikhile bibiindu nibyo bitweela bibibawaamba khus’iinywe;

naluundi mu khubatsekhelela, khali nase imeseele luulimi.

5Khali nase imbakanikhiile inywe biilomo bibibeesamo inywe kamaani;

naluundi niilosela khuukanikha nga imbesaamo kamaani.

6Abe ise naakhakanikha, butsiina bwase singane bushendeele ta;

abe naakhasila busa, mbaawo shishishuukhakho ta.

7Ilala, ari ise Wele iwe waamalilemo kamaani koosi;

iwe weerire babaandu be intsu yase boosi.

8Iwe wamaambile waangumisiile ilala;

khuuniaala khwe shikhoba she khu mubili kwase,

shookesanisa shili ise ndi ni kumusaango.

9Wele angubyeenga ise naluundi wandyenuulakamo

nga isolo n’ityenuulakamo isaanyi yayo;

waambiyiila ise luukali naabi.

Andoleelela waantsomiisilakho tsiimoni tsyeewe,

ise nafwaana busa nga umusiku weewe.

10Babaandu nga bamboone ise beyaanga baasamilila busa;

baakhomyaasa ise naluundi baakhupa tsiimbi khu saya tsyase,

boosi baantsibuusanakho baantsibwakala.

11Wele ambaanayo ise mu makhono ke babaandu baboonaki,

akholowa ise mu meeno ke babaandu baabi.

12Ise abeele imenya mu lukoosi,

ne Wele waaminiaangulakamo;

waangumiile ise mwikosi waangolowa aasi khu liloba,

wanaambisa ise nga she khukhwiyikilakho khuulasa buyiingo.

13Babaandu beewe babaalasa buyiingo baantsibotokhelela ise.

Niye alasa buyiingo bweewe bwantsingila muumbiko tsyase mukari,

waakila indulwe khukhwaama mwibili mwase yatsutsukha aasi khwiiloba.

14Niye antsinisa ise nga elaŋanamo busa;

antsibwakala nga umusilikhale uwe kamaani ukhalimo shiisa ta.

15Ise nakwaara bikwaaro bye babaalila baafu bimenya khu mubili kwase;16.15 Bikwaaro bye khuulila baafu abe bili bibyahalala, nga baabirukha khukhwaama mu bwooya bwe tsimbusi namwe tsiŋamiya.

Wele waaminakiile ise aasi mu lifukhuulu.

16Tsiimoni tsyase tsyabiimbile khulwe khuulila,

khukhwoolisa bona ari ise ndikho imbona bibiilima busa.

17Bibiindu bino byaakholikhile khus’iise ikhaba nga mbaawo sheesi ise noonakile ta;

ikhaba nga mu khuuloomba khwase isi Wele, ise imuwa niye shiriifwa.

18Ise ndi busa nga umuundu isi bakhoonyele nga s’aalikho ni kumusaango;

ikhabawo ubiimbilila kumusaango kwe khukhukhoonya ise ukwo ta.

Ikhabawo umuundu yeesi unyala khukhuusilisa ise mu khukuukuula nga imeentsa bwa ŋali ta.

1916.19: Yob 19.25Bona, ikhaba ana ari, umujulisi wase ali mwikulu mu ngaaki,

uyo ukane ambotsele ise kumusaango ali angaaki naabi.

20Basaale babeene baaba nibo babaantsekhelela ise;

ne Wele niye isi ise ndilila kamasika kaase.

21Ise nikoomba ndi khali ibeelewo umuundu uwikoontselela Wele khu lweefwe;

nga umuundu n’ekoontselela khulw’omusaale weewe.

22Khulwekhuuba lwaanyuma lwe kimiiko mikyeekhe kiri,

ise ikhaafwe intsye, indekhe khubawo luundi ta.