Swahili Bible2

15

Tsinganikha tsye kumuluundi kukuukhola khabili

(15.1—21.34)

Inganikha iya Elifasi

1Lwanyuma kila Elifasi abe uwaama i Tema, elamo nga aloma ari:

2Yobu, sishiba shilayi umuundu uwe kamakhula nga iwe,

khuukanikha tsiinganikha tsitsikhalimo itsamu nga tsino ta.

3Shiina kila iwe utsya nga ukhaandisana mu biindu bibikhalimo itsamu,

namwe mu bilomo bibikhakhuyeeta iwe ta?

4Ilala, iwe khufukiilila khwoowo mu Wele, khwaakhuweelemo;

iwe ulikho ushikhola khuuba shihangafu isi umuundu yeesi,

khuloomba isi Wele.

5Khulwekhuuba isaambo isi iwe ukanikhamo,

yookesanisa bubwoonaki bweesi iwe ukhola;

khulwekhuuba inganikha yoowo yokesanisa iri luulimi lwoowo lukhupila eyi ni neeyi.

6Isaambo isi ukanikhamo inyene niyo iyokesanisa iri

iwe uli ni kumusaango, akhuba ise niye ulikho uloma ta.

Tsilomo tsyoowo tsinyene nitsyo tsitsikhukhaliile kumusaango.

7Yobu, iwe wambaasa uri iwe niye umuundu umukiboole uwanyoowa khuusaalikha khu shibala?

Namwe wambaasa uri iwe wasaalikha nga Wele ashiili khubuumba ni tsingiingi ta?

8Nga Wele ni baarume beewe baaba mu lubuusano lwaabwe mwikulu,

nawe wabamo warekeeresa byeesi bakanikha?

Iwe wambaasa uri iwe wenyene niye uli uwe kamakhula?

9Shiina sheesi iwe wamanya, sheesi ifwe khukhaamanya ta?

Iliwo sheesi iwe utekeela khukhufuura ifwe?

10Bona iliwo baasakhulu be tsiifwi ni naabo babaali be kimiiko kimikali musiifwe,

ni khuuminyisakho kya paapa woowo.

11Iwe sishikhumala Wele umweene khuukhuwoleelesa iwe,

namwe isaambo indaayi iy’ambola busa isi ifwe khukhukanikhileyo ta?

12Shiina kila liirima likhuuniinaniina,

naluundi shiina kila tsiimoni tsyoowo tsirandaarire?

13Shiina kila iwe ukhalaliile Wele,

waakila iwe waakanikha biilomo bibiifwaana nga ibyo?

1415.14: Yob 25.4-6Iliwo umuundu unyala khuuloma ari baamala khaale khumupyeluusa,

namwe ari s’aalikho ni kumusaango isi Wele ta?

15Bona, Wele s’eyikina ikhaba baarume beewe baakhosefu ta;

mu moni tsyeewe ikhaba liikulu shilili lipyeluuse ta.

16Kumwiyikino kwa Wele isi umuundu kuli mukyeekhe naabi ni khuuminyisakho,

khulwekhuuba umuundu s’aalimo kumukaso ta, naluundi akhola bye bubwoonaki.

17Yobu, iwe rekeeresa byeesi ise inoma,

khayo ise ikhwookesanise iwe byeesi ise imboone;

ise ingana khuubira byoosi mu moni tsyoowo.

18Ise ingana ikhuboolele iwe byeesi babaandu be kamakhula bamboolela ise,

naluundi bye kamakhula byeesi bakuuka baabwe baamala khaale khurumbura.

19Nibo bonyene babaaweebwa liiloba lye khuumenyamo,

alekha khubawo umwiitswa na mutweela khuukhalisamo ta.

20Wele awa babaandu baboonaki shitaambiso mu bulamu

bwaabwe bwoosi nga bashiili baalamu.

Babaandu bano bakhaataambisibwe mu buulamu bwaabwe bwoosi,

khulwekhuuba bamiinikhilisa bashaabwe.

21Mu maru kaabwe bawulila kamakono kakaabareerera kamariisyo;

naluundi isi bambaasila bari bali mu lukoosi,

awo niwo isi umunuuli abakwakho waabebwakala.

22Sibalikho ni kumwiyikino kwe khuumanya

oba balikobola khukhwaama mu shiilima namwe ta;

khulwekhuuba iliwo ubebuuliile ubaliindiliile khuubeera.

23Tsiingosya kane tsimulye niye nga wafwiile;

weyembeleele ari iliwo umuundu ukana khumwiira.

24Kumutaambo n’ingunyi byaayikhala bimwiyembelesa,

ali busa nga umuyiinga isi bali khuutsya khukhwiibwakala.

25Ilomo ikila bino byaamukholikhakho ili indi,

niye aba wesunguule khuukhaandisa Wele;

naluundi niye eyila nga umunyindaalifu

mu moni tsya Wele, umunyali uwa byoosi.

26Okesanisa shikili she angaaki naabi nga n’akhaandisa Wele,

akhakakho khukhwiitseeta umweene,

nga n’atima khuutsya khukhwibwakala Wele.

27Khulwekhuubela ali umuyiindifu waalya waawamo ni kumukaso;

naluundi kumubili kweewe kuyelayela busa.

28Amenya mu biriimba byeesi buli mutweela amanyile ari bikhekele kamakubili.

Amenya mu ntsu tsyeesi ikhaalekhe khubawo umuundu utsimenyamo ta,

tsyeesi buli muundu amanyile ari tsikhekele kamakubili.

29Umuundu uyo s’akhaabe umuyiindifu taawe;

buyiindifu bweewe sibukhaabewo khuumala imbuka indeeyi ta;

ikhaba buyiindifu bweewe sibukhamalaatane shiibala shoosi ta.

30Alobile, akanile, akhaafwe;

akhaabe busa nga kuusaala kweesi kumulilo kwoosha tsisakya tsyakwo;

ni kumuukha kweesi Wele akhaaheele kukhaamuwuutse niye atamuukhe.

31Niye ewombesa umweene, nga eyikina bye bubwoonaki bweewe;

nio lwanyuma bye bubwoonaki ibyo bibe nibyo kumukheemba kweewe.

32Nga imbuka yeewe ishiili ni khukhwoola ta, akhaniaale busa nga kuusaala;

kweesi ni tsisakya tsikhanyala tsyeelamo tsyarakho kamasaafu ta.

33Akhaabe busa nga kumuzabibu kukulakasa bibyaamo byakwo nga bishiili khuroba ta;

nga kuusaala ku olivu ni kulakasa kamasaafu kaakwo.

34Abo babaakhesaaya Wele ta sibakhaabekho ni lisaaye ta;

ni kumulilo kukhooshe tsiingo tsyaabwe tsyeesi boombakha,

khuubirira mu bulyakhani.

35Babeene bano bakhola tsinengarengekha tsye khuukhola bibiindu biibi,

waakila mwaamilamo bubwoonaki;

naluundi kimyooyo kyaabwe kyayitsula khuwombesa.