Swahili Bible2

14

Buulamu bw’omuundu buli bubuumbi naabi

1Umuundu usaalikha mu mukhasi ali uwe bifukhu bikyeekhe biri,

naluundi waayitsula kumutaambo kumukali naabi.

2Atsowaka waabalaaha nga shimuli, ne lwanyuma waaniaala, wooma.

Lwanyuma akoranawo nga shishiniini ni shikoraanawo,

waalekha khubonekhakho luundi taawe.

3Iwe unyala uryeena woomiisila tsimoni tsyoowo khu muundu nga uyo aryo,

naluundi waamuyila mu baakayi khuumuwotsisa?

4Naanu unyala waarusa shishiindu shishiili shimiliwu

khukhwaama mwiisho shishiili she mbikho?

Mbaawo unyala waashikhola ta.

5Iwe waakhalawo bukali bwe kimiiko kyeesi umuundu ali ni khuumenya khu shibala;

iwe wamanya kimyeesi kyeesi ali ni khuumala khu shibala;

iwe waakhalawo khaale, mbaawo unyala waatuumisawo ta.

6Iwe muwekho naye imbuka, nio naye anyalise khuuba mu lukoosi,

nio angoloobe naye anyalise khuwolakho nga waamaliilisile buraambi bweewe.

7Khulwekhuuba baakharema kuusaala kwaakwa aasi ne iliyo kumwiyikino,

uri kunyala kwaarubura luundi,

naluundi tsiindi tsyakwo sitsifwa ta.

8Abe tsiindi tsyakwo tsyakhamenya mu liloba aasi,

ni kutsikhi kwakwo kwabola,

9ne nga kameetsi kakuronyirekho,

kurakho kamasaafu kwaaba busa nga shisaala shishaanakhe.

10Ne umuundu afwa, waalekha khubakho ni kamaani koositsana ta;

ari shiina shishikholikha nga waamalile khuufwa?

11Nga inyaantsa iyomelela,

namwe luluutsi lulwomelela kameetsi kaakama khuutima,

12nisho shitweela busa nga umuundu ufwiile, s’enyukha luundi taawe.

Umuundu uyo arama nga umufu khukhwaama liikulu ni liba lishiiliwo,

namwe wenyukha khukhwaama awo isi ali ta.

13Shinyalikha khali iwe umbisile ise mu shibala she imakoombe;

ni umbisile ilala ise ibweene iyo khukhwoolisa nga liirima lyoowo lyaweele,

nio ukelewo urewo imbuka iye khukhushebulililamo ise!

14Umuundu nga waafwiile, anyala wekela umulamu luundi?

Ise kane iniinde abe yakhaba khukhwoolisa liina,

khukhwoolisa nga umuundu weetsile wasikuule ise.

15Abe noola iwe waakanile khukhuumbona ise, shibuumbe shoowo;

iwe nga wanaangile, kane nase ikhwiilemo.

16Khulwekhuuba nio lwanyuma lwayo kane iwe ube umuliindi wase,

nio ulekhe khukhwimenielesa bibyoonako byase ta.

17Iwe kane untsiyakhile bibyoonako byase, ubiibilile;

iwe ubiimbilile naluundi ubise bibyoonako byase.

18Ne tsingiingi tsikwa lwanyuma tsyawumbukhaka,

ni lulwaanda nalwo lunyala lwaarura mu shifwo shalwo;

19kameetsi kalya libaale lyaweelela;

ifula iye kamaani ikhuya liiloba yaatsya ni nalyo;

ni musaambo niyo ndweela, iwe urusawo kumwiyikino kw’omuundu.

20Liina na liina iwe uminya babaandu kamaani waakila baakoraanawo;

bafwa bashuusakho mu moni,

uryo waabarusawo baatsya.

21Babaana beewe baakhakelawo baafuna biriifwa, niye s’anyala waashimanya ta;

abe bakhaamenya mu khuswaala, niye s’anyala waashimanya ta.

22Niye awulila butsiina bwe kumubili kweewe kumweene yenyene,

waalila khulwe kumutaambo kweewe yeenyene.