Swahili Bible2

13

1Khayo ise imbaboolele:

byeesi mulikho muloma ibyo ise naabibona naluundi naabimanya byoosi.

2Byeesi inywe mwamanya, ise nase naabimanya;

ise s’iindi uwe aasi khus’iinywe ta.

3Ne ise ndikho inganikha isi Wele, akhuba isiinywe ta;

ise ingana niwotsekho kumusaango kwase isi Wele.

4Ne ari inywe mukanikha bye bubeeyi khuubimbilila bya ŋali.

Inywe muli bakaangi babaakhanyala bakaanga bawonesa umutsiina ta.

5Iba nga shishinyalikha khali musilile busa,

nio manya mufwaana nga babaandu babaalimo kamakhula.

6Ari inywe rekeeresa bitsiilililwa byaase,

murekeerese buulayi nga ise ni nilootsa mu musaango kwase.

7Shiina kila inywe mukanikha bye bubeeyi mu lisina lya Wele?

Shiina kila inywe muwombesa busa mu lisina lyeewe?

8Ari inywe mulikho mukhakakho khuumubeela niye?

Inywe mulikho mukana muwotsele Wele kumusaango?

9Ne niye nikane abemenielese inywe kane anyoolemo shiilayi shoosi?

Namwe naye kane mumuwombese nga ni muwombesa babaandu basheenywe?

10Ilala, ilala, n’iiba bari mulikho mumuseemba niye mu shimoonyo busa,

kane niye abekiitse inywe.

11Singene shiriifwa sheewe she angaaki shikile inywe munikine?

Naluundi singene buuri bubawaambe inywe khulweewe?

12Byeesi inywe mukanikha khuubirira muundikha tsyeenywe imbaamo itsamu ta,

bili busa nga kumukhaambiitsi.

Ni tsilomo tsyeesi inywe muraambisa khukhwitseeta mwabeene,

sitsitsya ni mukhuru ta.

13Ni musile busa muumbe ise ikhabi inganikhe,

ise siniinaanayo oba shiina shishinaakholikhakho ta.

14Ise ndi umwirekefu khuwaanayo buulamu bwase;

khuukhola nga samweene n’iingana.

15Abe ikhaba nga waakanile, anyala waantsira na khuuntsira;

ise ari naweelemo kumwiyikino kwoosi.

Ne shitweela busa kane ise niwotsekho mu moni tsyeewe.

16Manya winyoola bunyindaalifu ubwo bunyala bwaakila ise nawonesa buulamu bwase.

Khulwekhuuba mbaawo umwoonaki unyala wesungula khukhwiima

mu moni tsya Wele ta.

17Ari rekeeresa buulayi bubweene byeesi ise ndikho inoma;

ni mwimenielese byeesi ise ndikho isontsoola.

18Bona, ari ise naamalile khaale khurengekharengekha kumusaango kwase;

naamanyile ndi kumusaango singene kufuure ise ta.

19Naanu uli khuutsya khukhaandisana ni nase mu moni tsy’omukayi?

Abe noola kumusaango kwafuurire,

ise ndi mwirekefu khukhwakamisa khuukhaandisana,

isile busa naluundi indi mwirekefu khuufwa.

20Ise ndi khuukhuloomba indi iwe ukholele ise bibiindu bibili byonyene;

nga iwe waafukiilisile bibyeene ibyo, ise singene nibise khukhwaama isi iwe ta.

21Iwe ni waakamise khukhuumba ise shitaambiso,

naluundi iwe ni waakamise khukhuundeerera ise khukhwiyembeelela.

22Nio lwanyuma kane uri iwe ukanikha, nase ikhwiilemo.

Namwe kane uri ise inganikha, nawe untsilemo.

23Tsifuunda tsiinga tsyeesi ise ikholele bibyoonako,

namwe bibiindu byeesi iwe ukhakana ta?

Iwe n’untsokesanise ise mu byeesi ikhaasikhanile,

ni bibyoonako byase.

24Shiina kila iwe ukhalalila ise?

Shiina kila iwe umbirisa ise nga umusiku woowo?

25Shiina kila iwe ukila ise naaba ni khuurya khuukali,

nataamukha busa nga imbewo n’iyila lisaafu lilyoomu?

Iwe uli busa nga uuli khuuloondelela likhuutsi

lyeesi imbewo ilikho iwuutsa.

26Khulwekhubeela iwe wamboyilekho ise kimisaango kye kamaani naabi,

naluundi iwe waakiwandikhile mu shitabo.

Iwe waakilile ise ndikho ishebulila bibyoonako byeesi isi nakhola nga ni naaba umusoleeli.

2713.27: Yob 33.11Iwe wambowelesile biikele byase siinyala nakyeenda ta,

naluundi iwe wimenielesa buli sheesi ise ikhola.

Iwe unoondakho nga wimenielesa buli aandu isi ise ikhaandakile shikhaandakilo shase.

28Ikhumaliilisa ise nawetsekhelela busa nga kuusaala kukwabola,

naaba busa nga shikwaaro sheesi kamake kaamala khaale khuulya.