Swahili Bible2

12

Inganikha ya Yobu

1Lwanyuma Yobu weelamo nga aloma ari:

2Mu ŋali, inywe muli nibo liikono lye babaandu,

nga inywe mweetsile khuufwa, ni bye kamakhula nabyo bikhaabe byafwiile.

3Ne nase ndi ni khuumanya khukhuuli nga khukhweenywe.

Ise s’iindi uwe aasi khus’iinywe ta.

Naanu ukhaamanya bibiindu byeesi mukanikhile ibyo byoosi?

4Ari ikhaaba basaale baase babeene balikho bantsekhelela ise;

bantsekhelela ise, abe uloomba Wele waantsilamo,

ise ukhalikho kumusaango namwe shishoonako ta,

ari ise niye isi balikho batsekhelela.

5Abo babaali buulayi batsekhelela abo babaakwa mu bihangafu;

buhangafu busheele bukwa khu baandu babaali mu bihangafu khaale.

6Tsiingo tsye babaandu babaanuula bibiindu bye babaandi tsimenya mu lukoosi,

ni naabo babaali baboonaki sibalikho ni buhangafu bwoositsana ta.

Kamaani kaabwe kali niko wele waabwe isi beyikina.

7Ikhaba biisolo bye mwiiswa bili na biikali byeesi binyala byaabaleekela inywe;

ikhaba binywiinywi bye mu ngaaki binyala byaabaleekela inywe.

8Namwe abe mwakhareeba bibiindu bibiitsowa khu shibala,

binyala byaabaleekela inywe bibiindu biikali;

ikhaba tsinyeeni tsitsiili mu meetsi tsinyala khuubaleekela inywe.

9Mu bibuumbe ibyo byoosi, iliwo shisihikhamanyile shiri Wele

niye ukilile bibiindu bino byoosi byakholikha?

10Buulamu bwe shibuumbe shoosi,

ikhaba bwe babaandu boosi, buli mu makhono keewe.

11Shili busa nga kamaru ni kawulila tsilomo tsyeesi baloma,

ne lulimi lwamanya nga bibiindu ni bibyanula namwe ni bibyaluluwa.

12Abo babaali ni kimiiko kye bukhulu kimikali,

bali ni kamakhula;

kimiiko kyaabwe kibanyalisa khuumanya bibiindu biikali.

13Ne Wele ali niye kamakhula ni kamaani;

niye ambaasa bibiindu biikali naluundi ali ni khuumanya.

14Nga Wele waakhalilewo khukhwoonakisa shishiindu,

mbaawo umuundu unyala khushoombakha sheelawo bushaakha ta.

Nga niye waaboyile umuundu mwipuusu, mbaawo unyala waamurusamo ta.

15Nga niye wahaambiliile ifula, iba singene ikhupe ta;

ne nga waakilekhuulile, kameetsi kasalasala khu shibala shoosi.

16Wele ali ni kamaani naluundi ali ni kamakhula;

uyo uwoombesa basheewe, ni nooyo isi bawoombesa,

boosi bali aasi e bunyala bwa bweewe.

17Niye urusa khu bawuli kamakhula waakila baarama nga bali busa,

naluundi waakila baakayi bekela baasilu.

18Abo babaali bayiinga, Wele abarusakho buunyala bwaabwe,

waakila bekela busa khuuba baakulwa.

19Niye arusa khu basaayi kamakhula waakila baarama nga bali busa,

naluundi be kamaani niye abarusakho bunyala bwaabwe.

20Niye akila babaandu babeyikinwa baalekha khubakho ni sheesi bakanikha ta;

naluundi abo babaali ni kimiiko kye buukhulu kimikali,

niye abarusakho kamakhula ke khuunyalisa khuukhalawo shiilayi ni shiibi.

21Wele alekelesa abo babaali baawuli,

abo babaali be kamaani niye abarusakho buunyala bwoosi.

22Niye ubiimbula shishiilima shishiili imakoombe,

naluundi waashuusa shishiilima sheekela buwaanga.

23Wele niye ukila kamanaambo kaabalaaha,

naluundi niye ukila kaawetsekhelela kekyela kamakyeekhe.

Niye ukila kamanaambo kaaba ni kamaani,

naluundi niye ukila babaandi baakafuura mu busoolo.

24Niye arusa kamakhula mu baraangirisi be babaandu khu shibala,

waakila bayiiyana busa nga sibamanya sheesi balikho ta.

25Baraangirisi abo batsya babuukabuuka busa nga umuundu uuli mu shiilima;

baatsya bataalataala busa nga umuundu umumeesi.