Swahili Bible2

11

Inganikha iya Zofari

1Kila Zofari abe uwaama i Namasi enyusa kumunwa elamo nga aloma ari:

2Ili ni khuubawo umuundu ukhwiilamo iwe,

khulwe biilomo bya kalebule byeesi ulomile.

Khulwekhuuba khuukanikha busa biilomo biikali,

sishimanyisa shiri uba s’uulikho ni kumusaango ta.

3Yobu, iwe wambaasa uri ifwe sikhunyala khwakhwiilamo ta?

Iwe wambaasa uri khuutyaaba khwoowo khunakhukhaangabisa ifwe,

khulekhe khubakho ni sheesi khukanikha ta?

4Khulwekhuuba iwe wilomela wamweene uri byeesi iwe ukanikha bili bya ŋali,

naluundi uri s’ulikho ni kumusaango mu moni tsya Wele ta.

5Ne shiba shishinyalikha bari Wele akhukanikheyo,

khali niye umweene akhwiililemo!

6Khali niye umweene akhubooleele iwe biimoonyo bibiili mu bye kamakhula.

Khulwekhuuba niye waamanya bibiindu biikali naabi.

Ni nashiryo shimanye uri shitaambiso sheesi Wele alikhuwa iwe,

shili shikyeekhe naabi nga walekhaasile khu musaango kweesi iwe uli ni nakwo.

7Iwe unyala waamanya byoosi bibiwaamba khu Wele?

Iwe unyala wamaanya kamaani ni bunyala bw’omunyali uwa buli shitweeela?

8Niye waamanya bye mwikulu byoosi, ne iwe waamanya shiina?

Niye waamanya bibiili imakoombe, ne iwe waamanya shiina?

9Khuumanya khwa Wele khuli khuuboofu naabi khuuminyisa shiibala shoosi,

naluundi khuli khuubalaayi naabi khuuminyisa inyaantsa.

10N’iiba bari waakanile khuukhuwaamba iwe, waakhukhalila kumusaango,

naluundi waakhubowa mu mapuusu, naanu unyala waamukhaangabisa?

11Khulwekhubeela niye waamanya babaandu babaali be bubeeyi nga ni bali;

abona naluundi waamanya bye bubwoonaki byaabwe.

12Noola tsisolo tsye mwiiswa tsyaarakikhile khuusaala biisolo byeesi babaandu babaya,

babaandu baasilu nabo bakhaakamise khuuba baasilu bekele baakesi.

13Yobu, iwe siinga ushuusakho kumwooyo kwoowo webiyiisa bubwoonaki bwoowo,

kane iwe unyalise khuloomba Wele khuubirira mu saala tsyoowo.

14Nga iliwo bubwoonaki bwoosi bubuuli mu buulamu bwoowo, iwe yaakamisila abweene awo,

naluundi ukhafukiilisa umuundu yeesi uwe muungo mwoowo khuukhola bye bubwoonaki ta.

15Nio shino shikhunyalise iwe khuuba umunyindaalifu

nga s’uulikho ni sheesi iwe wikanakana mu buulamu bwoowo ta,

naluundi shikhunyalise iwe khuulekha khubakho ni shishiindu shoosi sheesi iwe urya ta.

16Lwanyuma iwe kane wibilile bihangafu byoowo byoosi,

bifwaane busa nga kumukhuuro kwe kameetsi kukwamala khaale khuutsya.

17Lwanyuma buulamu bwoowo kane bukhose bube busa nga kumuumu kwe mwihangilwe,

ni bihangafu byeesi iwe uli ni nabyo bikhaashuukhekho ube buulayi,

nga shishiilima ni shishuukha shekela buwaanga.

18Iwe kane umenye nga uliindibwa buulayi khulwekhuuba iliwo kumwiyikino;

Wele akhutseete iwe naluundi akhuwe iwe khuuwola khuulayi.

19Iwe ukhaamenye mu lukoosi nga mbaawo umuundu unyala khuukhuriisariisa ta,

naluundi babaandu baakali bakhaakhwiitse isi uli nga bakana buyeeti bwoowo.

20Ne abo babaali baboonaki bakhaakhaasikhe khuumanya shinaanu shishiili khuutsya mu moni,

nga sibabona musaambo isi banyala baawonamo bihangafu ta.

Abano sibaliyo ni shishiindu sheesi banyala khuusuubilamo ta, akhali khuufwa khwonyene.