Swahili Bible2

10

1Ise noolile ni khuubiiyila buulamu bwase.

Ari khayo ise inganikhe khu shiindu shisheene sheesi ise ndikho nilootsa;

khayo ise inganikhe ni liirima liikali liliili mu mwooyo kwase.

2Ise naalomela Wele ndi, iwe ukhaakhalila ise kumusaango ta.

Iwe n’umbooleele ise kumusaango kweesi ulikho umbaabila.

3Iwe sishikhwaakhila khukhuumiinikhilisa ise ta,

naluundi iwe wamweene walekelesa shishiindu sheesi wamweene wabuumba,

nio ndi iwe waaba musangaafu khulwe tsimbomelo tsyeesi baboonaki bakhola ta.

4Iwe uli ni tsiimoni nga tsye babaandu?

Iwe ubona bibiindu nga babaandu ni babibona?

5Iwe buulamu bwoowo buli nga bwe babaandu,

namwe nawe umenya kimiiko mikyeekhe nga babaandu ni bamenya?

6Shiina kila iwe uweentselesa buubi bweesi ise ikhola,

naluundi uweentselesa bibiwaamba khu bwoonaki bwase?

7Iwe ukhola ibyo, ikhaba nga iwe waamanyile uri

ise s’indikho ni kumusaango ta,

naluundi iwe waamanyile uri mbaawo umuundu

unyala wambonesa ise khukhwaama khu maani koowo ta.

8Kamakhono koowo niko kakaakhootsa ise naluundi kaamuumba,

ne bona ari iwe waashuukhilekho ukana khukhuuntsira ise.

9Iwe uli ni khuushebulila uri waamuumba ise khukhwaama mu liloba lye khuubuumbamo;

ari ukana khukhuuminiangulaka ise niileyo nikyele lifukhuulu luundi?

10Iwe niye uwawa paapa wase kamaani, waakila niye wasaala ise;

iwe niye uwaakila nio ise naatsowela muunda mwa maayi wase.

11Iwe niye uwamuumba ise tsiinyama tsye kumubili kwase ni shikhoba;

iwe niye uwaruunga kumubili kwase atweela nga uraambisa kamakuumba ni kimikotyo.

12Lwanyuma iwe waamba ise buulamu ni khuukana khukhuukhawawo ta,

naluundi buliindi bwoowo nibwo bubukilile ise naabawo nga ndi umulamu.

13Ne khana abe iwe wabiikha bibiindu bino byoosi mu mwooyo kwoowo;

khana abe iwe uli ni shitsiilililwa she khukhuukhola ise buubi.

14Abe iwe waliindiilila busa khuubona uri ise ikhola shishoonako umaambilise,

nio akile iwe ulekhe khukhuuntsiyakhila ise ta.

15Ise naamala naakholakho she bubwoonaki ndi,

imba nafunile buhangafu ni nawe!

Abe nakhaba nga naakholile byeesi iwe ukana,

shitweela busa ise sifuna kumwikhoyo ta.

Khulwekhuuba ise netsuule kumutaambo,

naluundi ise ndi ni khuswaala khuukali naabi.

16Ise n’imba bari naafunilekho kumwikhoyo,

iwe umeentsa ise nga italanyi indafu niweentsa sha khulya;

iwe ukhola bye kamakaanga uri nio khuubirira mu bweene umwo,

ise ifunilemo khutsiinisibwa.

17Iwe busheele ureera abo babaantsuntsumilisa ise mu misaango;

naluundi weloosela khukhuumaambila ise liirima;

nga iwe uweentsa kumukhoosi kumushaakha kwe khukhuuntsibwaakala ise.

18Shiina kila iwe wandekha nasaalikha khukhwaama muunda ya maayi wase?

Ise imba uwafwa busa nga umuundu yeesi ashiili khumbonakho taawe,

khali shaminyisa.

19Ise imba uwaama busa muunda iya maayi ifwa intsya busa mu ŋani,

khali shaba busa shitweela nga uyo ukhaamenyakho khu shibala ta.

20Buulamu bwase sibuli aambi bukana khuwawo?

Nashiryo indekhe ise imbe!

Indekhe ise imbe, nio manya nase naafunakho lukoneele.

21Ise naamanyile ndi indi aambi khuutsya iyo

isi ikhanyalisa khukhwaamayo naakobola ta,

mu shibala shishiilimo ingunyi ni shishiilima,

22shiibala shishiikhalimo buwaanga ta,

she bibiniini ni khutumbuukhana,

nga buli aandu iliwo shishiilima she kamaani shonyene.