Swahili Bible2

1

Yobu ni bye muungo mweewe

1Yabawo umusaani mutweela nga lisiina lyeewe bari Yobu, nga amenya mu shibala abe sheesi balaanga bari Uzi. Abe ali umuundu umulayi naluundi nga ebirisa buulayi naabi. Abe esaaya Wele, naluundi nga etsiliilisa naabi khuubona ari s’ewaambila mu bye bubwoonaki ta. 2Umusaani uyo abe ali ni babaana likhumi: besiinde musaafu ni bakhaana bataru. 3Abe ali ni kamasheese biikana musaafu (7,000), tsiŋamila biikana bitaru (3,000), tsiyeeyi shiikana shitweela (1,000), ni tsisikilya biitoondo biraano (500). Abe ali ni babaakaanisi baakali naabi, nga abe niye ali uminyisayo buyiindifu mu shibala she Bwaamanyaanga shoosi.

4Babaana ba Yobu abe baakhola tsimbalo tsye khuukhola kamayiiya ni balya. Abe balaanga bayaaya baabwe boosi, naluundi abe buli ifuunda, barumanisa balaanga bakooko baabwe baataru khuubetubaasakho khu mayiiya ako. 5Lwanyuma lwa buli kamayiiya, abe kumutishinyi kukweelakho, Yobu enyukha nga antsye bushiili wawaanayo tsisaayilo isi Wele mu lisina lya buli mutweela khu baana beewe, mu khubapyeluusa. Abe akholatsaka shino khulwekhuuba ambaasatsaka ari manya babaana beewe baakholile she bubwoonaki, nga winyoola bakhomyaasile Wele mu myooyo kyaabwe nga sibashitsililila ta. Ni nashiryo abe buli ifuunda, Yobu akhola aryo.

61.6: Rak 6.2Ari, aabawo shiifukhu shitweela, khweesi babaakaanisi ba Wele baatsya khuubonekhela mu moni tsy’Omukasya, ni Sitaani naye weetsilamo. 7Kila Umukasya areeba Sitaani ari, “Waama waahena?”

Sitaani weelamo ari, “Abe ndikho ingeenda iyi ni n’eyi, nga ndi khuyiiya busa khu shibala.”

8Umukasya waareeba Sitaani luundi ari, “Iwe wambaasilekho khu mwakaanisi wase Yobu? Mbaawo umuundu ukuundi khu shibala uuli umwiyikinwa nga niye, naluundi uwibirisa buulayi nga niye ta. Niye antsisaaya ise Wele, naluundi etsiliilisa naabi khuubona ari s’ewaambila mu bye bubwoonaki ta.”

91.9: Bimb 12.10Lwanyuma Sitaani welamo Wele nga aloma ari, “Iwe wambaasa uri Yobu akhwisaaya busa akhali ilomo yoositsana ta? 10Iwe waamutseeta niye umweene ni be muungo mweewe ni bibiindu byoosi byeesi niye ali ni nabyo. Iwe waamuwa tsiikhabi, buli byeesi akhola bimutsiila buulayi, naluundi bye buyiindifu bweewe byaamalatana shiibala shoosi. 11Ne iwe yinyusa kumukhono kwoowo utiile khu buyiindifu bweewe ubwo bwoosi, noola waalekha khukhukanikhakho tsilomo tsiimbi abulafu busa, nga wamweene ubona.”

12Umukasya waalomela Sitaani ari, “Mbaawo buubi ta. Bona, ise naakhuweele iwe bunyala khukhwoonakisa bibiindu byoosi byeesi niye ali ni nabyo, ne ukhoonakisa buulamu bweewe ta.” Ni nashiryo Sitaani waarurawo khukhwaama isi Wele, waatsya.

Khukhwoonakisibwa khwe babaana ni bibiindu bya Yobu

13Ari, khu shifukhu shitweela, abe babaana ba Yobu, basoleeli ni bakhaana beene, bali muntsu iya yaaya waabwe umusoleeli umukiboole, nga balikho balya kamayiiya. 14Kila umurume mutweela waatsya butima isi Yobu, waamuboolela ari, “Abe ifwe khulikho khulimisa tsiyeeyi, ne tsisikilya abe tsili andulo tsilikho tsyaaya. 15Lubaluba, lituuli lye babaandu ba Seba bakhwibwakala, baasuta bibyaayo ibyo byoosi, beera ni babaakaanisi boowo boosi. Ise senyene niye uwonelemo, naatima khukhwiitsa khuukhuboolela iwe.”

16Uri uyo ashiili ni khuukhala kumunwa ta, umwakaanisi ukuundi woola nga aloma ari, “Luheni lwaamile mu ngaaki lweera kamasheese ni babaayi baako boosi. Ise senyene niye uwonelemo, naatima khukhwiitsa khukhuboolela iwe.”

17Uri uyo ashiili ni khuukhala kumunwa ta, umwakaanisi ukuundi woola nga aloma ari, “Abe ifwe khulikho khwaayisa tsiŋamila, babaandu ba Kaledi beetsa mu mapupu kataru, bakhwibwakala, bayaaya tsiŋamila tsyoosi, naluundi beera babaakaanisi boowo boosi. Ise senyene niye uwonelemo, naatima khukhwiitsa khuukhuboolela iwe.”

18Uri uyo ashiili ni khuukhala kumunwa ta, umwakaanisi ukuundi woola nga aloma ari, “Babaana boowo boosi, basoleeli ni bakhaana beene, abe bali muntsu iya yaaya waabwe umusoleeli umukiboole, nga balikho balya kamayiiya. 19Mu khaangu busa ikhuungu iye kamaani ibalukhiile khukhwaamila mu mubiimbi, yaafuntsakilila intsu isi babeelemo, yaabakwiila, boosi baafwiile. Ise senyene niye uwonelemo, naatima khukhwiitsa khuukhuboolela iwe.”

20Lwanyuma lwa khuurekeeresa buurume bwoosi khukhwaama isi babaakaanisi beewe, Yobu weenyukha khu ngaaki; khulwe kumutaambo kumukali wonuulaka bikwaaro byeewe, waabekakho litsuune lyeewe, waafukhamila aasi, wenamisa kumurwe kweewe, waakutiila khu liloba, wesaaya Wele. 21Kila aloma ari, “Ise ni nasaalikha khukhwaama muunda iya maayi wase, naba nga s’iindikho ni bye buyiindifu byoosi ta, naluundi ikhaba nga nafwiile, ise s’iikhaatsyekho ni shishiindu shoositsana ta. Umukasya niye uwaamba ibyo byoosi abe byeesi indi ni nabyo, naluundi Umukasya niye ubiyilile byoositsana. Khayo lisina ly’Omukasya liruuyibwe.”

22Ikhaba nga bibiindu bino byoosi byamukholikhakho, Yobu s’aakholakho shishoonako namwe wekiitsa Wele khulwe bibyakholikha ta.