Swahili Bible2

SHIITABO SHE

BAAKAYI

KHUKHWAANTSULA

Shiitabo shino she Baakayi shikanikha khu saambo isi babaandu ba Isiraeli belooselatsaka khuumiinyaalila Umukasya baatsya nga besaaya bifwaani. Ne abe buli mbuka isi boonakisila mu moni tseewe, nga Umukasya naye abasiindikhila kamanaambo kakaandi khuubebwakala naluundi baabawula. Ndi lwanyuma lwashino, nga ba Isiraeli bashuusakho beelayo isi Wele, indi bekoontselela shishiyakhilo.

Shiikila shiitabo shino shaayitsulamo tsingano tsitsiwaamba khu mbuka iyo isi ba Isiraeli baabeela nga nio balinjiile mu Kanani, ni mbuka isi baaba nga batsya khufunilamo baawuli babaali bayiinga. Shiitabo shino shiwaamba khu baandu be kifunisi ingali isi baalaangatsaka bari “Baakayi”, bano baaba babaandu babaaba nga bali baselikhale baamanyilifu naabi mu bye busoolo, ne akhuba nga ni khumanyile ilomo iyo shaleelo nga imanyisa baakayi be kamakaambila ta. Batweela khu baakayi babaamanyikhile naabi nibo basaani nga Samusoni (sula 13-16), Gidiyoni ni Yefusa, ni babaandi.

She khukhwiiyika shishifuura buukhulu mu shitabo shino, nikhwo khuumanya ndi khuubawo buulayi khwe babaandu ba Isiraeli, shasiintsiilatsaka naabi khu bwiyikinwa bwaabwe isi Wele waabwe, ne khukhwibilila Wele shamanyisatsaka khuuhela. Ne ndi shishiindu shikhulu nisho ndi; abe yakhaba nga linaambo lyabamo khukhwibilila Wele, ni bukosi bwabeetsila, ne buli mbuka abe Wele aba mwirekefu khuuwonesa babaandu beewe, ni baaba nga bebiiyisile bibyoonako byaabwe, baakobola is’ali. Abe buli mbuka bali ni khuumanya bari bali ni khukhwisaaya Wele Umukasya yenyene.

Inoondekhana iye bibiilimwo

Bibyabawo khukhwoola khu khufwa khwa Yoswa (1.1—2.10)

Baakayi ba Isiraeli (2.11—16.31)

Bibyabawo bibikhali bitweela ta (17.1—21.25)