Swahili Bible2

8

Gidiyoni akhoonya Zeba ni Zalumuna

1Lwanyuma babaandu be mu shikuuka sha Efurayimu beetsa bareeba Gidiyoni bari, “Lwashiina iwe ukhubirisile ifwe uryo? Lwashiina ukhakhulaangile nafwe nga niwatsiile khusoolana ni ba Midiyani?” Baryo bakhaabisana naabi ni naye.

2Kila Gidiyoni naye abeelamo ari, “Ise shiina sheesi ikholile nolelesa khufwaananakho ni nanywe? Likyesa lye kimisabibu kya Efurayimu lilyakamayo silifuura likyesa lye kimisabibu lyoosi lyeesi be muungo mwa Abiyezeri bakyesa? 38.3: Zab 83.11Ni shishiindi, Wele abanyalisisile inywe khuusoolana ni khuuwula Orebu ni Zeebu, baaraangilisi ba Midiyani. Ari ise naakholile shiina shishifwaananakho ni nesho?” Baryo babaandu ba Efurayimu ni baawulila shino, lirima lyaabwe lyaawelela.

4Aryo Gidiyoni ni baselikhale beewe bitoondo bitaru baambukha luluutsi Yorudaani. Abe bakhaba nga baaba baaluwile naabi, ne belooselayo busa khuuwoona baasiku baabwe. 5Ne ni boola mu shiriimba Sukosi, Gidiyoni waalomela baaraangilisi be shiriimba isho ari, “Nimuwekho baselikhale baase biilyo. Lwekhuuba nibo baaluwile, ate nga khwaakha khukhwilooselayo nga khutimisa Zeba ni Zalumuna, bayiinga ba Midiyani.”

6Baaraangilisi be shiriimba Sukosi nabo beelamo bari, “Shiina shishinakila ifwe khuwe baselikhale boowo biilyo? Ifwe khushiili khwikakasa khuri kane muwaambe Zeba ni Zalumuna ta.”

7Gidiyoni waabeelamo ari, “Inywe ni muliindekho. Nga Umukasya waanyalisisile khuuwula Zeba ni Zalumuna, indi khuutsya khukobola ano. Kane indyenuulakemo kimibili nga inaambisa kamawa ke mu mubiimbi.”

8Aryo n’amala khuurura i Sukosi welooselayo paka i Penieli. Ibweene iyo nayo waakanikha isi baaraangilisi baayo musaambo nyene nga n’akanikha isi be Sukosi. Ni baaraangilisi be Penieli nabo baamwiilamo musaambo niyo ndweela nyene. 9Kila Gidiyoni aboolela babaandu be Penieli ari, “Nikane ingobole nga naafuurire, kane ifuniaakake kumunaala kuno.”

10Khu mbuka yino, Zeba ni Zalumuna baaba nga bali i Karikori ni baselikhale babaaramakho khu baandu be bwaamanyaanga nga boola kumukaanda mutweela ni bikana biraano (15,000). Kumweeka mutweela ni kimikaanda kibili (120,000) baaba nga baamala khaale khukhwiiribwa. 11Gidiyoni aryo waatsya waabebotokhelela nga araambisa intsila isi bakyeendaani be mu mubiimbi bakyeendelakho, itsya kwe bwaamanyaanga wa Noba ni Jogubeha, waabuukha busa bayiinga be ba Midiyani bano. 12Induyi yaakhupa bayiinga be ba Midiyani bano Zeba ni Zalumuna, baatitukha. Ne Gidiyoni waabaloondakho nga abatimisa khukhwoolesa n’abawaamba, atweela ni liiye lyaabwe lyoosi.

13Lwanyuma lwayo, Gidiyoni umwaana wa Yowasi waakobola khukhwaama mu busoolo nga abirira mu Bubiriro bwa Heresi. 14Ibweene iyo Gidiyoni wahaamba umusooleli mutweela khukhwaama i Sukosi, waamureebelesa. Lwanyuma waamuloma khuurona kamasiina ke baaraangilisi kamakhumi musaafu na musaafu babaaba bakhulila shiriimba Sukosi. 15Lwanyuma Gidiyoni waakobolayo i Sukosi, waalomela baaraangilisi baayo ari, “Zeba ni Zalumuna abashiina! Nga nikhwaba ano, mwakhulekelesa nga muloma muri, ‘Khwaakhumanya nga kane munyale khuuwaamba Zeba ni Zalumuna ta. Ni munyoowe mutsye mubawaambe khunyoowa, nio nafwe kane khunyale khuuliisa baselikhale beenywe babaakane babe nga baaluwile.’ ” 16Aryo Gidiyoni waayila baaraangilisi abo be mu shiriimba sha Sukosi waabawa shitaambiso, nga araambisa kamawa ke mu mubiimbi khuubakhupa. 17Naluundi waatsya waafuniaakaka kumunaala kwe Penieli, waakhoonyaka ni babaandu boosi be mu shiriimba isho.

18Kila Gidiyoni areeba Zeba ni Zalumuna ari, “Babaandu beesi mwakhoonyela i Tabori baaba bafwaana baryeena?”

Nabo beelamo bari, “Baaba bafwaana nga inywe muri. Baaba bali ni mbonekha nga iy’omwaana w’omuyiinga.”

19Kila Gidiyoni abeelamo ari, “Abo baaba babandaayase babeene, babaana ba maayi wase. Ilala nga Umukasya n’ali umulamu, inywe muba nga mumwabalekha nga baalamu, nase khali sinaabeerire inywe ta.” 20Aryo kila Gidiyoni ashuukha waalomela Jeseri umusiinde weewe umukhulu ari, “Yinyukha ubeere!” Ne Jeseri waalekha khunyalisa khusoowolayo lurima lweewe, khuubeera ta, lwekhuuba aaba nga ashiili mwaana naabi, naluundi aaba waariire naabi.

21Nga byaabeele biryo, kila Zeba ni Zalumuna balomela Gidiyoni bari, “Iwe ukhaloma umwaana oyu khuukhola kumulimo kw’omuundu umukhulu uwe kamaani ta. Wamweene yiitsa ushikhole.”

Aryo Gidiyoni umweene wenyukhilamo khaangu, waabeera boombi, waafuulaka bubuuma bubwaba mu milo mwe tsiŋamila tsaabwe.

Ba Isiraeli baloomba Gidiyoni khuuba umuwuli waabwe

22Lwanyuma babaandu ba Isiraeli beetsa baalomela Gidiyoni bari, “Ari iwe n’ube umuwuli weefwe. Iwe, n’umwaana woowo ukheelewo lwanyuma lwe khuufwa khwoowo, n’umwaana w’omwaana woowo ukheelewo, kane babatsake baawuli beefwe, lwekhuuba iwe waakhuwonesile ifwe khukhwaama isi ba Midiyani.”

23Ne Gidiyoni waabalomela nibo ari, “Ise singene imbekho umuwuli weenywe ta, ate n’umwaana wase singene abe umuwuli weenywe ta. Khuurusakho Umukasya yenyene niye ukane abatsake umuwuli weenywe. 24Ne khuurusakho ise imbaloomba inywe khukhuukholela ise shishiindu shitweela, ndi buli mutweela khwiinywe andeerere ise bubuuma bwe khukhuru bweesi mwamisaka khu baasiku beenywe beesi mweeraka.” (Baasiku bano babeeribwa baaba ba Ishimaeli, ate yaba isaambo yaabwe khukwaara bubuuma bwe zaabu). 25Nabo beelamo bari, “Ilala kane khubikhuwe byoosi.” Baryo baala ingubo aasi, kila buli muundu waakituumakakho bubuuma. 26Ni busiro bwe bubuuma bwe zaabu bwaba bwoola nga tsikilo 20, nga akhubalilakho bubuuma bubwaama mu milo mwe tsiŋamila, ni bubuuma ni khuutubakho ni bikwaaro bibiindi bibyakwaaribwa ni bayiinga be ba Midiyani. 27Khukhwaama mu buuma buno bwe zaabu, Gidiyoni waakholamo Shibuumbe efodi, waashira mu shiriimba Ofura, nga nisho shiriimba she waabwe. Ne lwanyuma ba Isiraeli boosi baarura khu Wele, baarakikha khukhwisaaya shibuumbe tsana, shiryo shekyela kumureko isi Gidiyoni ni be muungo mweewe.

28Isaambo iyo niyo isi ba Midiyani baawulibwamo ni ba Isiraeli, balekha khunyalisa khukhwinyukha luundi ta. Mu mbuka ya Gidiyoni yoosi isi aamala, shibala sha Isiraeli shaba mu lukoosi khuumala kimiiko kamakhumi kane.

29Gidiyoni umwaana wa Yowasi weelayo ingo weewe waamenyatsaka ibweene iyo. 30Gidiyoni aaba ni babaana basooleli babeewe babeene kamakhumi musaafu, lwekhuuba aaba ni bakhasi baakali. 31Aaba n’umukhasi uwe bulafu, abe amenya i Shekemu, naye waamusaalila umwaana umusiinde, waamutwiikha lisiina ari Abimeleki. 32Aryo Gidiyoni umwaana wa Yowasi waafwa nga wahangaale mu miiko, baryo baamusiikha khu ŋani iya paapawe Yowasi i Ofura, mu shikuuka sha Abiyezeri.

33Lwanyuma lwe khuufwa khwa Gidiyoni, ba Isiraeli ndi beelayo luundi baarura khu Wele, besaaya bifwaani bya Bayaali. Baryo bereerawo Bayaali-Berisi khuuba nga wele waabwe. 34Ba Isiraeli bebilila Umukasya Wele waabwe, uwabawonesa nibo khukhwaama isi baasiku baabwe, babaaba babebotokhelela tsimbeka tsoosi. 35Naluundi nibo nga ba Isiraeli baalekha khwookesanisakho bye shiisa shoosi, isi be muungo mwa Jerubayaali (nga niye Gidiyoni), lwe biilayi byeesi aabakholela nibo ta.