Swahili Bible2

6

Gidiyoni ekyela umukayi wa Isiraeli

1Luundi ndi babaandu ba Isiraeli baakhola bye bubwoonaki buukali mu moni ts’Omukasya. Shino shaakila Umukasya waabawaanayo mu makhono ke ba Midiyani khuumala imbuka iye kimiiko musaafu. 2Ba Midiyani bano baaba babaandu baarafu luundi baabi naabi, shishakila ba Isiraeli baatitukha, baatsya beyabila kamafuluma luundi bekholela biifwo bye khukhwiibisamo bibiindi iyo mu njiinji. 3Abe buli lweesi ba Isiraeli babyaalila biilimwa byaabwe, ba Midiyani beetsaatsaka ni bebwakala ba Isiraeli, nga bali atweela ni ba Amaleki, ni khuutubakho kamanaambo kakaandi khukhwaama ibwaamanyaanga. 4Abe beetsa bebuusa atweela, boonakisa biilimwa bye ba Isiraeli, khuutsya khukhwoolela ilala i Gaza. Shino abe bashikhola balekha ba Isiraeli nga sibalikho na khaandu khoosi khe khuulya ta, nga bayilaka oba kamasheese oba tsikhaafu atweela oba tsisikilya. 5Baasiku bano abe ndi beetsila ilala ni bibyaayo byaabwe, ni kamasari kaabwe, beetsa beyibina shibala she ba Isiraeli ni tsiŋamila tsaabwe baafwaana busa nga tsiisike, nga sibabalikha nakhubalikha ta. Baryo baameenyawo khukhwoolesa shibala shoosi sha Isiraeli ni shaliibwa shaarama shishoomu busa.

6Baryo ba Midiyani baayila buli shiindu shoosi, baalekha ba Isiraeli nga bataambataamba busa. Lwanyuma ba Isiraeli baalilila Umukasya lwe buyeeti.

7Nga ba Isiraeli baliliile Umukasya khulwe ba Midiyani, 8Umukasya waabarumanila umuŋoosi uweetsa isi bali waabalomela ari, “Umukasya Wele wa Isiraeli ababoolela inywe ari: Ise nabarusa inywe khukhwaama mu bukulwa mu shibala she Misiri. 9Ise nabawonesa inywe khukhwaama isi ba Misiri, ni khukhwaama isi babaandu ba muno babaababonabonisa inywe. Nawoona baasiku beenywe boosi khukhwaama mu shibala shino, naabawa inywe liiswa lyaabwe. 10Ise ndi Wele weenywe, naluundi nababoolela ndi mukhesaayakho ba wele be ba Amori ta, abe yakhaba nga mulikho mumenya mu shibala she ba Amori beene. Ne inywe mwaalekha khuumbuliilisa ise ta.”

Umukasya arobola Gidiyoni

11Kila malayika w’Omukasya eetsa mu shiriimba sha Ofura, wekhala aasi e kuusaala kuboofu kukwaba kwa Yowasi, uwe mu shikuuka sha Abiyezeri. Mutweela khu baana ba Yowasi isi baalaanga bari Gidiyoni aaba nga ali aambikho awo, nga alikho awuula iŋaano aasi mwilowo, isi ba Midiyani bakhanyala baamubonela ta.

12Malayika w’Omukasya waabonekhawo, waakanikha isi Gidiyoni nga aloma ari, “Iwe umusoolani uwe kamaani, Umukasya ali ni nawe.”

13Naye Gidiyoni waamwiilamo ari, “Musakhulu, ne siinga Umukasya aba ali khu lubeka lweefwe, lwashiina bino byoosi bikhukwiilekho biri? Khwawulila khu bye kamakaanga byeesi Umukasya akhola, waawonesa bakuuka beefwe khukhwaama mu bubowe i Misiri. Ne ari bona Umukasya waakhwantsukha ifwe, waakhulekha mu makhono ke ba Midiyani.”

14Shikila Malayika waashuukha luundi waamulomela ari, “Gidiyoni, n’utsye ni kamaani keesi uli nako, uwonese ba Isiraeli khukhwaama mu makhono ke ba Midiyani. Ise niye uli khuukhurumana khuutsya.”

15Naye Gidiyoni weelamo ari, “Ne Umukasya, ise inyala ndyeena khuuwonesa Isiraeli? Shikuuka shase nisho shishifuura khuuba she aasi mu Manase mwoosi, ni nase niye ufuura bukyeekhe muungo mweefwe mwoosi.”

16Malayika naye waamwiilamo ari, “Gidiyoni, ise kane intsye ni nawe. Ni nawe uryo kane unyalise khuuwula ba Midiyani bano boosi, ufwaane nga uli khuusoolanisa umuundu mutweela busa.”

17Gidiyoni weelamo ari, “Ni shiba sha ŋali shiri ise ari naasiimibwile mu moni tsoowo, utsya khunjeeta, n’ukholeyo khaabonelo khakhokesanisa khari ilala iwe niye Umukasya uli khuukanikha ni nase. 18Naakhwikoontseleele ukharurawo waatsya ta, iniindekho khukhwoolesa nikane indeereyo shiwaanwa is’uli.”

Malayika naye weelamo ari, “Mbaawo buubi ta. Ise kane iname ano ikhuliinde.”

19Aryo Gidiyoni waatimaka khaangu muuntsu yeewe, weerayo imbusi imbolu buulayi, waakiteekha. Waaŋoonaŋoonayo ni bukaati bubukhalimo kamamela ta, khukhwaama mu bufu bubwoola nga tsikilo likhumi. Nga byoosi byaweele buulayi, waara tsinyama mu shiipo, ni supu wayo waamutsukha mu khasaatsi. Aryo waasuta byoosi, tsinyama, supu, atweela ni bukaati tsana, waabireerera malayika uwaba wekhaale aasi e kuusaala kuboofu tsana.

20Malayika wa Wele tsana waalomela Gidiyoni ari, “N’uyile tsinyama tsino atweela ni bukaati buno, ubire khu lwaanda luno, lwanyuma utsukhakekho supu yuno.” Aryo Gidiyoni waakhola nga n’amulomela. 21Malayika w’Omukasya yuno aaba nga wahaambile imiimbo mu mukhono kweewe, waakitiilisa khu nyama ni bukaati. Kumulilo kwaatindiima khukhwaama mu lwaanda, kwoosha tsinyama ni bukaati bweene. Lwanyuma malayika tsana waakoraanawo. 22Ne lwanyuma Gidiyoni n’ashimanya ari yuno aba malayika w’Omukasya, waakuukuulila angaaki ari, “Umukasya uwe shiriifwa! Ise naaboone malayika w’Omukasya mu moni khu moni.”

23Ne Umukasya welamo Gidiyoni ari, “Mbaawo buubi ta. Ukhabakho ni she khuurya khwoosi ta. Iwe s’utsya khuufwa ta.”

24Abweene awo, Gidiyoni wombekha shisheeso she khukhwisaayilakho Umukasya, waashitwiikha lisiina ari, “Umukasya niye Lukoosi.” Shisheeso shino shishiili mu Ofura, mu khakuuka kha Abiyezeri khukhwoolesa ni shaleelo shino.

25Mu shilo sheene isho, Umukasya waakanikha isi Gidiyoni ari, “N’uyile iwuunwa imoosi khukhwaama mu litaala lya paapawo, naluundi uyile iwuunwa ikhola khabili iyoolesa kimiiko musaafu. Utsye ufuniaakake shisheeso khweesi paapawo esaayila Bayaali, umenyulake kusiindi kwa Ashera kweesi baasimikhawo. 26Abweene awo wombekhewo shisheeso she khukhwisaayilakho Umukasya Wele woowo, khu ngaaki khwe lukiingi. Uraambise kusiindi kwa Ashera tsana kweesi umenyulakile khuuba tsiikhu, wiire iwuunwa tsana, ukyoshelekho khuuba shiwaanwa isi Umukasya.”

27Aryo Gidiyoni waarobolayo babaakaanisi beewe likhumi khuumuyeetakho, waatsya waakhola nga Umukasya n’amulakila. Ne lwekhuuba Gidiyoni aarya naabi khulwe be muungo mweewe ni khulwe babaandu be mu shiriimba, waalekha khubikhola kumuusi ta, ne byoosi waabikhola mu shilo.

28Babaandu be mu shiriimba ni benyukha kumutikhinyi, baabona nga shisheeso sha Bayaali shoonakisibwile, ni kusiindi kwa Ashera nga baakuremile. Nibo baamanya bari shisheeso shishaakha shoombakhibwile, nga khulikho ni bunyama bwe wuunwa bubwaramakilakho.

29Babaandu bereeba bari, “Ne naanu uwakholile shishiindu nga shino?” Ne ni baatsya nga beloosela khuureebelesa, aabawo umuundu uwababoolela ari, “Gidiyoni, umwaana wa Yowasi niye uwashikhola.”

30Kila babaandu be mu shiriimba batsya baalomela Yowasi bari, “Khureerere ano umusooleli woowo. Niye akhiile khukhwiiribwa khulwekhuuba niye uwoonakisile shisheeso sha Bayaali, naluundi niye uwaremakile kusiindi kwa Ashera.”

31Ne Yowasi walaangilila angaaki isi wanamuundu ari, “Inywe nibo babaakana khukhwiliyaasila Bayaali? Inywe nibo babaakana khumuwotsela niye? Nimuba nga inywe babaakana khuumusoolanila, kane mwiriibwe nga antsye bushiili khusha ta! Ne Bayaali naaba nga ilala ali wele, ni mumulekhe umweene esoolanekho khulwooyo uwafuniaakile shisheeso sheewe.”

32Khukhwaamila abweene awo, lisiina lwa Gidiyoni lyashuusibwa baamulaanga bari Jerubayaali, shishimanyisa shiri, “Lekha Bayaali umweene asoolane ni naye”, lwekhuuba niye uwafuniaakile shisheeso sheewe.

33Lwanyuma kamaye ke ba Midiyani, ni ke ba Amaleki, ni ke babaandu babaandi be bwaamanyaanga betubaasa atweela khuukana khuusoolanisa Isiraeli. Baryo baakhalisa luluutsi Yorudaani, beetsa bebuusila mu Litila lya Yezureeli. 34Ne Umwoyo w’Omukasya weekha khu Gidiyoni, aryo waafuura tsikhoombi, khuulaanga liiye lye ba Abiyezeri beetse bamuloondekho. 35Naluundi waarumanisa baarume khuutsya mu bikuuka bya Manase, ni Asheri, ni Zebuluni, ni Nafutaali khukhwiitsa khukhwitubaasa khu liiye. Baryo boosi beetsa khukhwakaanana.

36Kila Gidiyoni aloomba isi Wele ari, “Ilala iwe n’uba nga uli khuutsya khuwonesa ba Isiraeli bano nga unaambisa ise nga ni wasuubisa, 37n’ushookesanise musaambo ndi: ise mu shilo shino kane imbiikhe faamba aasi isi khuuwuulila iŋaano. Ne siinga kumutikhinyi inyoola nga faamba yenyene niye utorire lwe liime, ne aasi isi ali nga akhwoomu busa, ilala ise kane ishimanye ndi iwe uli khuutsya khunjeeta ise nga niwasuubisile.” 38Kumutikhinyi kukweelakho shaba shaakholikhile shiryo. Gidiyoni waawuuna naabi kumutikhinyi, waakhamula faamba uyo mwaamamwo kameetsi ke liime kaketsusa shikopo shibuufu.

39Lwanyuma Gidiyoni waalomela Wele ari, “Ukhaakhalalila ise ta. N’ufukiilile ikhakekho faamba yuno kumuluundi kuundi mutweela kwonyene, nio niikakasile ilala khuumanya ndi, iwe kane unjeete. Khu muluundi kuno khola faamba abe umwoomu busa, ne aasi isi ali abe akhunyilifu lwe liime.” 40Shiilo isho Wele waakhola nga Gidiyoni n’amuloomba, waakhola aasi aatora, ne faamba niye waaba umwoomu.