Swahili Bible2

5

Kumweenya kwa Debora ni Baraka

1Lwanyuma lwe buusoolo khu shifukhu sheene isho, Debora ni Baraka umusooleli wa Abinowamu beemba kumweenya kuno:

2Nga baaraangilisi be mu Isiraeli baraangiile iburaangisi,

nga babaandu ba Isiraeli bewaanileyo khubwaabwe khuubaloondelela,

khuukhuruuya iwe O Umukasya.

3Rekeeresa inywe bayiinga!

Ni muwuliilise inywe baawuli,

nga ise ni niimbila Umukasya Wele wa Isiraeli kumweenya.

4O Umukasya Wele wa Isiraeli,

iwe nga niwaama i Seyiri,

nga ni wakhuumba khukhwaama iyo isi babaandu ba Edomu bamenya,

shibala shoosi shaanikina, ni likulu lyaatsukha ifula,

ilala kamafuumbi kaatsukha kameetsi.

55.5: Luky 19.18Tsinjiinji tsatengaala lwe khukhwiitsa khw’Omukasya,

ni lukiingi lwa Sinaayi nalwo lwanikina mu moni ts’Omukasya, Wele wa Isiraeli.

6Mu mbuka ya Shamugari umwaana wa Anasi,

ni mu biifukhu bya Yayeeri, babaandu sibaakana khukyeendela khu nguudo ta,

ne bakyeendaani baakana naabi tsintsila tse mu byaalo.

7Babaandu be mu byaalo baaweelamo ilala,

khukhwoolesa Debora ni eetsa khuukhiinga Isiraeli

nga maayi nakhiinga babaana beewe.

8Ba Isiraeli ni baakhalawo khukhwisaaya ba wele babaandi,

buusoolo bwabalukhawo mu bilibwa bye biriimba byaabwe.

Ne nibo mu mikaanda kine kye ba Isiraeli,

baaba nga sibalikho ni tsingabo namwe kamafumo ke khusoolanisila ta.

9Khuusiima khwe mu mwoyo kwase khutsya isi baaraangilisi be ba Isiraeli,

ni isi baselikhale babaabaloondelela.

Nashiryo ruuya Umukasya.

10Nimurekeerese, inywe mweesi babaakyeendela khu sikilya tsiwaanga,

naluundi babekhala khu biikhalo byakhwo biiŋooneŋoone buulayi,

atweela ni naabo babaakyeendela khu bikyele.

11Murekeerese kamakono ke babeembi be kimyeenya

babaabusaniile aambi ni kamalowo ke kameetsi.

Nibo bebaluusa khu khuwula khw’Omukasya khuukwalaafu,

ni khuuwula khwe baselikhale be mu Isiraeli.

Baryo nio lwanyuma babaandu b’Omukasya baakhuumba

khuutsya khu bilibwa bye biriimba nga beemba.

12Yinyukha uraangile, Debora yinyukha uraangile!

Yinyukha uraangile, yinyukha khukhuumbe ni kumweenya.

Yinyukha nawe Baraka,

fwakhila baasiku boowo, O iwe mwaana wa Abinowamu.

13Babaandu b’Omukasya babaaramakho

beekha nga bakhuumba atweela ni baakhulu baabwe,

baatsya basoolanisa baasiku baabwe be kamaani.

14Balala beetsa nga baama mu Efurayimu,

shiifwo abe shishanyoowa khuumenyamwo ba Amaleki.

Babaandi baama mu Benyamini nabo beetsa boongakho.

Baakhulu babaandi baraangilila baama mu Makiri

ni naabo babaasuta kumusyeendo kwe buukhulu baama mu Zebuluni.

15Baawuli ba Isakaari beetsa nga bali ni Debora.

Ilala babaandu ba Isakaari baaloondakho khu Baraka

bekhilila khukhwoola mwitila.

Ne mu shikuuka sha Rewubeni baaba nga

bali ni khukhwikanakana khuukali mu myoyo kyaabwe.

16Inywe be mu shikuuka sha Rewubeni,

lwashiina mwekhala ingo mwaarama nga muli mu mataala ke kamakheese,

mwarama busa nga muwuliilisa busa khuumalaala khwako?

Mu shikuuka sha Rewubeni mwabeelamo ilala khukhwikanakana khwe mu myoyo.

17Babaandu be mu Gileyadi baarama shanjelekha wa Yorudaani.

Ne shikuuka sha Dani, lwashiina baarama nga bali khu meeri tsaabwe?

Ni shikuuka sha Asheri baarama nga sibenaanileyo ta,

baarama busa khu ndulo khwe nyaantsa isi tsimeeri tsiwolela.

18Ne babaandu ba Zebuluni bewaanilayo ilala buulamu bwaabwe aambi bafwe,

ni babaandu ba Nafutaali nabo baryo baatsya bebwakala baasiku mwisoolanilo.

19Bayiinga be babaandu ba Kanani beetsa

baakhusoolanisa ifwe khu luutsi lwa Taanaki aambi ni tsisebele tsa Megido,

ne sibaanyalisa khuukhunuulakho bye buyiindifu byeefwe ta.

20Tsinieniesi mu ngaaki natso tsasoolana.

Tsinieniesi nga tsiibotokhelela mu nguudo tsatso tsasoolana ni Sisera.

21Luluutsi Kishoni lwabeeyawo lwaabayila,

luluutsi ulwo lwe khaale Kishoni,

kumwoyo kwase khuumba nga wiloosela ni kamaani koosi.

22Awo lwanyuma bibatasi bye tsiŋwaaŋwa byasiindakilisa aasi ni kamaani,

byasiindakilisa aasi ni kamaani ke bye buusoolo bwa Sisera.

23Malayika w’Omukasya waaloma ari,

“Khayo babaandu be mu shiriimba Merozi batsubibwe!

Khayo nibo batsubibwile ilala

lwekhuuba nibo sibeetsa khuuyeetakho Umukasya ta,

khuuyeeta Umukasya khusoolanisa baasiku beewe ta.”

24Ne Yayeeri niye aweebwe naabi tsikhabi,

niye umukyelama wa Heberi uwe mu shikuuka sha Keni.

Ni mumuwe niye tsikhabi khuufuurisa bakhasi

babaaramile boosi babaamenya mu bisari.

Niye aweebwe tsikhabi khufuurisa bakhasi babaandi boosi.

25Sisera aamuloomba kameetsi,

Yayeeri waamuwa niye kamabeele.

Waamuwa luboonda mu shiseesi shishaakhila baayiinga.

26Aryo waatsanuusa kumukhono kweewe mu lisari waabukula shitsaangi,

waaraambisa kumukhono kweewe kumulayi, waabukula inyoondo.

Aryo waashisimikha mu murwe kwa Sisera,

waaraakaka shishoongo sheewe.

Waakhwiikha shitsaangi ni nyoondo,

shaasalanisaka kumurwe kweewe.

27Aryo Sisera waawetsekhelela busa,

waakwa aasi khu meesikamo keewe,

waakwa nga waafwiile aasi e bikyele bya Yayeeri.

28Maayi wa Sisera waalolela mwitilisa.

Nga alolela mwitilisa waaba nga waaliindiliile khuukobola khweewe,

nga aloma ari, “Shiina kila shikaali sheewe shikhali khukhwiitsa?

Lwashiina kila ifwe khukhali khuuwulila khusiindikhana khwe bikaali nga biitsa?”

29Niye ni bakhasi beewe be kamakyesi baawa she khukhwiilamo nisho shitweela,

nga ni naye umweene elaanganamwo bilomo bino:

30“Ali balikho bakabanana bye buyiindifu byeesi bayaayile,

khukhwiyilila umukhasi mutweela namwe babili isi buli musaani.

Bikwaaro bibifuura khuubonekha buulayi khulwa Sisera,

bikwaaro byeesi baaronaka buulayi mu raangi ifuura buulayi khulwase.”

31Umukasya, khali baasiku boowo boosi bafwiile nga Sisera n’afwa.

Ne khayo abo boosi babaakhukana iwe baburukhe

nga inyaanga niyoosha ni buurafu bubufuura.

Awo lwanyuma abawo lukoosi mu shibala she ba Isiraeli khuumala kimiiko kamakhumi kane.