Swahili Bible2

4

Debora ni Baraka

1Lwanyuma lwe khuufwa khwa Ehudi, ba Isiraeli ndi luundi beelooselela ilala khuukhola bye bubwoonaki mu moni ts’Omukasya. 2Isho shaakila Umukasya waabawaanayo mu bunyala bw’omuyiinga Jabini, umuyiinga we Hazori, shitweela khu bisiintsa bye mu Kanani. Umukhulu we liiye lyeewe abe bari Sisera, abe uumenya i Harosheesi-Hagoyimu. 3Liiye lya Jabini lyaba lili ni kamakaali ke bibyuuma bitoondo syeenda (900), baryo baabonabonisa ba Isiraeli luukali khuumala kimiiko kamakhumi kabili kamabuufu. Lwanyuma ba Isiraeli baalilila Umukasya khuubayeeta.

4Aabawo umuŋoosi umukhasi abe isi balaanga bari Debora, umukyelama wa Lapidosi, nga abe Debora yuno niye uwula Isiraeli khu mbuka iyo. 5Abe niye atela khukhwikhala aasi e kuusaala Kusheendu kwa Debora, kukwaba akari a Rama ni Beseli, mu shibala she tsingoongo sha Efurayimu. Abweenewo abe ba Isiraeli beetsa isi niye n’abayeeta khuukhala kimisaango kyaabwe.

6Shifukhu shitweela Debora waarumanisa isi Baraka umwaana wa Abinowamu, abe uumenya i Kedeshi mu shikuuka sha Nafutaali. Aamurumanisa nga aloma ari, “Umukasya Wele wa Isiraeli akhulakila iwe ari utsye nga uli atweela ni basaani kumukaanda mutweela (10,000) khukhwaama mu bikuuka bya Nafutaali ni Zebuluni, ubaraangilile khukhwoola khu lukiingi Tabori. 7Ibweeneyo Umukasya kane akhonjelese Sisera eetse nga waaraangiliile liiye lya Jabini nga busheele, khuukhusoolanisila aambi ni luluutsi Kishoni. Ne Umukasya kane amuwaaneyo mu makhono koowo.”

8Baraka weelamo Debora ari, “Khuutsya kane intsye, ne khuurusakho nga iwe uli khuutsya ni nase. Ne nga siwaafukiilisile khuutsya ni nase, nase singene intsye ta.”

9Debora naye weelamo ari, “Mbaawo buubi ta, kane khutsye. Ne ndi khuukhureewula ndi Umukasya atsya khunyalisisa umukhasi khuuba nga niye unawula Sisera. Nashiryo mbaawo umuundu unakhwiisamo iwe lukoosi bari lwekhuuba waawulile mu busoolo ta.” Baryo Debora ni Baraka benyukha baatsya i Kedeshi. 10Nga bali i Kedeshi iyo, Baraka walaanga atweela shikuuka sha Zebuluni ni sha Nafutaali, ni khuutubakho baselikhale kumukaanda mutweela (10,000). Boosi atweela baakhuumba baatsya nga baloondelela Baraka, nga Debora naye ali atweela ni nabo.

11Khu mbuka yino, Heberi uwaba uwe mu shikuuka sha Keni aaba nga waawuuya khuurura mu balebe beewe, aba amenya aambi ni kuusaala kwe kamaani i Zananimu shishaba aambi ni Kedeshi. Babaandu ba Keni bano baaba babetsukhulu ba Hobabu, uwaba paapa umukhwe uwa Musa4.11 Hobabu: Alala bamulaanga bari mukhwaasi wa Musa.

12Ne Sisera n’awulila bari Baraka umwaana wa Abinowamu weetsile ali khu lukiingi Tabori, 13walaanga atweela liiye lyeewe lyoosi, waarekekha ni kamakaali ke bibyuuma bitoondo syeenda (900). Aryo waaraangilila baselikhale beewe bano, baakhuumba khukhwaama i Harosheesi-Hagoyimu, baatsya khu luutsi Kishoni.

14Lwanyuma Debora waalomela Baraka ari, “Ari yirekekha, iyi niyo imbuka iye khukhwibwakala Sisera. Lwekhuuba shaleelo shino, Umukasya waamukhuweele mu makhono koowo khuumuwula. Ilala Umukasya waaraangiile khaale khuutsya khuukhusoolanila iwe busoolo buno.” Aryo Baraka waraangilila kumukaanda mutweela kye liiye lyeewe, beekha khukhwaama khu lukiingi Tabori khuutsya mu busoolo. 15Baraka n’abebwakala, Umukasya waabungaasa Sisera ni naabo babaafuka kamakaali keewe, atweela ni baselikhale beewe boosi. Buli mutweela waaba waariire naabi shaakila Sisera umweene waasuna khukhwaama khu shikaari sheewe, waakhakakho khuutitukha nga atima busa. 16Ne Baraka waatimisa baasiku beewe bano atweela ni kamakaali kaabwe, khuutsya khwoolela ilala i Harosheesi-Hagoyimu. Mbaawo n’umuselikhale na mutweela khu liye lya Sisera uwaramakho ta.

17Khuurusakho Sisera umweene niye yenyene uwatima waatsya woola mu lisari lya Yayeeri, umukyelama wa Heberi, uwe mu shikuuka sha Keni. Lwekhuuba abe ba Keni bano baaba bali basaale ni Jabini, umuyiinga wa Hazori. 18Yayeeri waarura ibulafu khuumwakaanila nga amuloma ari, “Musakhulu, niwinjile mu lisari lyase. Naakhwikoontseleele, nuwinjile. Ukhabakho ni she khuurya shoosi ta.” Aryo Sisera wenjila mu lisari, Yayeeri waamubiimbakho libulaangiti. 19Sisera tsana waalomela Yayeeri ari, “Buulesa bwantsira. Ikhuloomba ndi n’umbekho kameetsi.” Aryo Yayeeri waafuunula isutilo yeewe, waamuwakho kamabeele, weelayo waamubiimbakho luundi.

20Sisera waalomela Yayeeri ari, “Yiimikha imulyaango. Nikane ubone umuundu yeesi uwiitsa nga areebelesa khuumanya naanu uuli mukari muno, umwiilamo uri mbaawo ta.”

21Ne Sisera lwe buuluwe buukali waarakikha khuufuura liilo, naye Yayeeri waasoota mbola nga ali ni nyoondo ni shitsaangi she lisari mu mukhono, waatsya waashisimikhila mu murwe kweewe, shaabiramo sheekha mwiloba, Sisera waafwa na khufwa.

22Khu mbuka iyo Baraka weetsa nga aweentsa Sisera. Yayeeri waarura ibulafu khuumwakaanila. Waalomela Baraka ari, “Yiitsa mukari ano, ni nase kane ikhwookese umuundu isi abe uli khuweentsa.” Aryo Baraka waamuloondakho khuutsya mu lisari, waanyoola nga Sisera walaambiile awo umufu khaale, nga ni shitsaangi shishiili mu murwe kweewe.

23Khu shifukhu isho, Wele waawula umuyiinga Jabini uwe mu Kanani, khulwe ba Isiraeli boosi. 24Ni khukhwaamila khu shifukhu sheene isho, ba Isiraeli beekyela be kamaani naabi, beloosela khuweetsekhelesa umuyiinga Jabini, khukhwoolesa ni baamumalilawo ilala.