Swahili Bible2

3

Kamanaambo kakaaramawo mu shibala shisuubise

1Aryo Umukasya waalekhamwo kamanaambo kakaandi khuukhakilisa babaandu ba Isiraeli, abe babaakhoolatsakakho mu busoolo bubwaba mu Kanani ta. 2Isho Umukasya aashikhola nga sheesi akana nikhwo khuunyalisa ba Isiraeli be kumuboolo ukwo, abe babaakhaasoolanatsakakho mu busoolo ta nabo beeyike. 3Abo babaarama mu shibala shino baaba nibo bano: ba Firisitiya ni bayiinga baabwe baraano, ni khuutubakho ni ba Sidoni, ni ba Kiivi babaaba bamenya mu njiinji tsa Lebanoni, khukhwaamila khu Lukiingi Baali-Herumoni khukhwoola i Lebo-Hamasi. 4Kamanaambo kano kaalekhebwamo khuukhakilisa babaandu ba Isiraeli, khuubona nga ilala abe banyala baatsiila khu makaambila keesi Umukasya aawa Musa khuukawa bakuuka baabwe.

5Baryo babaandu ba Isiraeli baamenya atweela ni ba Kanani, ni ba Hiiti, ni ba Amori, ni ba Perizi, ni ba Hiivi, atweela ni ba Yebusi. 6Baayilana mu bukhwaale; nga ba Isiraeli bayilana ni babaandu be kamanaambo kano, shino shaakila nabo baarakikha khukhwisaaya ba wele be kamanaambo kano.

Umukayi Osinieli

7Babaandu ba Isiraeli ndi baarakikha khuukhola bibiindu bye bumoyaani, beebilila Umukasya Wele waabwe, ndi baarakikha khukhwisaaya ba Bayaali ni ba Ashera. 8Shino shaakila lirima lyaniinaniina Umukasya, waalekha babaandu ba Isiraeli khuuwulibwa n’umuyiinga Kushani Rishasayimu uwe shisiintsa sha Siriya she ngaaki. Baawula ba Isiraeli khuumala kimiiko shinaane nga balakila buli mutweela khuusasula kumusolo. 9Ne imbuka ni yoola, nibo baalilila Umukasya lwe buyeeti. Aryo Umukasya waabarobolela Osinieli, umwaana wa Kenazi, wandaaye wa Kalebu umukyeekhe, khuubawonesa. 10Umwoyo w’Omukasya weekha khu Osinieli, wekyela umukayi wa Isiraeli, waabaraangilila khuutsya mu busoolo khuusoolana ni Kushani Rishasayimu umuyiinga wa Siriya. Umukasya waawa Osinieli buunyali, waamusoolanisa, waamuwula. 11Abweene awo ba Isiraeli baafunakho lukoosi mu miiko kamakhumi kane, khukhwoolesa khu khufwa khwa Osinieli umwaana wa Kenazi.

Umukayi Ehudi

12Luundi ndi ba Isiraeli baarakikha khuukhola bye bumoyaani nga bamiinyaalila Umukasya. Ndi khulwa shino, Umukasya waabasiindikhila umuyiinga Egiloni uwa Mowabu, waabasoolanisa waabawula. 13Umuyiinga Egiloni yuno aabuusa ba Amori, ni ba Amaleki beetsa betubaasa ni naye, nio lwanyuma waatsya webwakala ba Isiraeli. Nabo baryo atweela baatsya bawaamba shiriimba Yeriko. 14Aryo umuyiinga Egiloni waawula Isiraeli khuumala kimiiko likhumi na shinaane.

15Babaandu ba Isiraeli ndi belootsela Umukasya lwe buyeeti. Ndi luundi Umukasya waabarobolela Ehudi, khuuba umuwonesi waabwe. Ehudi yuno aaba umusaani umunyeletsi, umwaana wa Gera, uwe mu shikuuka sha Benyamini. Babaandu ba Isiraeli baarumana Ehudi mweene khuuyila biwaanwa bye kumusolo kukwabuusibwa isi umuyiinga wa Mowabu, Egiloni. 16Ne nga ashiili khutsya ta, Ehudi wekholelayo lurima lwe bubwooki bubili, waalwisabikha khu liraango lyeewe lye khu mukhono kumulayi, waabiimbakho tsingubo tseewe.

17Aryo Ehudi waatsya wahaanayo biwaanwa bino isi umuyiinga Egiloni uwa Mowabu, uwaba umusaani umunere naabi. 18Lwanyuma lwe khuuwaanayo biwaanwa bino, Ehudi waalomela basaani babaamuyeetakho khuururawo batsye. 19Ne lwanyumakho nga boolile aambi ni kamabaale kamabeetse i Gilugaali, niye umweene waashuukha weelayo isi umuyiinga Egiloni. Waatsya waamulomela ari, “O Umuyiinga, ise ndiyo ni buurume bwoowo bwe mu shimoonyo busa.”

Kila umuyiinga aloma ari, “Ukhanyoowa waalomakho ilomo yoosi ta.” Lwanyuma babaakaanisi beewe boosi baarura mu khaseenge kheesi baabamo. 20Kila Ehudi wesyeenda aambi ni naye. Umuyiinga aaba wekhaale iyo yenyene khu shitsoloŋo sheewe, mu shiseenge she angaaki she mu lubili lweewe. Ehudi waamutsyayo waamulomela ari, “Ise ndiyo ni buurume bwoowo khukhwaama isi Wele.” Umuyiinga wenyukha weemikha khu ngaaki. 21Lwanyuma Ehudi waasowoolayo lurima lweewe, nga araambisa kumukhono kweewe kumunyeletsi, waawuna lwenjila muunda mwa Egiloni mukari. 22Lurima lwoosi lwaweelamo lwaakoraanila mukari mu minaawa kyeewe. Ehudi s’alukhweesamo khuururusamo ta. 23Lwanyuma Ehudi waarura ibulafu, weekalawo kimilyaango kye shiseenge she angaaki, waakhomekhela ilala. 24Ne lwanyuma nga waatsiile, babaakaanisi b’omuyiinga baakobola baanyoola nga kumulyaango kwe shiseenge she angaaki kushiili kumwikale. Nibo baarama nga bambaasa bari, “Manya lukanile umuyiinga ashiili mukari ashiyeeta.” 25Baryo baarama nga beemile awo, khukhwoolesa ni baabona bari baaluwile. Shino shaakila baabukula bifuungo, bekulawo kumulyaango baanyoola nga umuyiinga Egiloni wakwiile aasi, wafwiile. 26Ne khu mbuka iyo, ni baaba nga bashiliinda, Ehudi aarura, waabirira mu mulyaango kwe kamabaale ke bifwaani, waatsya, waatitukhila i Seira. 27Nga n’olayo mu shibala she mu ngoongo sha Efurayimu ari, waafuura ikhoombi khuulaanga basaani ba Isiraeli boosi khukhwiitsa atweela. Nga boosi beetsile is’ali, 28waabalakila ari, “Nimunoondekho! Umukasya kane akhuyeete khusoolanise khuwule baasiku beefwe ba Mowabu bano.” Baryo ba Isiraeli baaloonda khu Ehudi, khukhwikhilila khukhwoola khu litila lya Yorudaani. Baatsya nga bawaambaka biifwo mweesi babaandu bakhalisila luluutsi khuutsya i Mowabu, baalekha khufukiilisakho umuundu yeesi khuukhalisa ta. 29Khu mbuka iyo baatsya nga beeraka babaandu boosi, buusoolo khuutsya khuwakho, baaba nga beerire basaani be kamaani baboola nga kumukaanda mutweela (10,000) kwe baselikhale ba Mowabu. Mbaawo na mutweela uwatitukhakho ta.

30Khu shifukhu isho, ba Isiraeli baawulila ilala ba Mowabu, baayila imbuka indeeyi nga sibeelakho luundi khuuluumba ba Isiraeli ta. Awo ba Isiraeli baabakho ni lukoosi khuumala imbuka ye kimiiko kamakhumi shinaane.

Umukayi Shamugari

31Lwanyuma lwa Ehudi, Shamugari umwaana wa Anati niye uwekyela umukayi uwawonesa Isiraeli. Mu busoolo bwe shifukhu shitweela, aaraambisa likyooki lilyokiya3.31 Likyooki: Shisaala sheesi babowa mu milo mwe tsikhaafu tsitsiilima khuutsitubaasa atweela, weera ba Firisitiya bitoondo bisesaba (600).