Swahili Bible2

21

Bakhasi be basaani be mu Benyamini

1Ba Isiraeli ni baabuusanila i Mizipa betsuba bari, “Mbaawo na mutweela khusiifwe, uliwaanayo umukhaana weewe khukhwaalikha isi umusaani yeesi uwe mu shikuuka sha Benyamini ta.” 2Lwanyuma lwe buusoolo ni babaandu ba Benyamini, ba Isiraeli baatsya mu shifwo she khukhwisaayilamo Wele i Beseli. Baatsya bekhala ibweene iyo khukhwoolesa antsye ni bwelabula, baaba nga bakhupa luwuungu, nga balila luukali. 3Balila nga baloma bari, “O Umukasya Wele wa Isiraeli, lwashiina shino shikholekhele mu Isiraeli? Ari bona shitweela khu bikuuka byeefwe sishiliwo ta.”

4Shifukhu shisheelakho kumutikhinyi mamilimili, babaandu boombekha shisheeso, booshelakho biwaanwa bibyooshe, ni biwaanwa bye lukoosi. 5Lwashino bereeba bari, “Shikuuka shiina mu Isiraeli shishikheetsile khuubawo nga nikhwabeele ni lubusano lweefwe i Mizipa isi Umukasya?” Mu biseela ibyo, baaba nga baakhola shishitsubo mu moni ts’Omukasya, nga betsuba bari umuundu yeesi uwiikaana khukhwiitsa mu lubusano, aakha khukhwiiribwa.

6Babaandu ba Isiraeli bewulila kumutaambo kumukali naabi khulwa waandayaabwe Benyamini, kila baloma bari, “Iliwo shikuuka shitweela shishikhaliwo ni nafwe ta shaleelo. 7Ari kane khukhole khuryeena khunyoolela bafwiiti babaaramilewo abo bakhasi? Lwekhuuba ifwe khwaamala khukhwitsubila mu moni ts’Omukasya, khuulekha khuwaanayo bakhaana beefwe isi bali ta.”

8Shikila bakyelawo bareebana bari, “Manya iliwo shikuuka shishikhaabeelewo nga ni khwabuusaniile i Mizipa?” Abweene awo baashifumbula bari mbaawo na mutweela uwaama i Yabeshi-Gileyadi ta. 9Lwekhuuba baabala babaandu, baatsya benyoola nga mbaawo na mutweela uweetsa khukhwaama i Yabeshi-Gileyadi ta. 10Shikila lubusano luno lwasiindikhayo i Yabeshi-Gileyadi baselikhale baabwe babafuura burafu, baboola nga kumukaanda mutweela ni bikana bibili (12,000), nga babalakila khuutsya bahese buli umuundu yeesi uweeyo, khuutubakho bakhasi ni babaana beene. 11Baabaloma bari, “Ni mutsye, mwiire buli musaani yeesi uliyo, na buli mukhasi yeesi ukhali indungubaasi ta.” 12Mu baandu abe babaali i Yabeshi-Gileyadi, baanyoolamo bakhaana bitoondo bine, abe babashili tsindungubaasi. Babeene abo babareera i Shilo, mu shibala she Kanani.

13Lwanyuma ba Isiraeli baarumanisa isi babaandu be mu shikuuka sha Benyamini, abe babeebisa khu lwaanda lwa Rimoni, nga babafukiilisa khuureerawo lukoosi. 14Baryo babaandu be mu shikuuka sha Benyamini abo baakobola khu mbuka iyo. Ba Isiraeli baabafukiilila khuyilaka bakhasi bitoondo bine tsana beesi baamisa i Yabeshi-Gileyadi. Ne ndi bakhasi beene bano baalekha khubamala ta. 15Kumutaambo kwaawaamba ba Isiraeli khulwe ba Benyamini, lwekhuuba Umukasya aaba waareerewo lulwaakha luno akari e bikuuka bya Isiraeli bino.

16Lwanyuma baasakhalu be mu Isiraeli kila baloma bari, “Khunakhola khuuryeena khuunyoolela basaani babaaramile bano bakhasi, lwekhuuba bakhasi boosi be mu shikuuka sha Benyamini baahela khaale. 17Yakhiile khuubawo baasikha be babaandu babaaramawo be mu shikuuka sha Benyamini, nio shikuuka shino shilekhe khuweelawo ilala mu Isiraeli ta. 18Ne ndi ifwe sikhunyala khuuwaanayo bakhaana beefwe babeene khukhwaalikha iwaabwe ta, lwekhuuba khwakhola shishitsubo nga khuloma khuri, kane atsubibwe umuundu yeesi uwa umuundu uwe shikuuka sha Benyamini umukhasi.” 19Ne lwanyuma baloma bari, “Ari ili khuutsya khubawo kamayiiya k’Omukasya ka buli mwiiko i Shilo, shishiili ingaaki wa Beseli, imwaalo wa Lebona, naluundi shishiili ibwamanyaanga we lukuuto lulwaama i Beseli khuutsya i Shekemu.” 20Kila balomela babaandu be mu shikuuka sha Benyamini babaaba bashiili khufuna bakhasi bari, “Ni mutsye mwiibise mu mikuunda kyeeyo. 21Muliindile buulayi ibweene iyo, nio nga bakhaana be Shilo beetsa khushina, murure mu mikuunda ikyo, buli mutweela afwakhilekho uyo isi akana khuuba nga umukhasi weewe. Lwanyuma mwiileyo mu shibala sheenywe sha Benyamini. 22Ne nga basaali baabwe ni basaani baabwe beetsile khukhwiluŋuunya, ifwe kane khubaboolele khuri, ‘Ni mukhuwaambile shiisa nga mubayeeta. Lwekhuuba ifwe sikhwanyalisa khufunila buli mutweela khu nibo umukhasi nga nikhwaba mu busoolo ta, ni nanywe simulikho ni kumusaango lwe khuulekha khubawa bakhaana beenywe khukhwaalikhayo ta.’ ”

23Babaandu ba Benyamini bano baakhola baryo nga ni babaalomela. Baatsya bebisaka mu mikuunda, lwanyuma bafwaakhilaka bakhaana be Shilo babeetsa nga bashina lwe kamayiiya, babayila mu shibala she waabwe. Lwanyuma beyombekhela luundi biriimba byaabwe, babimenyamwo.

24Lwanyuma lwa bino byoosi, babaandu ba Isiraeli bano boosi beelakayo, buli muundu nga atsya mu shikuuka sheewe, na buli mutweela nga elayo muungo mweewe.

2521.25: Baak 17.6Mu biifukhu ibyo, mu Isiraeli simwabamo umuyiinga ta, isho shaakila buli mutweela wekholela nga n’akana.