Swahili Bible2

20

Ba Isiraeli basoolana ni ba Benyamini

1Lwanyuma babaandu ba Isiraeli boosi khukhwaamila i Dani khukhwoola i Berisheba, ni naabo babaama mu shibala she Gileyadi, beetsa atweela mu kubungiitsi kutweela. Beetsa beemikha mu moni ts’Omukasya mu shifwo she Mizipa. 2Baaraangilisi be babaandu boosi atweela mu bikuuka byoosi bye ba Isiraeli, beemikhaka mu bifwo byaabwe akari mu baandu ba Wele, baboola baselikhale kimyeeka kine (400,000), nga baasutile tsiindima tsaabwe. 3Lwanyuma babaandu ba Benyamini baawulila bari bikuuka bibiramile bye ba Isiraeli baatsiile khubuusanila i Mizipa. Kila ba Isiraeli bano bareeba umusaani umu Levi bari, “Khuboolele khubone, shishiindu shiibi shino shakholekhile shiryeena?” 4Umusaani umu Levi uwaba umuseetsa w’omukhasi uweeribwa waabeelamo ari, “Ise atweela n’umukhasi wase khwatsya khwoola mu shiriimba she Gibeya shishiili mu shikuuka sha Benyamini, khwaakonela ibweene iyo. 5Ne mu shilo isho, baaraangilisi be shiriimba isho Gibeya beetsa bebotokhelela intsu isi khwabamo. Beetsa nga bakana khukhuuntsira ise, baryo bafwaakhila umukhasi wase, baamukhola bye buyeyani khukhwoolesa n’afwa. 6Isho shaakila ise naakhalaka kumubili kweewe mu bisiintsasiintsa, naabyakaanisaka mu shibala shoosi sha Isiraeli, khukhwookesanisa ndi babaandu bano baaba baakholile shishiindu shiibi naabi luundi she kamaŋaanyu! 7Nashiryo inywe mweesi babaandu ba Isiraeli, mwaakha mukhalewo shiina shishaakha khuukholekha khu baandu be Gibeya.”

8Baryo babaandu ba Isiraeli boosi benyukhila atweela baaloma bari, “Mbaawo na mutweela khusiifwe ukane eeleyo ingo weewe ta. 9Khuurusakho fweesi khutsya khukhalawo khukhwibwakala babaandu be Gibeya. 10Kane khuyile babaandu likhumi khu buli shitoondo shitweela khukhwaama mu buli shikuuka sha Isiraeli, khuutsya nga bayilila baselikhale biilyo bibikanibwa mu busoolo. Ne ifwe basaani babaaramile fweesi, kane khutsye khwibwakale khwiliyaase babaandu be Gibeya.” 11Baryo babaandu ba Isiraeli bano boosi bafukiilisanila atweela bari batsye bebwakale shiriimba Gibeya.

12Babaandu be mu bikuuka bibiramile bye ba Isiraeli bino, baarumanisa buurume khuutsya mu buli shiriimba ni khaakuuka khoosi mu shikuuka sha Benyamini, nga babalomela bari, “Nga shishiindu shino shili shiibi naabi sheesi inywe mwakholile! 13Ari khukana inywe mukhurusile babaandu babaakholile shishiindu shino she kamaŋaanyu mu Gibeya, khubeere khurusewo shitsubo shino mu Isiraeli.”

Ne babaandu be mu Benyamini balekha khuwuliilisa sheesi baabalomela ta. 14Khuurusakho baatsya busa babuusanisa babaandu khukhwaama mu buli shiriimba she mu Benyamini, babuusanila i Gibeya nga berekekhela khusoolanisa ba Isiraeli. 15Ba Benyamini baabuusanisa baselikhale kimikaanda kibili ni bikana bisesaba (26,000) babaatsya nga baabaliile tsiindima. Khu bano nga waakhubalilakho baselikhale bitoondo musaafu babaafuura buulayi mu Gibeya mwoosi ta. 16Mu baselikhale bano boosi, mwabamo baselikhale bitoondo musaafu (700) babaaba baamanyilifu naabi, mu khusoolanisa nga baraambisa kamakhono kaabwe kamanyeletsi, nga buli mutweela khu nibo nga waatuumile libaale mu kholoto, s’akhasikha khuuwaambilisa sheesi akana khuukhupa ta, abe yakhaba lutsuune lutweela aluwaambilisa.

17Ne bikuuka bye ba Isiraeli bibiramile, nga waakhurakho baselikhale be shikuuka sha Benyamini, baaba nga baŋoonaŋoonile baselikhale kimyeeka kine (400,000), nga baabaliile tsiindima tsaabwe.

18Baryo babaandu ba Isiraeli benyukha baatsya mu shifwo she khukhwisaayilamo i Beseli, nga batsya khureeba Wele bari, “Shikuuka shiina shishaakhiile khuunyoowa khuutsya khwibwakala babaandu ba Benyamini?”

Umukasya waabeelamo ari, “Shikuuka sha Yuda shinyoowe.”

19Kuryo kumutikhinyi kukweelakho liiye lye ba Isiraeli lyaatsya lyaabuusanila aambi ni Gibeya. 20Liiye lino lyaatsya khuulola kwe Gibeya, khuutsya khukhwibwakala babaandu ba Benyamini. 21Baselikhale be ba Benyamini baarura mu shiriimba shaabwe Gibeya, baatsya baasoolanisa ba Isiraeli, ni isi antsye bwatsya khwilabulila, nga beerire baselikhale be ba Isiraeli kimikaanda kibili ni bikana bibili (22,000).

22Ne ba Isiraeli baarama nga bali baanyindaalifu naabi, beelayo baabuusanila luundi mu shifwo sheene nisho shitweela mweesi baasoolanila shangoloobe. 23Babaandu ba Isiraeli bano baatsya mu shifwo she khukhwisaayilamo, baalilila Umukasya, khukhwoolesa antsye ni bwelabula. Kila bareeba Umukasya bari, “Ifwe khwiileyo luundi khuusoolanisa babaandu ba Benyamini?”

Umukasya waabeelamo ari, “E e, ni mutsye.”

24Baryo ba Isiraeli baatsya khuusoolana ni babaandu ba Benyamini shifukhu shishiindi. 25Khu luno ndi baselikhale be ba Benyamini beetsa khukhwaama i Gibeya, bebwakala luundi baakhoonya baselikhale ba Isiraeli baboola kumukaanda mutweela ni bikana shinaane (18,000).

26Lwanyuma babaandu ba Isiraeli boosi, atweela ni liiye lyaabwe lyoosi, baaniina baatsya i Beseli, baalilila luukali mu moni ts’Omukasya. Baaba nga babuya ntsala shifukhu isho shoosi khukhwoolesa antsye ni bwelabula. Baareera isi Umukasya ni biwaanwa bye khukhwoosha ni biwaanwa bibiindi bye lukoosi. 27Ba Isiraeli bano baaba bereeba isi Umukasya khuubawa shiina she khuukhola. Khu mbuka iyo, Isanduuku iye Kamakaambila iya Wele yaba ili i Beseli, 28ni Finehasi umwaana wa Eliyazari, umwitsukhulu wa Aroni, aaba nga niye umusaayi. Babaandu ba Isiraeli baareeba Umukasya luundi bari, “Khutsye luundi khusoolanise baandayeefwe ba Benyamini bano, namwe khulekhe?”

Umukasya waabeelamo ari, “Ni mutsye mubasoolanise, lwekhuuba kumukaamba intsya khubawaanayo mu makhono keenywe.”

29Baryo ba Isiraeli baatsya baakoneelela bebotokhelela Gibeya yoosi. 30Khu shifukhu she khaataru, baatsya baabuusanila mu shifwo sheene shitweela nga ni baakhola makiboole. 31Khu luno baselikhale be ba Benyamini ni baarura khukhwibwakala, baabawomela baabayila khuurura mu shiriimba. Baryo nga ni baashikhola makiboole, baarakikha khukhwiiraka ba Isiraeli, baalekha nga beerire baselikhale baboola nga kamakhumi kataru, nga baakwiilakile mu kyeewa ni khu nguudo tsitsiitsya i Beseli ni Gibeya. 32Isho shaakila ba Benyamini baalookhela angaaki bari, “Bona ndi khwaabawulile nga ni khwakhola makiboole.” Ne ba Isiraeli baaba baloma bari, “Ifwe Khakhwilukhe khutsye, nio baselikhale ba Benyamini bakhuloondekho, khubaruse mu shiriimba shaabwe.” 33Baryo baselikhale boosi babaaramile be ba Isiraeli, benyukhaka mu bifwo mweesi baaba nga beebisile, beereka i Bayaali Tamari. Ni baselikhale babaandi be ba Isiraeli babaaba nga baakoneleele aambi ni Gibeya nabo baarura isi baaba khuusoolana. 34Baryo baselikhale baboola nga kumukaanda mutweela (10,000) be ba Isiraeli bebwakala Gibeya nga ba Benyamini baarurire ibulafu. Buusoolo buno bwaba burafu naabi, shaakila ni ba Benyamini baalekha khumanya bari buwaangafu bwaaboolelekho ta. 35Aryo Umukasya waasoolanila ba Isiraeli khuuwula ba Benyamini. Ni khu shifukhu sheene isho, ba Isiraeli baakhoonya baselikhale be ba Benyamini baboola nga kimikaanda kibili ni bikana biraano (25,000), ate bano boosi baaba baamanyilifu naabi mu khusoolana ni tsiindima. 36Baryo lwanyuma baselikhale be ba Benyamini baashimanya bari baabawulile.

Ba Isiraeli baanyoowa khutitukha khukhwaama isi ba Benyamini, nio baselikhale be ba Benyamini baabaloondakho, shaanyalisa khuuwa baselikhale be ba Isiraeli babaaba nga beebisile inyuma, khukhwiibwakala Gibeya. 37Baryo baselikhale be ba Isiraeli babaaba baakoneele aambi nga beebisile, baayubakho khaangu khukhwiinjila mu shiriimba Gibeya, beeraka babaandu boosi babaaba bali mu shiriimba isho. 38Khaabonelo akho kheesi baselikhale be ba Isiraeli baaba nga baafukiilisanilekho, khaaba nikhwo khukhwoosha shiriimba, lisuusi liniine mu ngaaki, 39nio ba Isiraeli babaaba baatitukhile bakobole lwe buusoolo.

Khu mbuka iyo, baselikhale be ba Benyamini baaba nga baamalile khukhwiiraka ba Isiraeli baboola kamakhumi kataru, nga beruuya bari, “Khulikho khubawula mu busoolo nga ni khwakholile mu busoolo bubwanyooyile.” 40Ne ni beshebukha inyuma, baabona lisuusi liikali nga liniina mu ngaaki khukhwaama mu shiriimba shaabwe. 41Baryo basaani ba Isiraeli nabo baashuukha baakobola khukhwibwakala. Khu mbuka yino baselikhale ba Benyamini baabona nga bali mu shikosi shikali naabi. 42Shikila batitukha khukhwaama khu ba Isiraeli, khuutsya iyo i mu mubiimbi. Ne ba Isiraeli baabatimisa nga babaakhoonyaka. Ni babaandu babaandi khukhwaamaka mu biriimba baabayeeta khuubahesa boosi. 43Ba Isiraeli bebotokhelela ba Benyamini, baabatimisa, khukhwoolesa ni baabamalilawo ilala boosi, khu lubeka lwe bwaamanyaanga wa Gibeya. 44Khu shifukhu isho shonyene, baselikhale be ba Benyamini baboola nga kumukaanda mutweela ni bikana shinaane (18,000) nibo babeeribwa. 45Ne baselikhale be ba Benyamini babaaramakho, baashuukha baatima baalola kwe kumubiimbi khu lubeka lwe lulwaanda lwa Rimoni. Ne baselikhale be ba Isiraeli baabaloondakho, beeramo ndi bikana biraano (5,000) baabalekha balaambiile khu nguudo. Baryo beeloosela khuubatimisa khukhwoolesa ni beeramo babaandi bikana biindi bibili (2,000) aambi ni Gidomu. 46Baryo baselikhale be ba Benyamini babaaba basoolani baalayi babeeribwa khu shifukhu isho, baaba boola kimikaanda kibili ni bikana biraano (25,000). 47Babaaramakho khu baselikhale be ba Benyamini baaba bitoondo bisesaba (600) byonyene. Bano baatitukha baatsya mu mubiimbi khu lwaanda lwa Rimoni, isi baamenya khuumala kimyeesi kine. 48Baryo baselikhale be ba Isiraeli beelayo mu buli shiriimba she ba Benyamini, beeraka buli muundu yeesi uwashibamo, khutubaasakho ni tsikhaafu, na buli shiindu shoosi sheesi baanyoolamo. Booshaka buli shiriimba shoosi sheesi boolamo ni kumulilo.