Swahili Bible2

2

Malayika w’Omukasya i Bokimu

1Malayika w’Omukasya waarura i Gilugaali, waatsya i Bokimu, waaha ba Isiraeli buurume khukhwaama isi Umukasya ari, “Ise nabarusa khukhwaama i Misiri, nabaraangilila naabareera mu shibala sheesi samweene netsuba khuushiwa bakuuka beenywe. Khwakhola indakaano isi ise nasuubisa khuulekha khufuniaaka ta, 22.2: Luky 34.12,13; Maka 7.2-5ni nanywe mwasuubisa khuulekha khukhola indakaano yoosi ni babaandu be mu shibala shino ta. Naluundi mwafukiilisa khufuniaakaka bibyeeso byaabwe khweesi basaayila. Ne ari bona inywe mwakhwoolelesa sheesi mwasuubisa ta. Shiina kila mukholile shishiindu nga shino? 3Ni nashiryo ari nase imbalomela ndi singene imbayeete khuuwoonamwo baasiku beenywe ta. Kane bekyele busa nga kimireko khuubakhweeselesa inywe, khuubayila mu khwisaaya ba wele baabwe.”

4Malayika w’Omukasya n’amala khuukanikha bilomo bino isi babaandu ba Isiraeli, nabo baarakikha khuutoloola kamasika. 5Shiikila baalaanga shiifwo isho bari Bokimu. Lwanyuma bawaanayo tsisaayilo isi Umukasya.

Khuufwa khwa Yoswa

6Yoswa waasibula babaandu ba Isiraeli, baryo beelayo buli mutweela khukhwiyilila liiswa lye buusikha bweewe. 7Babaandu baakaanisatsaka Umukasya buulayi khu mbuka isi Yoswa aabeelawo nga ashiili mulamu, ni khu mbuka iyelakho iye kimiboolo kye baakhulu babaabawo lwanyuma lwa Yoswa, naluundi babaabona bye kamakaanga byeesi Umukasya aakholela babaandu ba Isiraeli.

8Yoswa umwaana wa Nuni, umwakaanisi w’Omukasya waafwa nga waayolesa kimiiko shitoondo shitweela ni likhumi (110). 92.9: Yos 19.49,50Lwanyuma baamusiikha i Timunasi Heresi, mu liswa lye buusikha bweewe, mu shibala she mu ngoongo sha Efurayimu, ingaaki wa Gaashi.

10Lwanyuma lwayo, babaandu be kumuboolo ukwo kwoosi baafwa bawawo. Yeelawo kumuboolo kukuundi kukukhaamanyakho Umukasya namwe nashitweela khu byeesi aakholela ba Isiraeli ta.

Ba Isiraeli baakamisa khukhwisaaya Umukasya

11Baryo babaandu ba Isiraeli baakhola bibiindu biibi nga boonaka isi Umukasya, baarakikha khukhwisaaya ba Bayaali. 12Baalekha khukhwiisaaya Umukasya Wele we bakuuka baabwe, uwabarusa khukhwaama mu shibala she Misiri ta. Baryo baarakikhaka khukhwisaayaka ba wele babaandi, nga nibo ba wele be kamanaambo kakaabebotookhelela. Khu lwashino shaakila Umukasya waakhalala naabi. 13Lwekhuuba baalekha Umukasya, besaaya ba Bayaali ni ba wele bekhasi beesi balaanga bari Ashera. 14Umukasya lirima liikali lyaamuwaamba khu lwe ba Isiraeli, shishakila waabawaanayo isi banuuli beetsa baabanuula. Aryo waalekha baasiku baabebwakala khu buli lubeka, ni ba Isiraeli nga sibanyala ni khukhwikhiinga babeene ta. 15Nga abe buli lweesi batsiila mu khusoolana ni baasiku baabwe, buyeeti bw’Omukasya bubalekha, baasiku baabawula mu busoolo, nga n’amala khaale khuubetsubila. Lwashino ba Isiraeli baaba mu mutaambo kumukali naabi.

16Lwanyuma lwayo Umukasya waabarobolelayo baakayi, baabayeeta mu busoolo ni khuubanyalisisa khuuwula baasiku abe babaabebwakala. 17Ne ndi abe buli mbuka, babaandu ba Isiraeli abe sibakana khuuwuliilisa baakayi bano ta, ne abe batsya bafwaana busa nga bamalaaya, khukhwisaaya ba wele babaandi. Bakuuka baabwe mu miiko kikyabira baaba nga bawulila kamakaambila k’Omukasya, ne be kumuboolo kuno nga abe beebilila khaangu. 18Nga abe buli lweesi baasiku beetsila khuubonabonisa babaandu ba Isiraeli, Umukasya abe abawaambila naabi shiisa. Abe akhola waabarobolelayo umuraangilisi unyala waabayeeta khuubawonesa khukhwaama mu bunyala bw’omusiku uyo. Abe Umukasya awaambila babaandu beewe bano shiisa khulw’omuraangilisi yuno isi aabarobolela naaba nga ashiiliwo mulamu. 19Ne lwanyuma nga umuraangilisi yuno waafwiile, abe babaandu tsana bano beelayo baaba baboonaki naabi ni khuufuurisakho ni bakuuka baabwe, nga batsya baloondelela ba wele babaandi, luundi baabesaaya. Abe batsya besaaya ba wele babaandi, nga sibakana baalekha intsibirisa yaabwe imoyaani iyo ta.

20Nashiryo abe Umukasya abakhalalila naabi, waabalomela ari, “Lwekhuuba linaambo lino lye ba Isiraeli bakhalawo khukhuumiinyaalila ise, ni khuulekha khuuloondelela indakaano isi ise nakhola ni bakuuka baabwe, 21nase singene imbayeete khuubasoolanisila, luundi ni khuuwoonamwo baasiku baabwe beesi Yoswa aalekha nga ashiili khufwa ta. 22Kane inaambise baasiku beene bano khuukhakilisa babaandu ba Isiraeli, khuubona nga ilala kane beeliinde khuuwaamba intsila y’Omukasya, ni khuukikyeendelamo, nga baakuuka baabwe ni baakholatsaka.” 23Isho nisho shishakila Umukasya aafukiilisa kamanaambo ako khuuramawo, waalekha khukana Yoswa khuukawoonamwo ni khuukahesa kumuluundi mutweela ta.