Swahili Bible2

18

Mika ni shikuuka sha Dani

1Mu biifukhu ibyo, ba Isiraeli baaba nga bashiili khufuna umuyiinga ta.

Naluundi mu biifukhu ibyo, babaandu be mu shikuuka sha Dani baaba nga bashiili khufuna shiifwo isi nabo banyala bamenya ta. Shino shaba shiryo, lwekhuuba baaba nga bashiili khukhwoola mu bumenyo bwaabwe akari mu bikuuka bye ba Isiraeli ta. 2Baryo babaandu be mu shikuuka sha Dani beroborerayo basaani be kamaani baraano khukhwaama i Zora ni Eshitawolu. Khu basaani bano, buli mutweela aba aama mu buli khakuuka khakyeekhe mu nibo. Baryo babarumana bari batsye bemenielese babone shiifwo isi nabo banyala bamenyamwo.

Basaani bano baatsya boola mu shibala she mu ngoongo sha Efurayimu, bawolela khu ntsu ya Mika, abweene awo niwo isi baakona shiilo isho. 3Ne ni baaba nga bali aambi ni ntsu ya Mika, baawulila likono ly’omuwele umu Levi tsana, shikila bamwiisa andulo bamureeba bari, “Naanu uwakhureera iwe ano? Naluundi ano ukholawo shiina? Lwashiina iwe uli ano?”

4Naye waabeelamo ari, “Mika niye uwalakaana ni nase ari imbe umusaayi weewe.” Aryo waababoolela nga Mika n’amubirisa buulayi naabi.

5Lwanyuma baamulomela bari, “N’ukhureebelekho isi Umukasya, khubone oba nga noola lukyeendo lweefwe luno kane lulayi.”

6Naye waabeelamo ari, “Ni mutsye mu lukoosi. Lwekhuuba Umukasya kane abaraangilile mu lukyeendo lweenywe.”

7Baryo basaani baraano bano baakyeenda baatsya boola mu shiriimba she Layishi, isi baabona babaandu, babaali nga ba Sidoni, nga bamenya mu lukoosi luundi nga bali buulayi. Babaandu bano baaba nga sibali ni sheesi bataamba ta, lwekhuuba liloba lyaabwe lyaba lili liilayi. Nibo baaba bamenya aleeyikho ni ba Sidoni, nga sibalikho ni babaandu beesi bakholakana ni nabo aambi ta.

8Baryo basaani baraano bano beelayo i Zora ni Eshitawolu. Baalebe baabwe babaaramayo baabareeba bari, “Mwanyooleleyo shiina nga ni mwatsiile?”

9Nabo baabeelamo bari, “Nimwinyukhilemo, khakhutsye khubebwakaale! Khwaaboone nga liloba lyaabwe lili liilayi naabi. Nashiryo mukhayila imbuka indeeyi khuutsya khukhwiyilila liiswa ilyo ta. 10Nga khwaatsiile, kane khunyoole babaandu babaaliwo busa nga bambaasa bari bali mu lukoosi lwaabwe, mu shibala shaabwe shibalaayi. Shibala shibalaayi isho luundi liiswa liilayi ilyo, nilyo lyeesi Wele ali khuukhuwa ifwe.”

11Baryo basaani bitoondo bisesaba (600) khukhwaama mu shikuuka sha Dani, nga beesabikhile bye busoolo, baarura khukhwaama i Zora ni Eshitawolu. 12Baatsya baabuusanila mu kaambi yaabwe i Kiriyasi Jeyarimu, shishiili mu Yuda, nga bashilaanga bari Mahane Dani18.12 Mahane Dani: shino shimanyisa shiri i kaambi ya Dani khukhwoolesa ni shaleelo shino. 13Baryo beelooselayo baatsya boola mu shibala she tsingoongo sha Efurayimu, khukhwoolesa ni boola khu ntsu ya Mika.

14Basaani baraano tsana babaatsya nga babemenielesi mu shibala isho sha Layishi, baaloma bashaabwe bari, “Inywe muli ni khuumanya muri ano aliwo umuundu mu shaalo shino uuli ni bifwaani bye khukhwisaaya, ni bifwaani bye ba wele be ango be khukhwisaaya bakhosefu. Nashiryo inywe ni mukhalewo shiina she khuukhola.”

15Lwanyuma basaani baraano abo baatsya khu ntsu ya Mika isi umuwele umu Levi tsana aamenyatsaka, baamusheesa buulayi. 16Ne basaani babaaba beesabikhile bye busoolo khukhwaama mu shikuuka sha Dani, baaba nga beemikhile ibulafu aambi ni shilibwa. 17Basaani baraano bano babaatsya khukhwimenielesa shibala isho, baatsya benjila mu ntsu isi besaayilatsakila, baasuta bifwaani bye khukhwisaaya tsana, ni bifwaani bye ba wele be ango baakhosefu. Bakhola baryo, umusaayi aaba nga naye weemikhile ibulafu we shilibwa atweela ni basaani bitoondo bisesaba tsana, babaaba nga beesabikhile bye busoolo. 18Basaani bano ni baaba nga bali khuusuta bifwaani bye khukhwisaaya, ni bifwaani bye ba wele be ango bakhosefu, umusaayi tsana shikila abareeba ari, “Inywe mulikho mukhola shiina isho?”

19Nabo baamwiilamo bari, “Sila busa! Ukhabakho ni sheesi uloma ta. Yinyukha busa utsye ni nafwe ube paapa weefwe luundi ube umusaayi weefwe. Iwe waambaasa uri sishifuura iwe khuuba umusaayi we shikuuka shibuufu she mu Isiraeli, khufuurisa khuuba umusaayi w’omuundu mutweela yenyene?” 20Aryo umusaayi yuno waasangaala luukali naabi. Aryo shikila asuta bifwaani bye khukhwisaaya tsana ni bifwaani bye ba wele, waatsya ni nabo. 21Baryo boosi benyukha baarakikha lukyeendo lwaabwe, nga baamalile khuuraangisa ibweeni babaana baabwe, ni bibyaayo byaabwe, ni khuutubakho bye buyiindifu byaabwe bibiindi.

22Babaandu bano khukhwaama mu shikuuka sha Dani ni baaba nga bakyeendakile boolile aleeyikho khukhwaama khu ntsu ya Mika, Mika yuno atweela ni babesanwa beewe beetsa nga baloonda khu baandu ba Dani bano. 23Beetsa babaloondakho nga balikho bakhupa liyoombo liikali. Shikila basaani be mu shikuuka sha Dani bano bashuukha balomela Mika bari, “Iwe shiina sheesi uli khukana? Lwashiina kila iwe ulaangile babaandu bano boosi khukhwiitsa khukhusoolanisa ifwe?”

24Naye Mika waabeelamo ari, “Inywe mwaamanyile shiina sheesi mukholile. Mwasutile ba wele baase beesi ise samweene nekholela, naluundi mwayilile n’umusaayi wase. Ari mbaawo na shiri sheesi ise inamisilewo ta.”

25Babaandu be mu Dani nabo baamwiilamo bari, “Ukhakhwiilakamo bilomo bibifwaana biryo ta. Siinga ukhwiilakamo uryo waakhukhalasa, babaandu beefwe banyala baakhwibwakala, iwe ni be muungo mwoowo boosi beeribwa.” 26Nga ni baamala khuuloma baryo, benyukhilamo beeloosela ni lukyeendo lwaabwe. Mika naye n’abona ari singene abanyale taawe, lwekhuuba baaba bamufuura kamaani, waashuukha welayo, waakobolayo ingo weewe.

27Baryo babaandu be mu shikuuka sha Dani bano baayila ibyo byeesi Mika aaba nabyo, ni khuuyililamo umusaayi weewe. Baatsya boola i Layishi, khuutsya khusoolanisa babaandu babaaba bali mu lukoosi, nga mbaawo sheesi barya ta. Baryo baatsya baabebwakala, beera babaandu baamwo, boosha shiriimba shaabwe. 28Siyabawo umuundu yeesi uweetsa khuuyeeta khuubawonesa ta, lwekhuuba baaba bali aleeyi naabi ni ba Sidoni, ate nga sibali ni babaandu beesi bakholakana ni nabo ta. Shino shakholebwela mu litila liliili aambi ni Besi Rehobu.

Lwanyuma babaandu be mu shikuuka sha Dani bano beyoombekhela shiriimba shino bushaakha, baamenyatsaka mubweene umwo. 29Shiriimba shino baashitwiikha lisiina bari Dani, lwekhuuba umukuuka waabwe umukhulu abe bari Dani, uwaba umwaana wa Yakobo, ne aba makiboole bashilaanga bari Layishi. 30Baryo bereerawo bifwaani byaabwe, baarobora Yonasani umwaana wa Geroshomu, uwe mu shikuuka sha Musa, atweela ni babaana beewe khuuba basaayi be shikuuka shino sha Dani. Shino shaba shiryo khukhwoolesa khu mbuka isi baabawaambila baabayila mu bubowe. 31Biryo bifwaani bya Mika byesaayibwa ni babaandu be mu shikuuka sha Dani imbuka yoosi isi Intsu ikhulu iye khukhwisaayilamo Wele ni yaba nga ishiili i Shilo.