Swahili Bible2

14

Samusoni ayila umukhasi khukhwaama i Timuna

1Shifukhu shitweela Samusoni waatsya i Timuna isi aabonela umukhasi umu Firisitiya. 2Ne naakobolayo ingo, waatsya waaboolela paapawe ni maayi weewe ari, “Iliyo umukhasi umu Firisitiya isi imboone i Timuna. Ise ngana khuumuyila abe umukhasi wase, ni mumuufunile.”

3Ne paapawe ni maayi weewe baamwiilamo bari, “Mu balebe boowo bano boosi, ni mu Isiraeli muno mwoosi, mbaamo umukhasi isi unyala waayila? Iwe shikhwaakhila khuutsya iyo mu ba Firisitiya basiinde abo khuufuna umukhasi?”

Ne Samusoni weelamo paapawe ari, “Ni mumuufunile. Lwekhuuba umweene uyo niye isi ise ngana khuuyila.”

4Basaali beewe bano baaba baakhushimanyakho bari Umukasya niye uwaba ali khuukhola shino ta, lwekhuuba aakana khuureerawo ilomo iye khuusoolanisa ba Firisitiya. Khu mbuka iyo, ba Firisitiya nibo baaba bawula ba Isiraeli.

5Aryo Samusoni ni paapawe, atweela ni maayi weewe, beekha kwe Timuna. Ne ni baaba nga batsya bali aambi ni kimikuunda kyeeyo, italanyi inyana yaabuutsa, yaatsya yebwakala Samusoni. 6Ne Umwoyo w’Omukasya waamwiikhakho ni kamaani kamakali, aryo waafumbara italanyi iyo, waakityeenuulakamo busa ni kamakhono keewe, nga umuundu n’atyeenuulakamo khaabusi khakhaana. Basaali beewe sibaashimanyakho, naluundi s’ababoolelakho ta. 7Aryo Samusoni ni oola i Timuna, waatsya waakanikhanamwo n’umukhasi tsana, ni buulamu bweewe bwamusiima naabi.

8Lwanyuma lwe mbuka iyoolakho, Samusoni n’aba nga alikho elayo i Timuna khuuyila umukhasi tsana, ni oola ashifwo sheesi eriramo italanyi, weyawukhakho khakyeekhe khuutsya alole khu mulaambo kwayo. Waatsya waanyoola nga mu makuumba kaayo mulimo intsushi ingali nga yabuumbilamo ni bubuushi. 9Aryo waayoolakho khu buushi buno ni kamakhono keewe, waatsya nga abulya nga nakyeenda. Nga n’ola isi basaale beewe, waabawakho nabo baabulyakho. Ne shonyene ndi s’ababoolelakho ari bubuushi ibwo abwaamisa mu makuumba ke talanyi ta.

10Aryo paapawe wa Samusoni n’aba nga waatsiile khukanikhanamwo n’umukhaana ni basaali beewe, Samusoni waakholayo kamayiiya i Timuna, nga ni yaba isaambo iyaabo babaatsya khukhwa, khu mbuka iyo. 11Ne ba Firisitiya ni beetsa khuubona Samusoni, baamurumanila basaani basooleli kamakhumi kataru khukhwiitsa babe ni naye khu mayiiya.

12Kila Samusoni abalomela ari, “Ise ingana khubakhupa kumunayi. Ne nikane mukumboolele mu biifukhu musaafu bye kamayiiya bino, kane ise imbawe inywe tsingubo tse khukwaara kamakhumi kataru, ni tse khushuusa natso kamakhumi kataru. 13Ne siinga mulekha khukhuumboolela ta, inywe mwabeene kane muumbe ise tsingubo kamakhumi kataru ni tse khushuusa natso kamakhumi kataru.”

Nabo baamwiilamo bari, “Mbaawo buubi ta. Ari khupa kumunayi kwiitse.”

14Kila Samusoni akukhupa nga aloma ari,

“Khukhwaama muuyo ulya,

mwamamwo shishiindu she khuulya;

khukhwaama muuyo iwe kamaani,

mwamamwo shishiindu shiitokota.”

Bifukhu bitaru byaabirawo, ne nga basaani basooleli ba Firisitiya bano nga sibali ni she khukhwiilamo ta. 15Kila baryo khu shifukhu shishakamayo she kumusaafu, baatsya isi umukhasi umweeha wa Samusoni bamuloma bari, “Tsya ukhoonjelese umuseetsa woowo akhuboolele ifwe sheesi kumunayi kweewe kumanyisa. Ne nga akhuba isho ta, ifwe kane khwookhe intsu ya paapawo, khubeere mweesi nga nawe ulimwo. Inywe mukhulaangile ifwe ano muri nio mukhunuulekho bibiindu byeefwe?”

16Shino shaakila umukhasi wa Samusoni weetsa waakwa khu Samusoni, nga alikho alila kamasika, waamuloma ari, “Iwe s’unganakho ise ta, waayimbiyila! Bona iwe waawa babaandu be weefwe kumunayi, ne waakhumboolelakho sheesi kumanyisa ta.”

Samusoni waamwiilamo ari, “Ni paapa wase namwe maayi wase, naakhubaboolelakho ta, ari ikhuboolela iwe ndyeena?” 17Aryo umukhasi uyo weloosela khuulila khuumala biifukhu musaafu bye kamayiiya ibyo byoosi, nga akana amurusemo she khukhwiilamo. Ne khu shifukhu shishakamayo she kumusaafu, umukhasi waamureerakho ilala kamaani nga amunuutsilisa, lwanyuma Samusoni waamuboolela. Naye aryo lwanyuma waatsya waaboolela basaani basooleli tsana.

18Nga inyaanga ishiili khukwa ta, khu shifukhu isho she kumusaafu, basaani be mu shiriimba isho beetsa ni she khukhwiilamo kumunayi, nga baloma bari,

“Shiina shishifuura bubuushi khuutokota?

Naluundi shiina shishifuura italanyi kamaani?”

Samusoni waabeelamo ari, “Mulekha khukhonjelesa umukhasi isi intsya khuyila, khali simufunile she khukhwiilamo kumunayi isho ta.”

19Umwoyo w’Omukasya weekha khu Samusoni, waaba ni kamaani kamakali. Aryo waatsya mu shiriimba she Ashikeloni, weerayo basaani kamakhumi kataru, waabukula tsingubo tsaabwe, waareera bikwaaro bino, waabiwa basaani basooleli be Timuna abo, babeelamo kumunayi kweewe. Samusoni waarama nga lirima lyaamuwaambile, waamawo waakobolayo ingo waabwe isi paapawe ni maayi weewe. 20Aryo umukhasi abe utsya khuba uwa Samusoni, baamuwa isi umusaani uwaba nga umuloleleli wa Samusoni khu mayiiya.