Swahili Bible2

13

Khuusaalikha khwa Samusoni

1Luundi ndi ba Isiraeli baakhola bye bubwoonaki mu moni ts’Omukasya. Kila Umukasya abawaanayo ndi mu bunyala bwe ba Firisitiya khuumala kimiiko kamakhumi kane.

2Mu biifukhu ibyo, aabawo umusaani mutweela khukhwaama mu shikuuka sha Dani, nga bamulaanga bari Manowa, abe amenya mu shiriimba she Zora. Niye aaba n’umukhasi abe ukhasaala ta, isho shaakila baalekha khubakho ni babaana ta. 3Lutweela Malayika w’Omukasya waabonekhela umukyelama wa Manowa, waamulomela ari, “Abe yakhaba nga uli umukuumba, s’uli ni babaana ta, ne mu mbuka njeekhe iri ikhali iye aleeyi ta, ukhaabe shisoombo usaale umwaana umusiinde. 4Ne waakha khuubona uri s’unywakho iviini namwe shishimeesa shoosi ta, namwe ukhalyakho biilyo bibikhaakhila ta. 513.5: Bala 6.1-5Lwekhuuba uli khuutsya khuba shisoombo, usaale umwaana umusiinde. Ne litsuune lyeewe likheetsa khukhalibwakho na khakyeekhe khoosi ta, lwekhuuba umwaana uyo wahaanibwileyo isi Wele nga umu Nazarene13.5 Nazarene: Yuno abe ali umuundu uwewaanilayo ilala isi Wele nga akhola shitsubo khuulekha khunywakho indali namwe iviini yoosi ta, ni khuulekha litsuune lileehele ilala, khukhwaamila ilala khu khusaalikha khweewe. Umweene yuno aliwonesa ba Isiraeli khukhwaama isi ba Firisitiya.”

6Umukhasi yuno waatimaka waatsya isi umuseetsa weewe, waamuboolela ari, “Umusaani wa Wele ubonekha nga malayika, ambonekheele waakanikha ni nase. Imbeele ni khuurya khuukali naabi lwe shiriiso shikali, naalekha khunyala ni khuumureeba eena isi aama ta, namwe khuumureeba lisiina lyeewe ta. 7Ne anomeele ari ise intsya khuba shisoombo, isaale umwaana umusiinde. Ise s’indi ni khuunywakho iviini namwe shiinywa shoosi shishimeesa, namwe khuulyaakho bibiilibwa byeesi Wele aakhwikaanisa ifwe khuulya ta. Umwaana weefwe uyo atsya khuba uwa Wele nga umu Nazarene, buulamu bweewe bwoosi.”

8Lwanyuma Manowa waaloomba isi Umukasya nga aloma ari, “O Umukasya, ikhuloomba ndi, khayo umusaani wa Wele uyo isi warumaane isi khuli akobole luundi, nio anyalise khuukhuwa ifwe bye khuukhola, musaambo iye khuutsowesa umwaana ukhasaalikhe uyo.”

9Wele weelamo Manowa khuuloomba khweewe. Aryo Malayika wa Wele waakobola waabonekhela umukhasi nga wekhaale iyo mu mukuunda. Ne luundi ndi Manowa umuseetsa weewe s’aba ni naye ta. 10Shikila umukhasi waatimaka khaangu waatsya waaboolela umuseetsa weewe ari, “Umusaani tsana uwambonekheele ise liitso, waakoboole ndi luundi ali ano!”

11Manowa wenyukhilamo waaloonda khu mukhasi weewe. Ne n’ola isi umusaani tsana, Manowa waamureeba ari, “Iwe niye uwakanikhile isi umukhasi wase liitso?”

Naye weelamo ari, “E e, ise niye.”

12Kila Manowa amureeba ari, “Nga bilomo byeesi wakhubooleele byoolele, ukana buulamu bw’omwaana uyo bube buryeena, naluundi alikhola mulimo shiina?”

13Malayika w’Omukasya naye waamwiilamo ari, “Umukhasi woowo aakha khuuloondelela ibyo byoosi byeesi namubooleele. 14Akhalyakho kamatuunda ke kumuzabibu, namwe waanywakho iviini, namwe she khuunywa shoosi shishimeesa ta, namwe akhalyakho bibiliibwa byeesi Wele aabekaanisa khuulya ta. Ibyo byoosi byeesi namulakiile khuukhola, aakha abyoolelese.”

15Lwanyuma kila Manowa alomela malayika w’Omukasya ari, “Khwaakhwikoontseleele, uramekho ano ni nafwe khakyeekhe khari, khukhukholeleyo khaabusi khari, nawe ulyekho.”

16Malayika w’Omukasya waamwiilamo ari, “Khurama ise kane inamekho imbuka injeekhe iri, ne singene indye biilyo byeesi mutsya khukhuukholela ise ta. Ne ni muba nga mukana khuwayo isaayilo intsoshe, ni mukiweyo isi Umukasya.” (Manowa aaba ashiili khushimanya ari uyo aba malayika w’Omukasya ta.)

17Lwanyuma ndi Manowa waareeba malayika w’Omukasya uyo ari, “Ne iwe lisiina lyoowo bari naanu? Nio nga bino byeetsile khwoolelela, ifwe khwiitse khukhuwe iwe lukoosi.”

18Malayika naye welamo ari, “Lwashiina undeeba ise lisiina lyase? Abe naakhakhuboolela, ne lili lye angaaki naabi, silinyala lyaamanyikha ta.”

19Aryo waabukula khaabusi, atweela ni buufu bwe ŋaano, waabiyila iyo khu lwaanda lweesi aakhola khuuba shisheeso sheewe, waabiwaanayo isi Umukasya. Baryo Manowa n’umukhasi weewe ni baaba nga balolelele, Umukasya waakhola shishiindu shishiyaangisa. 20Kumulilo ni kwaba nga kwaaburukha kuniina mu ngaaki khukhwaama mu sheeso, malayika tsana waaniinila mu mulilo. Nga baaboone shino, Manowa n’umukhasi weewe baakwa aasi mafumala lwe khukhwisaaya.

21Malayika w’Omukasya waalekha khubonekhakho luundi isi Manowa n’umukhasi weewe ta. Shino shaakila Manowa waashimanya ari uyo aba malayika w’Omukasya. 22Shikila alomela umukhasi weewe ari, “Ilala ifwe ari khutsya khufwa, lwekhuuba khwaaboone khu Wele!”

23Ne umukhasi weewe waamwiilamo ari, “Iba nga Umukasya ukhukanile khuukhwiira ifwe, khali s’afukiilile isaayilo yeefwe intsoshe ni buufu bwe ŋaano buno, byeesi ifwe khwaama khuwaanayo ta. Namwe ndi khali s’afukiilile khukhwiyokesanisa isi khuli ni khuukhuboolela bilomo bino byoosi bibifwaana biri ta.”

24Lwanyumakho, umukhasi yuno wasaala umwaana umusiinde waamutwiikha lisiina ari Samusoni. Umukasya waamuwa naabi tsikhabi nga natsowa. 25Lwanyuma Samusoni n’aba nga ali i Mahanedani, shishaba aambi ni biriimba Zora ni Eshitawolu, Umwoyo w’Omukasya waarakikha khuumuraambisa kimilimo.