Swahili Bible2

12

Ba Efurayimu basoolanisa liiye lya Yefusa

1Babaandu ba Efurayimu babuusanisa liiye lyaabwe atweela bakhalisa khuutsya i Zafoni, baatsya balomela Yefusa bari, “Lwashiina ukhakhulaangile ifwe khutsya ni nawe khusoolanisa babaandu ba Amoni? Nashiryo, ifwe khutsya khwoosha intsu yoowo atweela ni nawe mu bweene.”

2Yefusa naye waabeelamo ari, “Ise nabaloomba inywe ndi mwiitse mukhuwekho buyeeti nga khulikho khusoolana ni ba Amoni, ne mwaalekha khukana khwiitsa ta. 3Nase ndyo ni nabona nga simulikho mukhuwa buyeeti taawe, ise newaanayo buulamu bwase naatsya nasoolanisa ba Amoni. Umukasya waakhunyalisisa khuuwula busoolo ubwo. Ari lwashiina mwitsiile khukhuusoolanisa ise shaleelo?”

4Baaraangilisi be ba Efurayimu beelamo bari, “Inywe babaandu be mu Gileyadi mbaamo shiindu ta, akhali ndi muli busa nga bawuuyi khukhwaama khu Efurayimu ni khu Manase.” Aryo kila Yefusa alaanga atweela liiye lyeewe, waatsya webwakala babaandu ba Efurayimu, wabawula boosi. 5Babaandu ba Yefusa be Gileyadi baatsya bawaambaka biifwo e khukhwaambukhila Luluutsi Yorudaani, nga babiliinda. Isho shaakila buli mbuka abe isi abo babaatitukha khukhwaama mu ba Efurayimu, nga bakana khukhwaambukha, babaandu be Gileyadi abe babareeba bari, “Inywe mwaama mu Efurayimu?” Ne abe nabo nga beelilemo bari, “Taawe,” 6nabo baaliindi be Gileyadi abe babeelamo bari, “Kale, shilayi. Ne loma muri Shibolesi.”

Ne abe babeelamo ni baloma bari, “Shibolesi,” nga sibanyala bashikanikha buulayi ta, nga ni shaakha ta, baaliindi abe babawaamba babeerirawo abweenewo khu Yorudaani. Basaani ba Efurayimu boosi atweela babeeribwa khu mbuka iyo khu luutsi Yorudaani, boola kimikaanda kine ni bikana bibili (42,000).

7Aryo Yefusa waaba umukayi wa Isiraeli khuumala kimiiko kisesaba. Ne lwanyuma n’afwa, baamusiikha mu shitweela khu biriimba bye mu Gileyadi.

Ibuzani ekyela umukayi wa Isiraeli

8Lwanyuma lwa Yefusa khuufwa, Ibuzani abe umenya i Beselehemu, waaba umukayi wa Isiraeli. 9Ibuzani yuno aasaala babaana bakhaana kamakhumi kataru ni basooleli nabo kamakhumi kataru. Niye aakhwaalikhisa bakhaana beewe isi basaani khukhwaama ibulafu we shikuuka sheewe, naluundi waakhweela basooleli beewe bakhasi khukhwaama ibulafu we shikuuka sheewe.

Ibuzani aaba umukayi wa Isiraeli khuumala kimiiko musaafu 10Ne lwanyuma n’afwa, baamusiikha i Beselehemu.

Eloni ekyela umukayi wa Isiraeli

11Lwanyuma lwa Ibuzani, Eloni khukhwaama mu shikuuka sha Zebuluni wekyela umukayi wa Isiraeli. Niye aaba umukayi khuumala kimiiko likhumi. 12Ne lwanyuma n’afwa, bamusiikha i Ayijaloni, mu shibala sha Zebuluni.

Abudoni ekyela umukayi wa Isiraeli

13Lwanyuma Eloni khuufwa, Abudoni umwaana wa Hileli khukhwaama i Pirasoni, waaba umukayi wa Isiraeli. 14Abudoni yuno aaba ni babaana basooleli kamakhumi kane, waafuna babetsukhulu kamakhumi kataru, babaakyeendatsakila khu sikilya tsiwaanga kamakhumi musaafu. Niye aaba umukayi wa Isiraeli khuumala kimiiko shinaane. 15Ne lwanyuma n’afwa, baamusiikha i Pirasoni, shisiintsa she mu Efurayimu, mu shibala she tsingoongo she ba Amaleki.