Swahili Bible2

11

Yefusa ekyela umukayi wa Isiraeli

1Ari Yefusa uwe mu Gileyadi aaba umusoolani umurafu naabi. Niye aba umwaana wa Gileyadi, ne maayi weewe aba malaaya. 2Umukhasi wa Gileyadi umweene aamusaalila babaana basooleli baboolakho, ne bano ni baakhula, baawoona Yefusa khuurura muungo umwo. Lwekhuuba baamulomela bari, “Mbaawo shishiindu nashitweela sheesi iwe utsya khufuna khu busikha bwa paapa weefwe ta, lwekhuuba iwe umwaana w’omukhasi ukuundi.” 3Kila Yefusa atitukha khukhwaama isi babaandaaye, waatsya waamenya mu shibala sha Tobu. Ne lwanyumakho khakyeekhe yabawo babaandu babaakhaabakho ni shitsilililwa baabuusana baamuloondakho khuumunuula.

4Ne aambikho mu mbuka nyene iyo, babaandu ba Amoni baakhola buusoolo khu Isiraeli. 5Ne ni shaba shiryo, baaraangilisi ba Gileyadi baabuusana baatsya khuureera Yefusa khukhwaama mu shibala sha Tobu, 6nga bamuloma bari, “Yiitsa ube umuraangilisi we liiye lyeefwe, nio nafwe khunyalise khuuwula ba Amoni bano.”

7Yefusa naye weelamo baaraangilisi bano ari, “Shiili inywe nibo babaantsikaana ise? Shiili inywe nibo babaamboona ise khukhwaama mu ntsu ya paapa wase? Ari lwashiina mwiitsa isiise nga muli mu bukosi?”

8Kila nabo bamwiilamo bari, “Khweetsile khukhwookesanisa iwe khuri khuli khukhukana ari, nio manya utsye ukhuraangilile ifwe mu busoolo ni ba Amoni. Naluundi kane ube umuwuli weefwe fweesi nga babaandu ba Gileyadi.”

9Yefusa naye waabeelamo ari, “Kale mbaawo buubi ta. Ne siinga khuutsya ni nanywe naasoolanisa ba Amoni naabawula, ilala ise kane imbe umuraangilisi weenywe mweesi?”

10Nabo baamwiilamo bari, “Umukasya niye umujulisi weefwe. Ilala khukhwitsubila khuri kane ifwe khukhole byoosi byeesi uloma.” 11Aryo Yefusa waafukiilila waatsya ni baaraangilisi be Gileyadi, baatsya baamukhola khuuba umukhulu we liiye lyaabwe. Nga bali i Mizupa mu moni ts’Omukasya, Yefusa weelaŋanamwo bilomo byeesi aakanikha isi baaraangilisi tsana.

12Lwanyuma lwa bino Yefusa waaruma baarume isi umuyiinga we ba Amoni nga amuloma ari, “Iwe uli khuukana khuurakikha buusoolo ni nafwe? Ise ndi khuukana imanye lwashiina iwe uli khuukana khukhwibwakala shibala sheefwe.”

13Umuyiinga we ba Amoni naye welamo baarume ba Yefusa ari, “Nga ba Isiraeli ni baama mu shibala she Misiri, baayila liiswa lyase khukhwaamila ilala khu Arinoni, khukhwoola khu Luutsi Yaboko luwaande lwe ngaaki khuutsya khukhwoolela ilala khu Luutsi Yorudaani, khu lubeka lwe bukwanyaanga. Ni mutsye muboolele Yefusa angobosele liiswa ilyo mu lukoosi.”

14Yefusa naye waarumana luundi baarume ni buurume isi umuyiinga we ba Amoni, 15nga buloma buri, “Isiraeli siyaakhwiibatsakakho liiswa lya Mowabu namwe lye ba Amoni ta. 16Ne babaandu ba Isiraeli ni baama mu Misiri, baabirira mu mubiimbi busa, khukhwoolesa ni boola khu nyaantsa Imbesemu, lwanyuma beelooselayo khukhwoola i Kadeshi. 1711.17: Bala 20.14-21Lwanyuma ba Isiraeli baarumana baarume khuutsya isi umuyiinga wa Edomu bamulome bari, ‘Khufukiilise khubirirekho mu shibala shoowo.’ Ne umuyiinga wa Edomu wekaana. Lwanyuma ndi baarumanisa isi umuyiinga wa Mowabu khuuloomba shishiindu sheene nisho shitweela, ne naye wekaana waalekha khukana khubafukiilisa ta. Baryo ba Isiraeli baarama nga bamenya i Kadeshi.

1811.18: Bala 21.4“Lwanyuma lwayo ba Isiraeli benyukha baakyeenda nga bebotokhelelela khu ndulo khwa Edomu ni Mowabu iyo mu mubiimbi. Baryo baatsiila khu lwaakha lwa Mowabu lwe bukwanyaanga, baabuusanila aambi ni luluutsi Arinoni. Baryo sibaakhalisa Luluutsi Arinoni khuutsya khwinjila mu Mowabu ta.

1911.19: Bala 21.21-24“Ba Isiraeli baarumanisa buurume isi Sihoni umuyiinga we ba Amori, uwaba awula nga ekhala i Heshiboni, nga baloomba bari, ‘Khufukiilise khubirirekho mu shibala shoowo khutsye khwoole mu shibala shisheefwe.’ 20Ne umuyiinga Sihoni s’afukiilila ba Isiraeli khuubirirakho mu shibala sheewe ta. Ne akhali ndi aabuusanisila busa baselikhale beewe i Janazi, baatsya bebwakala ba Isiraeli. 21Ne Umukasya Wele wa Isiraeli waabanyalisisa khuuwula Sihoni ni baselikhale beewe. Baryo ba Isiraeli baayila liiswa lyoosi lye ba Amori, babaaba bamenyamwo, 22khukhwaamila ilala khu Luutsi Arinoni khuutsya khwoola khu Luutsi Yaboko, ni khukhwaamila ilala khu mubiimbi khukhwoola khu Luutsi Yorudaani.

23“Ne ari khukhwaama nga Umukasya Wele wa Isiraeli n’anyalisa khuuyila liiswa lye ba Amori, waaliwa ba Isiraeli, iwe uli na bunyala shiina bubukhwaambaasisa uri ifwe kane khulikhuwe? 24Iwe nuwiyilile ibyo byeesi wele woowo Kyemoshi akhuweele. Ni nafwe khuryo kane khwiyilile ibyo byeesi Umukasya Wele weefwe akhuweele. 2511.25: Bala 22.1-6Iwe waambaasa uri ufuura Balaka umwaana wa Zipori, uwaba umuyiinga wa Mowabu? Niye s’alomanakho ni ba Isiraeli, namwe waakhakakho khubasoolanisa ta. 26Khuumala kimiiko bitoondo bitaru (300), ba Isiraeli nibo babaabeele nga bamenya mu Heshiboni khukhwoola i Aroeri, ni khuutubakho bibyaalo ni biriimba bibiili khu ndulo khwe Luluutsi Arinoni. Lwashiina iwe ukhaaba ni kamaani khuubikoboselayo khaalekho? 27Ise mbaawo shiibi shoosi sheesi ikhukholilekho khwiiwe ta, ne shili busa lubuula shiri iwe niye ukana khurakikha buusoolo ni nase. Ne khayo Umukasya akhalewo shaleelo mu maaya kano khuubona naanu uli uwaŋali; ba Isiraeli namwe ba Amoni.”

28Ne umuyiinga we ba Amoni waalekha khukana khwinaanayo khu bilomo bya Yefusa bino ta.

29Khu mbuka nyene iyo, Umwoyo w’Omukasya weekha khu Yefusa. Shaakila wakhalawo khukyeenda mu Gileyadi ni mu Manase mwoositsana, ni khutubakho Mizipa, shishiili mu Gileyadi. Khukhwaama awo waraangilila liiye khukhwibwakala ba Amoni. 30Abweene awo Yefusa wetsuba isi Umukasya nga aloma ari, “Ni kane unyalisise ise khuuwula babaandu ba Amoni bano, 31ise kane imbaaneyo isi Umukasya, shishiindu shoosi shishikane shirure khukhwaama mu ntsu yase khukhuuntsakaanila, nga ngobola khukhwaama mu khusoolanisa ba Amoni. Kane ishiwaaneyo nga isaayilo intsoshe.”

32Aryo Yefusa waaraangilila liiye lyeewe waakhalisa khuutsya khusoolanisa babaandu ba Amoni, Umukasya waamunyalisisa khuubawula boosi. 33Yefusa ni liiye lyeewe baawulila ilala ba Amoni, baahesela ilala biriimba byaabwe kamakhumi kabili khukhwaama i Aroeri khukhwoola aambi ni Minisi, ni khuutsya khwoolela ilala i Abeli Keramini. Baryo ba Isiraeli baawulila ilala ba Amoni.

Umukhaana wa Yefusa

34Aryo Yefusa n’akobola ingo weewe i Mizipa khukhwaama mu busoolo, umuundu uwanyoowa khuurura khuumwakaanila aaba umukhaana weewe, uwaba mutweela yenyene, uweetsa nga akhupa bibisakaya, nga ashina ni kumwikhoyo. 3511.35: Bala 30.2Yefusa n’amubonakho, wonuulaka bikwaaro byeewe, waalomela umukhaana weewe ari, “Maayi mukhaana wase! Iwe ndi waamaambisa kumutaambo kumukali mu mwoyo kwase! Lwekhuuba ise nakhola shisuubiso isi Umukasya, ate nga naakhila khuushoolelesa.”

36Kila umukhaana uyo naye amwiilamo ari, “Paapa, iwe n’uba nga wakholile shisuubiso isi Umukasya khulwe khuuwula ba Amoni, n’ukhole khusiise nga niwamusuubisile. 37Ne nyoowa ufukiilile ikhuloombe shishiindu shitweela shino, ufukiiliseyo kimyeesi kibili, intsye iyo mu ngoongo khukyeendakayo atweela ni basaale baase, nga niilila samweene. Lwekhuuba ise ndi khuutsya khufwa nga indi indungubaasi busa.”

38Yefusa waamwiilamo ari, “Unyala waatsya.” Aryo Yefusa waamufukiilisa kimyeesi kibili, waatsya ni basaale beewe khuutsya khukyeendakakho iyo mu ngoongo, baaba nga balilila atweela, lwekhuuba aaba nga atsya khufwa busa nga akhusaalakho babaana ta. 39Kimyeesi kibili ni kyawakho, umukhaana yuno waakobolayo ingo. Aryo paapawe woolelesa shisuubiso sheewe, umukhaana yuno waafwa nga ashiili indungubaasi busa.

Khukhwaama mu shino, yekyela isaambo ye ba Isiraeli 40nga buli mwiiko, bakhasi baahele barura khukyeenda khuumala biifukhu bine, khuulilila umukhaana wa Yefusa, nga shishebuliso.