Swahili Bible2

10

Tola ekyela umukayi wa Isiraeli

1Lwanyuma lwa Abimeleki khuufwa, Tola umwaana wa Puwa, umwitsukhulu wa Dodo, uwe mu shikuuka sha Isakaari, naye wekyela umukayi wa Isiraeli. Niye amenyatsaka mu shiriimba sha Shamiri, mu shibala she tsingoongo sha Efurayimu. 2Tola yuno aaba umukayi wa Isiraeli khuumala kimiiko kamakhumi kabili na kitaru. Lwanyuma lwayo waafwa baamusiikha mu Shamiri.

Jayiri ekyela umukayi wa Isiraeli

3Lwanyuma lwa Tola khuufwa, Jayiri khukhwaama i Gileyadi naye wekyela umukayi wa Isiraeli khuumala kimiiko kamakhumi kabili na kibili. 4Niye aaba ni basooleli kamakhumi kataru, babaakyeendatsakila khu sikilya tsiwaanga. Nibo baaba ni buunyala khu biriimba kamakhumi kataru bibyaba mu Gileyadi, byeesi baalaanga bari Havosi Jayiri, ni khukhwoolesa shaleelo shino. 5Lwanyuma lwayo waafwa baamusiikha mu Kamoni.

Ba Isiraeli baminyaalila Wele luundi

6Ndi luundi ba Isiraeli baakhola bibiindu bibikhali biilayi ta mu moni tsa Wele. Baamulekha niye besaaya ba Bayaali ni ba Ashera, ni ba wele be ba Aramu, ba Sidoni, ba Mowabu, ba Amoni ni be ba Firisitiya. 7Aryo Umukasya waabakhalalila naabi, shishakila waabawaanayo mu makhono ke ba Firisitiya ni ke ba Amoni. 8Baryo mu mwiiko kweene ukwo mweesi Jayiri aafwiila, kamanaambo ako kaabonabonisa naabi ba Isiraeli. Shino baashikhola khuumalila ilala kimiiko likhumi na shinaane, baamiinilisa ba Isiraeli babaaba i bwaamanyaanga we luluutsi Yorudaani mu Gileyadi, shishaba shibala she ba Amori. 9Ni babaandu ba Amoni nabo baakhalisa luluutsi Yorudaani, khuutsya khusoolanisa babaandu ba Yuda, Benyamini, ni ba Efurayimu. Baryo ba Isiraeli baaba mu mutaambo kumukali naabi. 10Lwanyuma ba Isiraeli baalilila Umukasya nga baloma bari, “Ifwe khwayoonakisa isi uli, lwekhuuba khwakhulekha iwe nga Wele weefwe, khwaatsya khwesaaya bifwaani bya Bayaali.”

11Kila Umukasya abeelamo ari, “Shiili ise niye uwabawonesa khukhwaama isi ba Misiri, ba Amori, ba Amoni, ba Firisitiya, 12ba Sidoni ba Amaleki, ni ba Mawoni? Nibo baabamiinilisa inywe, mwaandilila ise lwe buyeeti, ni nase indyo naabawonesa khukhwaama isi bali. 13Ne ari bona ndi mwaandurirekho, mulikho mwaakaanisa ba wele babaandi. Nashiryo ari ise singene mbaawonesekho luundi ta. 14Ari ni mutsye mulilile ba wele beenywe abo beesi mwiroboleele khukhwakaanisa. Lekha ari nibo babawonese inywe khukhwaama mu mutaambo kweenywe.”

15Ne ba Isiraeli baalomela Umukasya bari, “Ilala khwayoonakisa mu moni tsoowo. Ari iwe n’ukhuwe ifwe shitaambiso nga n’ubona uri shaakhila. Ne shonyene ndi ukhuwonese ifwe khukhwaama isi baasiku beefwe.” 16Baryo baatuumaka ba wele be kamanaambo kakaandi abo, besaaya Umukasya. Aryo Umukasya waalekha khukana khubabona nga ba Isiraeli bataambisibwa luundi ta.

17Lwanyuma baselikhale be babaandu ba Amoni, balaangana beetsa baabuusanila mu Gileyadi, ni ba Isiraeli nabo beetsa baabuusanila i Mizipa. 18Kila baaraangilisi be babaandu ba Gileyadi bakanikhana bonyene bari, “Naanu ukane akhuraangilile akhurakikhile ifwe khukhwibwakala ba Amoni? Umweene uyo kane ekyele umuwuli we babaandu boosi babaamenya mu Gileyadi.”