Swahili Bible2

1

Ba Isiraeli basoolanisa bisiintsa bye ba Kanani bibyarama

1Lwanyuma lwe khuufwa khwa Yoswa, ba Isiraeli baatsya bereeba isi Umukasya nga baloma bari, “Shikuuka shiina khu bikuuka byeefwe shishinaraangila khuunyoowa khukhwibwakala ba Kanani?”

2Umukasya waabeelamo ari, “Shikuuka sha Yuda nisho shishinanyoowa. Samweene intsya khubayeeta khukhwiyilila liiswa ilyo.”

3Shikila babaandu be mu shikuuka sha Yuda batsya baakanikha isi baalebe baabwe be mu shikuuka sha Simeoni bari, “Ni mwiitse mutsye ni nafwe mukhuyeete khuusoolanisa ba Kanani, babaamenya mu shisiintsa shino, nio nafwe lwanyuma khutsye ni nanywe khubayeete iweenywe.” Baryo baselikhale be mu shikuuka sha Simeoni baatsya baabayeeta mu busoolo.

4Babaandu ba Yuda baryo baatsya bebwakala ba Kanani. Umukasya waabayeeta khuuwula ba Kanani, ni ba Perizi mu shifwo she Bezeki. Atweela beera babaandu baboola nga kumukaanda mutweela (10,000). 5Ibweene iyo niyo isi baanyoolayo umuyiinga Adoni Bezeki naye baamwibwakala. Baryo baawula ba Kanani atweela ni ba Perizi beene. 6Adoni Bezeki waakhakakho khuutitukha, ne baselikhale khukhwaama mu Yuda baamutimisa baamuwaamba, lwanyuma baamukhalakakho tsintsala tseewe tsimboofu tse khu makhono ni khu bikyele byeene. 7Lwanyuma Adoni Bezeki tsana waaloma ari, “Ise naakhalakakho tsintsala tsimboofu khu makhono ni khu bikyele bye bayiinga kamakhumi musaafu, naabakhola baafulila busa aasi khuuweentselesa buubuya bwe biilyo bubwakwatsaka aasi e meetsa yase. Ni nase ari Wele alikho asasula musaambo niyo ndweela nyene.” Baryo baselikhale ba Yuda baamusuta baamureera i Yerusalemu, ibweene iyo niyo isi aafwiila.

Shikuuka sha Yuda shiwula Yerusalemu ni Heburoni

8Basaani be mu Yuda baatsya bebwakala Yerusalemu baashiwaamba, beeraka babaandu boosi babaashibamo, lwanyuma baashiwaambisakho kumulilo shaaweela aasi.

9Lwanyuma lwa bino ndi baatsya baasoolanisa ba Kanani babaaba nga bamenya mu shibala she tsingoongo, she Negebu, ni bukoongo bwe bukwanyaanga. 10Baryo beelooselayo baatsya bebwakala ba Kanani babaaba bamenya i Heburoni, shishanyoowa khuulaangibwa bari Kiriyaasi Ariba. Ibweene iyo baawula bukuuka bukyeekhe bwa Sheshayi, ni Ahimani, ni Talumayi.

Osinieli awula shiriimba sha Debiri

(Yoswa 15.13-19)

11Khukhwaama i Heburoni, baselikhale ba Yuda baatsya bebwakala shiriimba she Debiri, khu mbuka iyo sheesi balaangatsaka bari Kiriyaasi Seferi. 12Kalebu waalomela baselikhale ari, “Kane imaambise umukhaana wase Akisa nga umukhasi isi umusaani yeesi ukane atsye ebwakale luundi awule Kiriyaasi Seferi.” 13Kila Osinieli, umusooleli wa Kenazi, wandaaye wa Kalebu umukyeekhe, waatsya waasoolanisa luundi waawula Kiriyaasi Seferi. Kila Kalebu waasuta umukhaana weewe Akisa waamuwa Osinieli, khuumuyila nga umukhasi weewe. 14Khu shifukhu sheene she kamayiiya ke bukhwaale, Akisa waaloma Osinieli ari atsye aloombe paapawe Kalebu amuwekho kumukuunda. Kila Akisa atsya khuubona paapawe, ne naaba nga eekha khuurura khu sikilya, Kalebu waamureeba ari, “Shiina sheesi ukana ise ikhukholele iwe?”

15Akisa naye weelamo ari, “Indi khuukana unjeete. Liiswa lyeesi waamba ise lili mu mubiimbi kwe Negevu. Ari ise ikhuloomba umbekho shiifwo shishiilimo tsisebele tse kameetsi.”

Kalebu waamuwa shiifwo shishiilimo tsisebele tse kameetsi tsibili tseesi baalaanga bari Iye Angaaki ni Iye Aasi.

16Babaandu babaaba be mu shikuuka sha Keni, nibo babetsukhulu ba paapa umukhwe wa Musa. Bano baarura i Yeriko, nga bali atweela ni babaandu be mu shikuuka sha Yuda, baatsya baamenya aambi ni Aradi shishaba mu mubiimbi kwe mwaalo kukukhaaba aleeyi ni ba Amaleki ta. 17Babaandu be mu shikuuka sha Yuda baatsya baayeetakho babaandu be mu shikuuka sha Simeoni, baatsiila atweela khukhwibwakala ba Kanani abe babaamenya i Zefasi, baabaheselawo ilala boosi. Shikila lisiina lye shiriimba shino baashilaanga bari Horuma.

18Babaandu ba Yuda nabo baawula Gaza, Ashikeloni, ni Ekuroni ni khuutubakho bibyaalo bibibotokhelelewo. 19Umukasya aaba ayeeta naabi babaandu ba Yuda bano. Baryo beeloosela ni khuuyila shibala shishaba shili mu ngoongo. Ne ndi sibaanyalisa khuuwoonamwo babaandu babaaba bamenya mu matila ta, lwekhuuba baaba bali ni kamakaali ke bibyuuma, shaabakhaasisa khukhwiyilila liiswa lino.

201.20: Yos 15.13,14Shikuuka sha Yuda shaakabila Kalebu shiriimba she Heburoni, nga Musa umweene n’abalakila. Kalebu niye uwawula luundi wawoona mu shiriimba bukuuka butaru bwe ba Anaki. 211.21: Yos 15.63; 2 Sam 5.6; 1 Kim 11.4Babaandu be mu shikuuka sha Benyamini sibaanyalisa khuuwoonela ilala ba Yebusi babaaba bamenya mu Yerusalemu ta. Shikila ni khukhwoola shaleelo shino, ba Yebusi bashimenya atweela ni babaandu ba Benyamini.

22Babaandu be mu shikuuka sha Yusufu1.22 Shikuuka sha Yusufu: Bino nibyo bikuuka bibiili bya Efurayimu ni Manase, babetsukhulu ba Yusufu nabo baatsya bebwakala Beseli, nga Umukasya ali atweela ni nabo luundi nga abayeeta. 23Khu mbuka isi baarumanila babaandu khuutsya khukhwimenielesa Beseli, (abe makiboole bashilaanga bari Luzi), 24babemenielesi bano baabonayo umusaani mutweela nga arura khukhwaama mu shiriimba, kila bamuloma bari, “N’ukhwookese isaambo iye khukhwinjila mu shiriimba shino, ni nafwe singene khukhukholekho buubi bwoosi ta.” 25Umusaani yuno waabokesa. Baryo babaandu be mu shikuuka sha Yusufu bano baatsya benjila mu Beseli, beeraka buli muundu yeesi uwashibamo khuurusakho umusaani uyo ni be muungo mweewe. Lwanyuma baamulekha waatsya 26woola mu shibala she ba Hiiti, ibweene iyo wombekhayo shiriimba. Shiriimba shino waashilaanga ari Luzi, nilyo liilishiili lisiina lyasho ni khukhwoolesa shaleelo shino.

271.27: Yos 17.11-13Babaandu be mu shikuuka sha Manase sibaawoonamwo babaandu babaaba bamenya mu biriimba bya Besi Shani, Tanaki, Doru, Ibileyamu, Megido, ni bibyaalo byoosi bibibotokhelelewo ta. Lwekhuuba ba Kanani bano baakhalilawo ilala khuubona bari beeloosela khuumenya mu shibala isho. 28Ne lwanyumakho nga ba Isiraeli baafunile kamaani kamakali, baanyalisa busa khukhwikyelisa ba Kanani bano khuuba baakulwa baabwe, ne sibaanyalisa khuubawoonelamo ilala ta.

291.29: Yos 16.10Shikuuka sha Efurayimu nasho sishanyalisa khuuwoonamwo ba Kanani babaaba bamenya mu Gezeri ta. Baryo ba Kanani bano beeloosela khuumenya atweela ni ba Isiraeli bano.

30Ni shikuuka sha Zebuluni nasho sishanyalisa khuuwoonamwo ba Kanani babaaba bamenya mu Kiduroni ni Nahaloli ta. Baryo ba Kanani bano beeloosela khuumenya atweela ni ba Isiraeli bano. Ne shonyene ndi babaandu be mu shikuuka sha Zebuluni baaraambisa kamaani khukhwikyelisa ba Kanani bano khuuba baakulwa baabwe khuubaraambila.

31Ni shikuuka sha Asheri nasho sishanyalisa khuuwoonamwo ba Kanani babaaba bamenya mu Ako, namwe mu Sidoni, namwe mu Ahilabu, namwe mu Akizibu, namwe mu Heluba, namwe mu Afeki, namwe mu Rehobu ta. 32Baryo babaandu be mu shikuuka sha Asheri baamenyatsaka atweela ni ba Kanani bano, khukhwaama nga ni baakhaanyalisa khuubawoonamwo ta.

33Shikuuka sha Nafutaali nasho sishanyalisa khuuwoonamwo ba Kanani babaaba bamenya mu Besi Shemeshi, ni mu Besi Anasi ta. Ne khuurusakho ndi baanyalisa busa khuubekyelisa baakulwa baabwe khuubaraambila. Baryo babaandu be mu shikuuka sha Nafutaali baamenyatsaka atweela ni ba Kanani bano khukhwaama nga ni bakhaanyala khuubawoonamwo ta.

34Babaandu ba Amori baaba ni kamaani kamakali kakaabanyalisisa khuubowela babaandu be mu shikuuka sha Dani, baaba nga bamenya iyo mu shibala she mu ngoongo, nga sibabafukiilisa khukhwiikhakho isina wayo ta. 35Babaandu ba Amori bano ndi luundi beewelayo ilala khukhwiwaambila Lukiingi Heresi, ni Ayijaloni atweela ni Shalubimu, baakhalawo khuumenya mu bweene imwo. Ne lwanyuma babaandu be mu shikuuka sha Yusufu ni baaba be kamaani, beekyelisa ba Amori bano khuuba baakulwa baabwe khuubaraambila.

36Lulwaakha lukhale lwe ba Amori lwaba khukhwaama i Bubiriro bwa Akurabimu khukhwoola i Sela ni khuutsya khubirisawo.