Swahili Bible2

8

Luruungo lwe babaandu babaakobola ni Ezira

1Luno nilwo luruungo lwe baakhulu be bukuuka bukyeekhe, bubwaba buli mu bubowe mu Babulooni. Nibo beesi Ezira aaraangilila khuukobola i Yerusalemu, nga Aritatsatsesi niye umuyiinga.

2Mu betsukhulu ba Finehasi mwaamamwo Geroshomu;

mu betsukhulu ba Isamari, mwaamamwo Danieli;

mu betsukhulu ba Dawudi, mwaamamwo Hatushi 3uwaba umusooleli wa Shekaniya;

mu betsukhulu ba Paroshi, mwaamamwo Zekariya, atweela ni basaani baboola shitoondo shitweela ni kamakhumi karaano (150) babaaronebwa;

4mu betsukhulu ba Pahasi-Mowaabu mwaamamwo Eliyehoyenayi, umwaana wa Zekariya uwaba ni basaani baboola bitoondo bibili (200);

5mu betsukhulu ba Zatu, mwaamamwo Shekaniya umusooleli wa Yahaziyeli, uwaba ni basaani baboola bitoondo bitaru (300);

6mu betsukhulu ba Adini, mwaamamwo Ebedi umusooleli wa Yonasani, uwaba ni basaani baboola kamakhumi karaano (50);

7mu betsukhulu ba Elamu, mwaamamwo Yeshaya umusooleli wa Ataliya, uwaba ni basaani baboola kamakhumi musaafu (70);

8mu betsukhulu ba Shefatiya, mwaamamwo Zebadiya umusooleli wa Mikayili, uwaba ni basaani baboola kamakhumi shinaane (80);

9mu betsukhulu ba Yowabu, mwaamamwo Yehiyeli, uwaba ni basaani baboola bitoondo bibili ni likhumi na shinaane (218);

10mu betsukhulu ba Bani mwaamamwo Shelomisi umusooleli wa Yosifiya, uwaba ni basaani baboola shitoondo shitweela ni kamakhumi kasesaba (160);

11mu betsukhulu ba Bebayi, mwaamamwo Zekariya umusooleli wa Bebayi, uwaba ni basaani baboola kamakhumi kabili na shinaane (28).

12Mu betsukhulu ba Azigadi mwaamamwo Yohanani umusooleli wa Hakatani, uwaba ni basaani baboola shitoondo shitweela ni likhumi (110).

13Mu betsukhulu ba Adonikamu, nimwo mumwaamamwo babaakamayo, ni kamasiina kaabwe kaaba nibo Elifeleti, Yewuweli, ni Shemayiya, nga bali ni basaani baboola kamakhumi kasesaba (60).

14Mu betsukhulu ba Bigivayi mwaamamwo Usayi ni Zakuri, nabo baaba bali ni basaani baboola kamakhumi musaafu (70).

Khuukobolayo i Yerusalemu

15Nabuusanisa babaandu bano boosi aambi ni luluutsi lulubirira mu shiriimba sha Ahava, khwaaba ibweene iyo mu kaambi khuumala biifukhu bitaru. Ne ni naweentselesa mu baandu babaabawo boosi, sinanyoolamwo n’umu Levi na mutweela ta. 16Isho shaakila naarumanisa basaani babaaba baaraangilisi nga nibo; Eliyazaari, Ariyeli, Shemayiya, Elunasani, Yaribu, Elunasani, Nasani, Zekariya, ni Meshulamu. Neelayo luundi naarumanisa Yoyaribu ni Elunasani, babaaba basaani be kamakhula. 17Lwanyuma ndi naarumanisa Ido, uwaba umuraangilisi mu Kasifiya. Naabalomela bamuloombe niye ni basheewe, atweela ni baraambi be mu lisaayilo, banyalise khukhwakaanisayo babaandu beetse khukhwakaanisa mu Lisaayilo lya Wele.

18Ni lwe bubweela bwa Wele buukali bubwaba khusiifwe, baakhusiindikhila Sherebiya, uwaba umusaani uwe kamakhula, uwe muungo mwa Mahili, umwaana wa Levi, uwaba umwaana wa Isiraeli. Sherebiya eetsa ni basooleli beewe atweela ni baalebe beewe baboola likhumi na shinaane. 19Khukhwiilakho baakhurumanisila Hashabiya ni Yeshaya, babaaba be muungo mwa Merari. Bano beetsila atweela ni baalebe baabwe baboola buukali kamakhumi kabili. 20Baalooselakho babaakaanisi babaandi baboola bitoondo bibili ni kamakhumi labili (220), babaareebwawo n’umuyiinga Dawudi atweela ni baakhulu basheewe babaandi lwe khuuyeeta ba Levi. Babaandu bano boosi baaronebwa kamasiina buli mutweela.

Ezira araangilila babaandu mu khubuya ntsala ni khuuloomba

21Iyo isi khwaba aambi ni luluutsi Ahava, nawa shiilakilo ndi babaandu babuye ntsala, bewunamile mu moni tsa Wele, bamuloombe khuukhuraangilila ifwe khu lukyeendo lweefwe, ifwe atweela ni babaana beefwe, nga khuli ni bye buyiindifu byeefwe. 22Ise kamaŋaanyu kamaamba khuutsya inoombe umuyiinga khuukhuwa baselikhale khuukhukhiinga mu ntsila. Lwekhuuba ise naba naaboolela khaale umuyiinga ndi Wele weefwe niye ukhiinga buli muundu yeesi uumwisaaya mu ŋali, ne lirima lyeewe litindiima khulwooyo uumwantsukha. 23Nashiryo, ifwe khwaabuya ntsala, khwaaba nga khwikoontselela Wela umweene khuukhukhiinga ifwe. Aryo weelamwo khuuloomba khweefwe.

Biwaanwa bye Lisaayilo Likhulu

24Lwanyuma naaroborayo basaayi baaraangilisi likhumi na babili, nga nibo Sherebiya, ni Hashabiya, atweela ni babandayaabwe likhumi. 25Neelayo naapimaka biwaanwa bye feetsa ni bye zaabu, ni bibiindu bibiindi, byeesi umuyiinga, baawi beewe be kamakyesi, baaraangilisi babaandi atweela ni babaandu ba Isiraeli boosi babaaba nga baliwo, byeesi baawaanayo khuuraambisibwa mu Lisaayilo Likhulu lya Wele weefwe. Lwanyuma naabiwa basaayi. 26Busiro bwe bibiindu byeesi napiima bwoola buri: Ifeetsa tsitani kamakhumi kabili na tsibili (22).

Bibiindu bye feetsa shitoondo shitweela (100), bibyoolamo tsikilo kamakhumi musaafu (70).

Izaabu tsikilo bikana bitaru ni bitoondo bine (3,400).

27Bipwakhuli bye zaabu kamakhumi kabili bibyoolamwo aambi tsikilo shinaane ni shisiintsa (8.5).

Ni buroonzi umupyeeluuse buulayi, uwaba ni kumukaso abe kukulekhaana ni zaabu.

28Nakyelawo naababoolela ndi “Inywe muli bakwalaafu b’Omukasya, Wele we bakuuka beenywe, nga bibiindu bye feetsa ni zaabu bino ni bili bikhosefu. Biwaanwa bino byawaanibwileyo isi Umukasya akhali khuuwaanyiinyibwa ta. 29Nashiryo imbakhupilisa ndi mubiliinde luundi mubiloleleele buulayi, khukhwoolesa ni muli bipimila i Yerusalemu, khu Lisaayilo Likhulu, mu moni tse basaayi babaafuura bukhulu, ni ba Levi, atweela ni baaraangilisi be tsiingo mu Isiraeli.”

30Baryo basaayi ni ba Levi baayila bibiindu bye feetsa ni zaabu ni bibiindu bibiindi bikhosefu bibyaba byaamalile khuupimibwa, baabiliinda nio bitsye byoolesebwe mu Lisaayilo Likhulu lya Wele mu Yerusalemu.

Khuukobolayo mu Yerusalemu

31Khu shifukhu she likhumi na bibili, she mu mweesi kukuunyoowa, khwasiimbula khukhwaama khu luutsi Ahava, khwaarakikha lukyeendo lwe khuutsya i Yerusalemu. Kumukhono kwa Wele weefwe kwe kamaani kwakhubakho nga ni khwakyeenda, nga Wele akhukhiinga ifwe, baasiku beefwe balekhe khukhwiibwakala ta. 32Khuryo ni khwoola i Yerusalemu, khwaawolakho khuumala biifukhu bitaru.

33Lwanyuma khu shifukhu she khaane khwaatsya khwenjila mu Lisaayilo lya Wele. Mu bweene umwo, ifeetsa tsana ni zaabu, ni bibiindu bibiindi bikwalaafu byapiimiibwa, byaweebwa isi Meremosi, umwaana wa Uriya. Ni babaandi babaaba ni naye baaba nibo Eliyazaari, umwaana wa Finehasi, ni ba Levi babili nga nibo Yozabadi, umwaana wa Yeshuwa, ni Nowadiya, umwaana wa Binuyi. 34Bibiindu byoosi byabalibwa luundi byaapimibwa, lwanyuma byaruungikhibwa buulayi mu burone.

35Abo boosi babaakobola khukhwaama mu bubowe baawaanayo tsisaayilo tsintsoshe khu sheeso isi Wele wa Isiraeli. Baawaanayo tsiwuunwa likhumi na tsibili khulwe ba Isiraeli boosi, kamamiiku kamakhumi syeenda na kasesaba, ni kamasheese kamasooleli kamakhumi musaafu na musaafu kamaseetsa, nako kaawaanibwayo khu sheeso. Baryo bawaanayo ni tsiindurume likhumi na tsibili lwe bibyoonako bye babaandu. 36Babaandu beene abo baareera buurume bw’omuyiinga, baabuyila isi ba gafana, ni baaraangilisi babaandi be Bukwanyaanga we Luluutsi Efurati. Shishakila baaraangilisi beene bano baanyalisa khuuwa buuyeeti lwe babaandu ba Isiraeli, ni lwe Lisaayilo Likhulu lya Wele.