Swahili Bible2

7

Ezira naye akobola i Yerusalemu

1Lwanyuma lwa bino byoosi, nga umuyiinga Aritatsatsesi niye uwula Pasiya, Ezira umusooleli wa Sheraya, umusooleli wa Azariya, umusooleli wa Hilukiya, 2umusooleli wa Shalumu, umusooleli wa Zadoki, umusooleli wa Ahitubu, 3umusooleli wa Amariya, umusooleli wa Azariya, umusooleli wa Merayosi, 4umusooleli wa Zerahiya, umusooleli wa Uzi, umusooleli wa Buki, 5umusooleli wa Abishuwa, umusooleli wa Finehasi, umusooleli Eliyazaari, umusooleli Aroni, uwaba umusaayi umukhulu. 6Ezira waarurayo weetsa khukhwaama mu Babulooni. Niye aaba umumanyilifu naabi mu buleekeli bwe kamakaambila ka Musa, keesi Umukasya Wele wa Isiraeli aabawa. Umuyiinga aaba waabaweele byoosi byeesi baamuloomba, lwekhuuba kumukhono kw’Omukasya kwaba khu niye.

7Bayudaaya babaandi nabo beetsa, nga mulimo basaayi, ba Levi, babeembi be kimyeenya, baaliindi be Lisaayilo Likhulu, atweela ni babaakaanisi be mu Lisaayilo. Bano boosi baakobolaka mu Yerusalemu atweela ni Ezira, mu mwiiko kwe kumusaafu, kwe buwuli bwa Aritatsatsesi. 8Ne Ezira niye oolayo mu Yerusalemu mu mweesi kwe kharaano, kwe mu mwiiko kweene kwe kumusaafu. 9Khukhwaama i Babulooni, lukyeendo aarurakikha khu shifukhu shishinyoowa, she kumweesi kukuunyoowa, shaakila woola i Yerusalemu khu shifukhu shishinyoowa she kumweesi kwe kharaano. Bino byoosi byaba biryo lwekhuuba kumukhono kwe bubweela bwa Wele kwaba khu niye. 10Ezira aamenya buulamu bweewe bwoosi nga eyika, luundi nga aloondelela bibyaronebwa mu makaambila k’Omukasya, ate nga akaleekela babaandu ba Isiraeli babaandi.

Buurone bweesi umuyiinga Aritatsatsesi aawa Ezira

11Ezira, aaba umusaayi, luundi umusaani umuleekele naabi mu bye kamakaambila ni biilakilo byeesi Umukasya Wele aawa ba Isiraeli.

Buno nibwo buurone bweesi umuyiinga Aritatsatsesi aakaanisa isi ali: 12Ise umuyiinga umukhulu Aritatsatsesi, ikhusheesa naabi iwe umusaayi Ezira, luundi umuleekeli we Kamakaambila ka Wele uwe likulu.

13Indusa shiilakilo ndi, umuundu yeesi mu baandu ba Isiraeli babaamenya mu buyiinga, oba umusaayi, namwe umu Levi, ukana khuukhwiilayo i Yerusalemu atweela ni nawe, anyala waatsya. 14Lwekhuuba ise atweela ni baawi baase be kamakyesi musaafu khwaafukiilisanile khuri, mutsye muweentselese bibiwaamba khu Yuda, ni Yerusalemu, ni bibiindu bibiwaamba khu makaambila ka Wele weenywe, khuubona muri mukaloondelela. 15Ne ndi ate nga mutsya, muli ni khuusutakho izaabu ni feetsa, byeesi ise umuyiinga atweela ni baawi baase be kamakyesi khuli khuwaanayo isi Wele wa Isiraeli, uuli ni Lisaayilo lyeewe Likhulu i Yerusalemu. 16Muli ni khuusuta izaabu ni feetsa, byeesi kane mube nga mwaabuusanisile khukhwaama mu bifwo byoosi bye mu Babulooni. Muyile ni biwaanwa bibiindi byoosi byeesi babaandu beenywe babeene, atweela ni basaayi baawaanayo nga beekanisa, lwe Lisaayilo Likhulu lya Wele weenywe liliili i Yerusalemu.

17Ngana muraambise tsinusu tsino buulayi, mutsye mukule tsiwuunwa tsitsifuura buulayi, kamamiiku, kamasheese kamasooleli, biilime bibyoomu, atweela ni viini. Lwanyuma mubiwaaneyo nga tsisaayilo khu sheeso shishiili khu Lisaayilo lya Wele Likhulu liliili i Yerusalemu. 18Ne siinga ibawo ifeetsa namwe izaabu bibinaramakho, iwe atweela ni Bayudaaya bashoowo, munyala mwaabiraambisa musaambo yoosi iyikhoyesa Wele weenywe. 19Muli ni khuuwayo isi Wele, bibiindu byoosi bibiwaanibwileyo lwe khuuraambisibwa mu khwiisaaya mu Lisaayilo Likhulu. 20Ne siinga mubayo ni shishiindu shiindi shoosi sheesi mukana khuuraambisa khu Lisaayilo Likhulu, mutsya mufune tsinusu khukhwaama mu libiikhilo likhulu lye buyiinga.

21Ari ise umuyiinga Aritatsatsesi, indi khuulakila baabiikhi boosi babaali mu Shisiintsa she Bukwanyaanga we luluutsi Efurati, indi bawe umusaayi Ezira luundi umuleekeli we Kamakaambila ka Wele, bibiindu byoosi bibinakanibwa, akhali khuuwaanyiinyibwa ta. 22Kane bafukiilisibwe khuukaba bukali bubwoolesa tsikilo bikana bitaru ni bitoondo bine (3,400) bye feetsa, tsikilo kumukaanda mutweela (10,000) kwe ŋaano, tsi lita bikana bibili (2,000) bye viini, tsi lita bikana bibili (2,000) bye kamafura ke ku oliveti, ni kumuunyu kwoosi kukunakanibwa. 23Bibiindu byoosi byaakha khukholebwa khuusiintsiila khu bilakilo byeesi Wele we likulu aweele, nio alekhe khukhuukhalalila ise umuyiinga uliwo ari atweela ni basooleli baase babaalintsilila mu bikyele ta. 24Naluundi ingana khuubamanyisa ndi mbaawo basaayi, namwe ba Levi, namwe babeembi be kimyeenya, namwe baaliindi, namwe babaakaanisi be mu Lisaayilo Likhulu, namwe baraambi babaandi boosi babaakane basasule kumusolo kwe saambo yoosi ta.

25Ari ni nawe Ezira, ngana uraambise kamakhula keesi Wele aakhuwa iwe, urobore baaraangilisi ni baakayi khuuwula babaandu boosi babaali mu Shisiintsa she Bwaamanyaanga we luluutsi Yorudaani, babaaloondelela Kamakaambila ka Wele weenywe. Ne abo babaaba nga bashiili khuukamanya ta, iwe uli ni khuubaleekela. 26Ne umuundu yeesi ukhakane aloondelele Kamakaambila ka Wele weenywe, ni shiilakilo sh’omuyiinga ta, mwaakha khuumuwa shiitaambiso she kamaani. Umuundu ufwaana aryo aakha khukhwiiribwa, namwe khuumuwoona arure mu shibala shino, namwe khuumurusakho bibiindu byoosi byeesi ali ni nabyo.

Ezira aruuya Wele

27Lweebyo byoosi Ezira waaruuya Wele nga aloma ari: “Umukasya Wele we bakuuka beefwe aruuyibwe naabi! Lwekhuuba aara mu mwoyo kw’omuyiinga shiriiso she kamaani naabi isi Lisaayilo Likhulu ly’Omukasya liliili mu Yerusalemu. 28Ni lwe shiisa sheewe shikali, Wele aalakila umuyiinga, ni baawi beewe be kamakyesi, ni baakhulu babaandi, khukhuumbirisa ise buulayi bari. Naluundi lwekhuuba kumukhono kw’Omukasya Wele kwanjeeta naabi, ise neelamwo kamaani, naanyalisa khuubuusanisa baaraangilisi baakali be ba Isiraeli, khukhwiitsa ni nase.”