Swahili Bible2

6

Banyoola shiilakilo sheesi Sayiraasi aawa

1Lwanyuma umuyiinga Dariyaasi waarusa shiilakilo ari baweentselese buulayi mu byaronebwa biikhale bibyaba byaabiikhibwa mu Babulooni. 2Mu shiriimba Ekibatana, shishaba shiriimba shikhulu mu shisiintsa sha Mediya, aabawo burone bubwanyoolekhana, nga buloma buri: “Buurone bwa buraawa bwokyesa buri, 3mu mwiiko kwa Sayiraasi kukuunyoowa, nga ali umuyiinga, aawa shiilakilo khukhwoombekha bushaakha Liisaayilo Liikhulu lya Wele mu Yerusalemu, mweesi bali ni khuuwaanilayo tsisaayilo ni biwaanwa bibiindi bye khukhwoosha. Lisaayilo lino Likhulu nga lili ni khukhwoolesa tsimita kamakhumi kabili na musaafu (27) buuleeyi khuuniina mu ngaaki, ni tsimita kamakhumi kabili na musaafu (27) buubalaayi, 4nga khulikho tsileeya tse kamabaale tsitaru, ni leeya ndweela iye tsimbaawo. Libiikhilo lye buyiinga nilyo liliili ni khuusasulila bibiindu bino. 5Lwanyuma mwiisakeyo bibiindu bye zaabu, ni bye feetsa byeesi Nebukaduneeza aareera i Babulooni khukhwaama mu Liisaayilo Liikhulu, mubibiikhe mu bifwo byabyo bibyeene.”

Umuyiinga Dariyaasi alakila ari kumulimo kwiiloosele

6Umuyiinga Dariyaasi waarumanisa buurume buno: “Isi Tatenayi, gafana we shisiintsa she bukwanyaanga wa Efurati, ni Shesari Bozenayi, atweela ni baawi beenywe be kamakyesi; mwaakha khuubona muri simuba aambi ni kumulimo kwe khukhwoombekha Liisaayilo Liikhulu ta. 7Mukhekhupila mu mulimo kuno kwe khukhwoombekha Lisaayilo lya Wele ta. Mulekha gafana we Bayudaaya, ni baasakhalu baabwe khukhwoombekha bushaakha Lisaayilo mu shifwo mweesi lyaba makiboole, mukhabakhaangabisa ta.

8Ni khuurakikhilawo, indusa shiilakilo ndi muyeete baaraangilisi bano mu khwoombekha bushaakha Lisaayilo lya Wele. Inywe mwaakha khuubasasulilawo tsinusu khukhwaama khu misolo kikibuusanisibwa khukhwaama i Bukwanyaanga wa Efurati, nio kumulimo kuno kulekhe khukyelewa ta. 9Ni bibiindu bibiindi bibikanibwa ni basaayi mu Yerusalemu lwe khuuwaanayo tsisaayilo isi Wele we mwikulu, nga nibyo: tsiwuunwa tsisooleli, kamamiiku, kamasheese, ni khuutubaasakho iŋaano, kumuunyu, iviini, ni kamafura ke kumusabibu; mwaakha khuubibaweelawo khaangu naabi. 10Ingana mubawe bibiindu bino byoosi, nio nabo banyalise khuuwaanayo tsisaayilo isi Wele we mwikulu, shibanyalisise khuukhunoombela ise umuyiinga ni muungo mwase.

11Naluundi indusa shiilakilo shishiindi ndi, siinga ibawo umuundu yeesi ushuusakho likaambila lino, muli ni khukhwiinyusakho kumurongoolo khukhwaama khu ntsu yeewe, mukusongoole khu lubeka lutweela, mumuwune kumubiremo, atsuungatsuungekho. Ni lwe lomo nga yino, intsu yeewe yaakha khufuniaakibwa yikyele busa nga shibilikye busa. 12Inoomba Wele uwisaayibwa mu Yerusalemu arusilewo ilala umuyiinga yeesi, namwe linaambo lyoosi lilinyala lyashuusamo shiilakilo shino sheesi imbaweele, namwe uyo ukhakakho khufuniaaka Lisaayilo Likhulu ilyo luundi. Ise Dariyaasi samweene niye uubaweele biilakilo bino, naluundi isuubila ndi buli mutweela kane abiloondelele ni bubwiitsiliilisi buukali naabi.”

Khuumaliilisa ni khuuwaanayo Liisaayilo Liikhulu

13Lwanyuma gafana Tatenaayi, Shesari Bozenayi, atweela ni baawi baabwe be kamakyesi, baakhola sheesi umuyiinga Dariyaasi aabalakila ni bubwiitsiliilisi bukali naabi. 146.14 a Hag 1.1; b: Zek 1.1Baryo baaraangilisi be Bayudaaya beeloosela buulayi naabi khuukhola kumulimo kwe khukhwoombekha bushaakha Liisaayilo Liikhulu, nga umuŋoosi Hagayi ni Zekariya umusooleli wa Ido babaabeesamwo kamaani ni biilomo bye buŋoosi. Baryo baamaliilisa kumulimo kwe khukhwoombekha Liisaayilo Liikhulu, nga baloondelela liikaambila lya Wele, ni biilakilo bya Sayiraasi, Dariyaasi, atweela ni Aritatsatsesi umuyiinga wa Pasiya. 15Kuryo kumulimo kwe khukhwoombekha Liisaayilo Liikhulu kwaamaliilisibwa khu shifukhu she khataru, mu mweesi kwa Adari, mu mwiiko kwe khasesaba, kwe buwuli bw’omuyiinga Dariyaasi.

16Baryo babaandu ba Isiraeli boosi, nga mulimo basaayi, ba Levi, na buli mutweela yeesi uwakobola khukhwaama mu bubowe, baaba nga betsuule kumwiikhoyo, nga bekhoyela kumukholo kwe khuuwaanayo Lisaayilo lya Wele Likhulu. 17Khu mukholo kuno kwe khuuwaanayo Lisaayilo Liikhulu, baawaanayo tsiwuunwa shitoondo shitweela (100), kamasheese bitoondo bibili (200), kamasheese kamasooleli bitoondo bine (400), nga tsisaayilo. Naluundi baawaanayo ni tsindurume likhumi na tsibili nga tsisaayilo tse bibyoonako bye bikuuka likhumi na bibili bye ba Isiraeli. 18Baryo beesawo basaayi be ba Levi, khuukhola kimilimo kyaabwe kya buraawa mu Yerusalemu, nga baloondelela biilakilo byeesi Musa aabaronela.

Kamayiiya ke Khuubirakho

196.19: Luky 12.1-20Khu shifukhu she likhumi na bine, mu mweesi kukuunyoowa, babaandu boosi babaakobolaka khukhwaama mu bubowe, bekhoyela kamayiiya ke Khuubirakho. 20Lwekhuuba basaayi atweela ni ba Levi baaba nga bekhosesele, nga ari abe baakhila khuuraangilila khukhwiisaaya. Baryo baalala khu nibo baakhoonya Kamasheese ke Khuubirakho khulwe babaandu babaakobolaka, ni basaayi bashaabwe babaandi, ni khuyililamwo babeene.

21Babaandu ba Isiraeli babeene babaakobolaka khukhwaama mu bubowe baalya tsisaayilo tsino, atweela ni babesanwa baabwe, babaaba nga baalekha tsisaambo tsaabwe tse kamanaambo kakaandi, nio banyalise khukhwiisaaya Umukasya Wele wa Isiraeli. 22Baryo khuumala biifukhu musaafu bibuufu, baaba nga beekhoyela Kamayiiya ke Kumukaati kukuukhasiila ta. Babaandu boosi baaba ni kumwikhoyo kumukali lwekhuuba Umukasya Wele wa Isiraeli aashuusa kumwoyo kw’omuyiinga wa Asiriya, waabawaambila shiisa nga abayeeta khukhwoombekha Lisaayilo Likhulu.