Swahili Bible2

4

Baasiku babaakhaandisa khukhwoombekha Liisaayilo Liikhulu

1Baasiku be bikuuka bya Yuda ni Benyamini, baawulila bari babaandu babaakobolaka khukhwaama mu bubowe balikho bombekha bushaakha Liisaayilo Liikhulu ly’Omukasya, Wele wa Isiraeli. 24.2: 2 Bay 17.24-41Kila batsya isi Zerubabeli, ni isi baakhulu be tsiingo babaaramile, babaalomela bari, “Lekha khuubayeeteekho khukhwoombekha! Lwekhuuba nafwe khukhwaamila mu biseela byeesi umuyiinga Esaruhadoni uwa Asiriya, aakhureerera ano, khuubeele nga khwiisaaya Wele weenywe, naluundi nga khuwaanayo tsisaayilo isi niye.”

3Ne Zerubabeli, ni Yeshuwa, atweela ni baaraangilisi be tsiingo babaaramile baabeelamwo bari, “Inywe simulikho ni kumukabo kwoosi mu khwoombekhela Umukasya Wele weefwe, Liisaayilo Liikhulu ta! Ifwe fwabeene fwenyene khutsya khulyoombekha, khuusiintsiila khu shiilakilo sheesi Sayiraasi, umuyiinga wa Pasiya aakhuwa ifwe.”

4Lwanyuma babaandu bababesaanewo ni shiifwo isho, baatsya nga bamalamwo babaandu kamaani, nga babalomela tsilomo tsitsiyeembelesa, nio baakamise khukhwoombekha. 5Baatsya baakulilila babaandu khuubona bari bakhaasisa kumulimo kukhatsya mu moni ta. Babaandu baakhola shishiindu shino, khu mbuka isi Sayiraasi aabeela umuyiinga, ni khukhwoolesa khu mbuka ya Dariyaasi naye nga ali umuyiinga wa Pasiya.

64.6: Esit 1.1Uri mu mwiiko kukuunyoowa kwa Ahasweero nga niye umuyiinga, baasiku bano baarona burone bubutsuntsumilisa babaandu be mu Yuda ni Yerusalemu.

7Ndi luundi khu mbuka ya Aritatsatsesi nga niye umuyiinga wa Pasiya, Bishilamu, Tabeeli, ni baawi baabwe be kamakyesi, beetsa atweela baarona burone bubuundi. Burone buno bwaba mu lulomo Luaramayiki, ne babushuusa ni mu nimi tsitsiindi. 8Rehumu naye nga niye gafana, ni Shimushayi nga niye umuroni umukhulu, baarona burone bubuwaamba khu Yerusalemu isi Aritatsatsesi. 9Burone buno bwaronebwa ni Rehumu, nga niye gafana, ni Shimushayi, nga niye umuroni, ni baawi baabwe be kamakyesi, nga mulimo ni baakayi, ba gafana, ni baakhulu babaandi be angaaki ni be aasi. Mu khurona burone buno, betubaasibwakho ni babaandu babaandi khukhwaama i Ereki, ni Babulooni, ni babaandi ba Elamu, khukhwaama i Susa, 10nga bali atweela ni babaandu babaandi khukhwaama mu manaambo ke aleeyi, beesi Osinaparu umukhulu luundi uwe angaaki, aareera ni kamaani baamenya mu biriimba bya Samariya, ni mu bisiintsa bibiindi bibyaba aambi ni Luluutsi Efurati. 11Buurone buno bwaba buri: Isi umuyiinga we lukoosi Aritatsatsesi, ifwe khuli babaakaanisi boowo babaama i Bukwanyaanga we luluutsi Efurati. Khwaakhukheesile naabi.

12Umuyiinga uli ni khuushimanya uri, Bayudaaya babeetsa khukhwaama iyo mu shibala shoowo, baayitsa bali i Yerusalemu, balikho boombekha shiriimba shiibi ate she bumoyaani isho luundi. Isi khulomela ano, bali aambi khuumaliilisa khukhwoombekha litikiiyi, ni khuumiliisa kimisiingi.

13Naluundi, O umuyiinga, uli ni khuushimanya uri siinga shiriimba shino shiwa khukhwoombekhebwa, ni kamatikiiyi kareebwakho, Bayudaaya bano singene basasule kimisolo kyoosi kikikanibwa ta, isho shinakila kamapeesa kaboombe mwibiikhilo lyoowo.

14Na shiindi ndi, ifwe khuli ni buufunisi bukali isi lubili lwoowo, sishikhwaakhila ifwe khuubona nga umuyiinga weefwe awamwo lukoosi ta. Shikila khukhwakaanisa iwe umuyiinga burone buno. 15Shikile iwe ulakile ibewo khuweentselesa mu shitabo she bibyaamayo bye bakuuka. Mu nibyo kane winyoole luundi ushimanye uri shiriimba shino Yerusalemu shaayitsulamwo bayiinga banabumiinyi, babaareera bukosi, babaakila babaandu baaminyaalila bayiinga beefwe khukhwaama mu biseela bye khaale. Shino nisho shishakila shiriimba shino shaakhupibwa shaahela. 16Nashiryo kila khukana khukhuboolela iwe umuyiinga khuri, siinga ulekha shiriimba shino shoombakhibwa, ni kamatikiiyi keesibwawo bushaakha, iwe singene ubekho ni bunyala bwoosi mu bisiintsa bye shanjelekha bye Bukwanyaanga ta.

17Kila umuyiinga Aritatsatsesi naye elamwo ari:

Isi Rehumu, umukhulu we liiye, Shimushayi umuroni umukhulu, ni bashoowo boosi babaamenya iyo mu Samariya, atweela ni biifwo bibiindi bibiili shanjelekha we Ibwaamanyaanga we Luluutsi Efurati. Mweesi imbasheesa naabi.

18Burone bweesi mwaronile, baabushuusiile ise, baabusomela buulayi bubweene. 19Ise narusile likaambila, nashiryo baatsya baaweentselesa buulayi. Shatsiile khunyoolikhana nga khukhwaama khaale, shiriimba Yerusalemu shaayitsulamwo banabumiinyi, shilimwo babaandu babaareera bukosi, naluundi bareerera babaandu babaandi khuuminyaalila baawuli. 20Naluundi bayiinga be kamaani naabi baawula khukhwaama mu Yerusalemu, baawula bisiintsa biikali naabi khuutsya khwoolela ilala Ibwaamanyaanga we Luluutsi Efurati, nga babuusanisa kumusolo kwa buli saambo yoosi.

21Ari ingana mulakile basaani bano baakamise kumulimo kwe khukhwoombekha bushaakha shiriimba, khukhwoolesa nikane induse shiilakilo shishiindi. 22Mwaakha mubone muri shishiindu shino mushikhola mu bwaangu naabi, akhali khuukyelewa khwoosi ta, nio ilekhe khuubawo bukosi bwoosi bubwoola khu muyiinga ta.

23Nga buurone khukhwaama isi Aritatsatsesi ni bwamala khuusomebwa buri, gafana Rehumu, Shimushayi umuroni umukhulu, ni baawi baabwe be kamakyesi, benyukhilamwo khaangu baatsya i Yerusalemu, khuutsya khwakaamisa Bayudaaya khukhwoombekha bushaakha shiriimba. 244.24: Hag 1.1; Zek 1.1Kuryo kumulimo kwe khukhwoombekha Liisaayilo Liikhulu lya Wele mu Yerusalemu kwakama. Bayudaaya sibeelayo luundi khuukholakho kumulimo kwoosi ta, khukhwoolesa lwanyuma nga Dariyaasi wekyelile umuyiinga wa Pasiya.