Swahili Bible2

10

Babaandu beebiyisa buubi bwaabwe

1Aryo Ezira n’aba nga alikho aloomba, nga alila kamasika, naluundi nga ebiyiisa bibyoonako bye babaandu ba Isiraeli iburaangisi we Ntsu ya Wele, lituuli lye babaandu baakali babeene, basaani ni bakhasi, ni khuutubakho babaana, khukhwaama mu Isiraeli mwoosi, beetsa baabuusana isi ali; nabo baalila ni kumutaambo kumukali. 2Lwanyuma kila Shekaniya, umusooleli wa Yehiyeli khukhwaama mu betsukhulu ba Elamu, waakanikha isi Ezira ari, “Ifwe sikhwaakhuba babeyikinwa isi Wele weefwe ta, lwekhuuba khwaayilakile bakhasi khukhwaama mu manaambo ke babaandu babaakhwibotokheleele. Ne abe shakhaba nga shili shiryo, ishiiliyo kumwiyikino lwe babaandu ba Isiraeli. 3Nashiryo ari khakhukhole indakaano nga khusuubisa isi Wele weefwe, nga khuloma khuri khuwoone bakhasi bano, atweela ni babaana baabwe, khuuloondelela kamakyesi koowo, ni kamakyesi keesi babaandu babaandi babaarya Wele bakhuweele ifwe. Khuryo khushikhole nga khuusiintsiila khu sheesi kamakaambila kaloma. 4Ezira, ari iwe yinyukha, ubekho ni sheesi ukhola. Ifwe khunakhuyeeta mu buli sheesi ukhola shoosi. Nashiryo n’uwilemo busa kamaani ushikhole.”

5Aryo Ezira wenyukha aasi, waakholisa basaayi baakhulu boosi, ni ba Levi, atweela na buli muundu yeesi mu Isiraeli shishitsubo she khuukhola byoosi byeesi baaloma bari kane bakhole. Baryo babaandu boosi betsuba, khuuloondelela kamakyesi ka Shekaniya. 6Lwanyuma Ezira wenyukha waarura khu Lisaayilo Likhulu lya Wele, waatsya waakona mu bitweela khu biseenge bye mu ntsu ya Yehohanani, umusooleli wa Eliyashibu shiilo isho. Lwe kumutaambo kumukali naabi, lweesho sheesi babaandu baakhola, niye saalyakho biilyo byoosi, namwe waanywakho kameetsi koosi ta.

7Baarusa shikuukuulo khuutsya mu Yerusalemu ni mu Yuda mwoosi, nga shilaanga atweela babaandu boosi babaakobolaka khukhwaama mu bubowe, babuusanile mu Yerusalemu. 8Umuundu yeesi uwakhaasikha khukhwiitsa mu biifukhu bitaru, abe afwiila bye buyiindifu byeewe byoosi byeesi aaba ni nabyo, khuusiintsiila khu shiilakilo sheesi baakhulu ni baasakhalu baabirisa. Naluundi abe umuundu ufwaana aryo, bamuyila nga umunaambo, ukhali mutweela khu baandu babaakobolaka ta. 9Baryo mu mbuka iye biifukhu bitaru, khu shifukhu she kamakhumi kabili, she mu mweesi kukuukhola syeenda, basaani boosi khukhwaama mu Yuda ni mu Benyamini mwoosi, beetsa i Yerusalemu, baabuusana atweela mu lwaanyi lwe Lisaayilo Likhulu. Boosi bekhala iyo nga balikho banikina busa lwe lomo iyo, ni lwekhuuba ndi abe ifula nameyirira inyene ilikho ikhupa.

10Aryo kila umusaayi Ezira enyukha khu ngaaki waaloma ari, “Inywe mwabeele babaandu babaakhali babeyikinwa isi kamakaambila ka Wele ta, isho shaakila mwaayilaka bakhasi banaambo. Isho shalooselakho buubi bweenywe. 11Ari ni mwibiiyise buubi bweenywe ubwo isi Umukasya Wele we bakuuka beenywe, mukhole sheesi akana. Ni mwiyawule khu bakhasi banaambo bano beesi mwayila, mulekhe khuubakho ni shishiindu shoosi she khuukholakana ni babaandu bano bababesaane inywe ano ta.”

12Kila babaandu boosi nabo beelamwo ni likono lya atweela nga baloma bari, “Uli mutuufu naabi. Ifwe kane khukhole isho sheesi ukhulomeele. 13Ne bona ano khuliwo babaandu baakali naabi, sikhunyala khweeloosela khukhwiimikha ano mu kufula nameyirira kuno ta. Naluundi, shishiindu shino sishinyala shakholekhela mu shifukhu shitweela ta, lwekhuuba fweesi khwayoneka naabi mu lomo yino. 14Ari lwashiina baakhulu beefwe bakharama ano mu Yerusalemu, baashikholakho khulweefwe fweesi. Lwanyuma buli muundu yeesi uwayilakho umukhasi umunaambo, uuli mu biriimba byeefwe, eetse khu mbuka yeewe, nga ali ni baaraangilisi, atweela ni baakayi be mu shiriimba sheewe. Siinga khukhola khu lomo yino khwaakimalawo, lirima lya Wele linyala lyaweelela lyakhururakho.”

15Khu shambaaso shino, Yonasani, umusooleli wa Asaheli, ni Yahizeyiya, umusooleli wa Tikuva, bonyene nibo babaashikhaandisa, nga baseembebwa ni ba Levi babili, Meshulamu ni Shabesayi.

16Baryo babaandu bano boosi babaakobolaka khukhwaama mu bubowe, baakhola nga ni baabalomela. Aryo umusaayi Ezira waaroboraka basaani babaaba baakhulu be tsiingo, baaruungikhaka kamasina kaabwe khu luruungo. Khu shifukhu shishanyoowa, mu mweesi kukuukhola likhumi, bekhala aasi khukhwiimenieelesa ilomo yino. 17Shino baashikhola khukhwoola khu shifukhu shishinyoowa she kumweesi kukuunyoowa, mu mwiiko kukweelakho, nga bashimenieelesa mutweelatweela khu basaani babaayila bakhasi banaambo.

Basaani babaanyoolekhana nga bali ni bakhasi banaambo

18Mu betsukhulu be basaayi abe babaayila bakhasi banaambo baaba nibo bano:

Mu khakuuka khakyeekhe kha Yeshuwa, umusooleli wa Yozadaki, ni babandaaye, mwabamo Maaseyiya, Eliyazaari, Yaribu, ni Gedaliya.

19Bano baasuubisa nga betsuba khuuwoona bakhasi baabwe banaambo, baafukiilisa ni khuuwaanayo limiiku litweela nga isaayilo lwe bibyoonako byaabwe.

20Khukhwaama mu khakuuka khakyeekhe kha Imeri, mwanyoolekhamwo Hanani ni Zebadiya

21Khukhwaama mu khakuuka khakyeekhe kha Harimu, mwanyoolekhamwo Maaseyiya, Eliya, Shemayiya, Yehiyeli, ni Uziya.

22Khukhwaama mu khakuuka khakyeekhe kha Pashuhuri, mwanyoolekhamwo Eliyoyenayi, Maaseyiya, Ishimaeli, Nesaneli, Yozabadi, ni Elasa.

23Mu ba Levi, babaaba nga bali ni bakhasi banaambo, baaba nibo: Yozabadi, Shimeyi, Kelaya (alala umanyikhaane nga Kelita), Pesahiya, Yuda, ni Eliyazaari.

24Mu beembi be kimyeenya, mwanyoolekhamwo Eliyashibu, uwaba n’umukhasi umunaambo.

Mu baliindi be khu Lisaayilo Likhulu, mwanyoolekhamwo Shalumu, Telemu, ni Uri.

25Mu baandu ba Isiraeli babaaramile, abo babaaba ni bakhasi banaambo baaba bari:

Khukhwaama mu khakuuka khakyeekhe kha Paroshi, mwabamwo Ramiya, Iziya, Malikiya, Mijamini, Eliyazari, Malikiya, ni Benaya.

26Khukhwaama mu khakuuka khakyeekhe kha Elamu, mwabamwo Mataniya, Zekariya, Yehiyeli, Abudi, Yeremosi, ni Eliya.

27Khukhwaama mu khakuuka khakyeekhe kha Zatu, mwabamwo Eliyoyenayi, Eliyashibu, Mataniya, Yeremosi, Zabadi, ni Aziza.

28Khukhwaama mu khakuuka khakyeekhe kha Bebayi, mwabamwo Yehohanani, Hananiya, Zabayi, ni Asilayi.

29Khukhwaama mu khakuuka khakyeekhe kha Bani, mwabamwo Meshulamu, Maluki, Adayiya, Yashubu, Sheyali, ni Yeremosi.

30Khukhwaama mu khakuuka khakyeekhe kha Pahasi-Mowabu, mwabamwo Adina, Kelali, Benayiya, Maseyiya, Mataniya, Bezaleli, Binuyi, ni Manase.

31Khukhwaama mu khakuuka khakyeekhe kha Harimu, mwabamwo Eliyazari, Ishiya, Malikiya, Shemayiya, Shimeyoni, 32Benyamini, Maluki, ni Shemariya.

33Khukhwaama mu khakuuka khakyeekhe kha Hashumu, mwabamwo Matenayi, Matata, Zabadi, Elifeleti, Yeremayi, Manase, ni Shimeyi

34Khukhwaama mu khakuuka khakyeekhe kha Bani, mwabamwo Maadayi, Amuramu, Uweli, 35Benayiya, Bedeya, Keluhi, 36Vaniya, Meremosi, Eliyashibu, 37Mataniya, Matenayi, ni Yaasu.

38Khukhwaama mu khakuuka khakyeekhe kha Binuyi, mwabamwo Shimeyi, 39Shelemiya, Nasani, Adaya, 40Makinadebayi, Shashayi, Sharayi, 41Azareli, Shelemiya, Shemariya 42Shalumu, Amariya, ni Yusufu.

43Khukhwaama mu khakuuka khakyeekhe kha Nebo, mwabamwo Yeyiyeli, Matisiya, Zabadi, Zebina, Yadayi, Yoweli, ni Benayiya.

44Babaandu bano boosi abe baayila bakhasi banaambo, ni babaandi khu nibo abe basaala ni nabo babaana. Baryo nga ni babaawoona, baabawoona ni babaana baabwe beene.