Swahili Bible2

9

Bibyaayo khuufwa

1Kila Umukasya alomela Musa ari, “N’utsye isi Faraawo umulomele uri Wele we ba Heburaniya, waalomile ari bari lekhuula babaandu beewe batsye nio banyalise khumwiisaaya. 2Ne nga waalobile khubalekhuula weloosela khuubawaambilila, 3kane areere luufu luubi naabi lukhoonyake bibyaayo byeenywe. Kane tsiŋwaaŋwa tseenywe ni tsisikilya, ni tsiŋamila, ni tsikhaafu, ni kamasheese ni tsimbusi tseenywe byoosi bifwe. 4Ne kane Umukasya atseete bibyaayo bye ba Isiraeli, ilekhe khubawo na shitweela shishiifwa ta. 5Shifukhu she kumukaamba nisho sheesi Umukasya akhaakholele shikholwa shino.”

6Khu shifukhu shisheelakho, bibyaayo byoosi bye ba Misiri byaafwa, ne ba Isiraeli baalekha khufwiilwakho na shitweela ta. 7Ne shitweela busa umuyiinga waashimanya, ne waarama nga okesanisa shikili, nashiryo waaloba khulekhuula babaandu khuutsya ta.

Shitaambiso she Kamabiimba

8Kila Umukasya alomela Musa ni Aroni ari, “Tsya muyoole likoshe khukhwaama mu mayika, Musa alihaanye mu ngaaki nga Faraawo waaboone. 9Kane likoshe ilyo limalatane Misiri yoosi, lireere khu babaandu boosi ni bisolo byoosi kamabiimba.”

109.10: Bimb 16.2Nashiryo baatsya baayoola likoshe, baatsya isi Faraawo. Musa waalihaanya mu ngaaki nga Faraawo waaboone. Ni abweene awo, kamabiimba kaakwa khu ba Misiri, ni bibyaayo byaabwe byoosi. 11Babaakhola bye khuulakula mu Misiri baalekha ni khuunyalisa khuutsya isi Musa ta, khulwekhuuba abe kamabiimba kaabawaambile boosi. 12Ne shitweela busa, Umukasya waakhola kumwoyo kwa Faraawo kwaaba nga kwaahandalaale, waalekha khurekeeresa bya Musa ni Aroni ta.

Shitaambiso she Kamararara

13Kila Umukasya alomela Musa ari, “Kumukaamba kumutikhinyi yinyukha amali utsye isi Faraawo, umulomele uri Wele uwe ba Heburaniya alikho akana ulekhuula babaandu beewe batsye bamwisaaye. 14Ne nga siwabalekhuulile ta, kane kumuluundi kuno abasiindikhile inywe bitaambiso bibifuurira ilala buubi bubweene, bibikane byoole khu buli mutweela mu shibala shoowo. Shino kane shikile nio umanye uri mbaawo ukuundi uliwo uuli nga Umukasya ta. 15Ilala ikhaba ari, khali waasiindikhile khaale buulwaale buubi bubweene bubahesa inywe mweesi khukhwaama khu shibala. 169.16: Roma 9.17Ne waabalekhile inywe khuuba baalamu, ari nio abokesanise kamaani keewe nio akile shiriifwa sheewe bashiruuye mu shibala mwoosi. 17Ne bona iwe ushiiminyaala busa, waalobele khuulekhuula babaandu beewe khuutsya. 18Ne ari kumukaamba, khu nyaanga nga inyene yino, akhaakile kamararara keesi mukhaabonatsakakho ta, kalakale khu Misiri. 19Ni nashiryo, lakila babaandu boosi ni bisolo byoosi bibiili mu Misiri, biweentse isi binyala byekama. Nga sibyekamile ta, kane byoosi bifwe.”

20Batweela khu bakaanisi ba Faraawo ni baawulila sheesi Umukasya aloma, baatsya baamusa baakulwa baabwe ni bibyaayo byaabwe. 21Ne baalala shaalekha khubawaambakho ta, nashiryo baalekha bibyaayo byaabwe ni baakulwa baabwe busa nga sibaabamusile ta.

22Kila Umukasya alomela Musa ari, “Tsaalaasa kumukhono kwoowo, kulole mu ngaaki, nio akile ibewo kamararara mu Misiri yoosi. Kane kalakale khu baandu, ni bisolo, ni kimikuunda kyoosi mu Misiri yoosi.”

23Kila Musa okeselela imiimbo yeewe mu ngaaki. Abweene awo Umukasya waasiindikha khuukuula khwe fula ni kamararara, ni kumulilo khu shibala. Umukasya waareera ifula ni kamararara abe bibikhakwatsakawo mu Misiri ta. 249.24: Bimb 8.7; 16.21Ifula iye kamararara yaaba ingali naabi, nga mulimo ni luheni luukali. Abe s’abatsakawo kamararara nga kano mu Misiri ta. 25Kamararara keeraka babaandu ni bisolo, koonakisa biilimwa, naluundi kaatyeenuulaka kamakhobolo ke khu misaala. 26Kaakhupa buli aandu oosi, akhali mu shisiintsa she Gosheni shonyene isi ba Isiraeli abe bamenya, niyo isi kakhaakhupa ta.

27Kila Faraawo arumanisa ari bamulaangile Musa ni Aroni, waabalomela ari, “Ilala kumuluundi kuno indi umwoonaki! Umukasya ali uwaŋali, ne ise ni babaandu baase sikhuli baaŋali ta. 28Sikhunyala khweloosela khukhwikhaliilikha khuukuula khuno ni kamararara ta. Ni mwikoontselele Umukasya abyakamise, kane imbalekhuule mutsye, mulekhe khumenya ano mu Misiri ta.”

29Musa waamukobolamo ari, “Nga ise ni ngana khukhwaama ano, indure mu shiriimba intsye, intsya khwikoontselela Umukasya. Kane kamararara ni luheni byaakame, nio inywe mumanye muri shibala shoosi shili sh’Omukasya. 30Ne ise naamanyile indi, iwe ni babaakaanisi boowo simwisaaya Umukasya Wele ta.”

31Bino byaakila kamakoongwe ni seyiri byoonakisibwa lwe kamararara khulwekhuuba nibyo abe byoolile likyesa. 32Ne iŋaano yaalekha khwoonakisibwa ta, khulwekhuuba abe ishiili khulaba ta.

33Nashiryo Musa waarura mu shiriimba waatsya, waaloomba isi Umukasya, kila ifula iye kamararara ni luheni byaakama. 34Ne umuyiinga n’abona ari bino byoosi byaaweelewo, indi luundi waaba uwe shikyili, waalekha khuukhola nga n’aloma ta. Ikhaba babaandu beewe nabo baaba baryo. 35Nashiryo Faraawo waaloba khuulekhuula ba Isiraeli khuutsya ta, shaaba nga abe Umukasya n’aloma ari kane shikholikhe.